NSOLO 55
Anju wa Yahova Atsidzikiza Ezekiya
Utongi wa Asirya ukhadakunda umambo wa madzindza khumi wa Izraeli. Mambo wa Asirya, Senakeribhe, akhafunambo kumenyana na umambo wa madzindza mawiri a Yuda. Iye atoma kumenyana na ubodzi na ubodzi wa mizinda ya Yuda. Nzinda ukhafuna iye kakamwe ukhali Yerusalemu, mbwenye Senakeribhe nee akhadziwa kuti Yahova akhatsidzikiza nzinda unoyu.
Ezekiya, mambo wa ku Yuda apasa Senakeribhe kobiri izinji toera akhonde kumenyana na nzinda wa Yerusalemu. Maseze Senakeribhe atambira kobiri, iye atuma anyankhondo ace amphambvu toera akafudze Yerusalemu. Anthu a mu nzinda agopa kakamwe pikhaona iwo kuti Asirya akhafendedzera dhuzi. Buluka penepo, Ezekiya aapanga: ‘Lekani kugopa. Asirya ndi amphambvu, mbwenye Yahova anatiphedza toera tikhale amphambvu kakamwe kupiringana iwo.’
Senakeribhe atuma Rabhisake toera aende kasingirira anthu a mu Yerusalemu. Rabhisake alimira kunja kwa nzinda mbakhuwa: ‘Yahova nkhabe kukuphedzani. Lekani kunyengezwa na Ezekiya. Nkhabe mulungu wakuti anakwanisa kukutsidzikizani m’manja mwathu.’
Ezekiya abvundza Yahova kuti akhafunika kucitanji. Yahova atawira: ‘Leka kugopa pidalonga Rabhisake, thangwi Senakeribhe nee anadzakunda Yerusalemu.’ Buluka penepo, Ezekiya atambira matsamba mangasi adatumiza Senakeribhe. Matsamba akhalonga tenepa: ‘Lekani kunyindira Yahova, Iye nkhabe kwanisa kukupulumusani.’ Ezekiya acita phembero: ‘Ndaphata miyendo Yahova, tipulumuseni toera anthu onsene adziwe kuti ndimwe basi Mulungu wandimomwene.’ Yahova antawira: ‘Mambo wa Asirya nkhabe kudzapita mu Yerusalemu. Ine ndinadzatsidzikiza nzinda wanga.’
Senakeribhe akhali na cinyindiro cakuti mbadakunda Yerusalemu. Mbwenye ntsiku inango namasiku, Yahova atuma anju toera kuenda kuna anyankhondo akuti akhali kunja kwa nzinda. Anju unoyu apha anyankhondo akukwana 185.000! Senakeribhe aluza anyankhondo ace amphambvu. Nakuti nee akhalibve na cakucita, iye abwerera kunyumba. Yahova atsidzikiza Ezekiya na nzinda wa Yerusalemu, ninga pikhadapikira iye. Mbamudakhala mu Yerusalemu, kodi imwe mbamudanyindirambo Yahova?
“Anju wa Yahova asatsidzikiza anthu onsene anan’gopa, pontho iye asaapulumusa.”—Masalmo 34:7