NSOLO WA REVISTA | KODI KUFA NDI KUMALA KWA PYONSENE?

Kuferwa Kusapha

Kufa ndi nkhani yakunentsa. Anthu azinji nkhabe funa kubva pya nkhani ineyi. Mbwenye mwakucimbiza peno mwakudembuka, tonsene tinadzathimbana nako. Pontho, kuferwa kusapha kakamwe.

Nee cinthu cibodzi cakuti cinakwanisa kutikhunganya mwakukwana toera kuthimbana na kuferwa kwa nyakubala wathu, ndzathu wa m’banja, peno mwanathu. Cidengwa cinakwanisa kucitika mwakukhonda dikhira, peno mwapang’ono pang’ono. Mu njira yonsene, nyatwa ya kufa nkhabe kucalirwa, pontho ingafika isapha kakamwe.

Antonio, adaferwa na babace pa cidengwa ca mu nseu, asafokotoza: “Ndi ninga munthu afunga nyumba yanu mbaenda na mifungulo. Nee munakwanisa kupita n’nyumba, ngakhale mu ndzidzi wakucepa. Musasala mbamunyerezera basi. Ndi kucinja kwa makhaliro. Maseze muyesere kukhonda kupitawira​—thangwi musaona kuti si pyakulungama tayu​—nkhabe cinafuna imwe kucita.”

Pa kuthimbana na nyatwa ibodzi ene, nkazi m’bodzi anacemerwa Dorothy, wakuti adzakhala nzice mukhakhala iye na pyaka 47 pyakubalwa, atonga kugumana matawiro mangasi. Ngakhale kuti iye akhapfundzisa anapiana kuti anthu angafa asapitiriza kukhala maso, iye cipo akhabva kuti kufa ndi kumala kwa pyonsene. Mbwenye iye nee akhali na matawiro akubveka mwadidi. Iye abvundza ntsogoleri wa uphemberi wa Anglicana, “Ninji pisacitika kwa ife tingafa?” Iye antawira: “Nkhabe anapidziwa.” “Tisafunika kudikhira toera kuona.”

Kodi tisafunika basi ene “kudikhira toera kuona”? Kodi pana njira inango yakuti inatiphedza toera kudziwa khala mwandimomwene kufa ndi kumala kwa pyonsene?