NSOLO 23

Kodi Mabukhu Athu Asalembwa Na Kuthumburuzwa Tani?

Munthu m’bodzi akuphata basa pa Departamentu Yakulemba, E.U.A. — Departamentu ya Kulemba, E.U.A.

Nsoka wa athumburuzi ku Koreya Wakubangwe — South Korea

Mamuna wa ku Armeniya akuphata bukhu idathumburuzwa na Mboni za Yahova — Armeniya

Ntsikana wa ku Burundi akuphata bukhu idathumburuzwa na Mboni za Yahova — Burundi

Nkazi wa ku woman Sri Lanka akukhata Marevista akuthumburuzwa na Mboni za Yahova — Sri Lanka

Toera kucita pyonsene pinakwanisa ife kuti timwaze ‘mphangwa zadidi kuli mbumba zonsene na kuli madzindza onsene, kuli anthu a malongero onsene na kuli mitundu ya anthu onsene’ tisathumburuza mabukhu mu pilongero pyakupiringana 750. (Apokalipse 14:6) Tisacita tani basa ineyi yakunentsa? Tisaicita na ciphedzo ca departamentu yakulemba mabukhu ya dziko yonsene yapantsi, pontho na athumburuzi, onsene ndi Mboni za Yahova.

Mphangwa zakutoma zisakhunganywa n’Cingerezi. Mathubo Akutonga asaonerera basa ya Departamentu Yakulemba yakuti isagumanika ku ofesi yathu ikulu ya dziko yonsene yapantsi. Departamentu ineyi isatsogolera mabasa a anyakulemba anatumikira ku ofesi ikulu ya dziko yonsene yapantsi na m’maofesi anango a filiali. Mukukhala na misoka ya anyakulemba akusiyana-siyana pisaticitisa kulemba pinthu pisakhuya anthu a makhaliro akusiyana-siyana, natenepa mabukhu athu asatundusa anthu a madzindza mazinji.

Mphangwa zisatumizwa kuna athumburuzi. Mphangwa zakulembwa zingamala kusasanyirwa na kutawirwa, zisatumizwa mu kuphatisira ntcini wa ndzeru kuna misoka ya athumburuzi a dziko yonsene yapantsi, yakuti isathumburuza, kudinga na kuleri mphangwa zenezi. Iwo asawangisira toera kusankhula “mafala akubveka” a undimomwene akuti mabvekero awo mu Cingerezi ndi mabodzi ene na mu pilongero pyawo.—Koelete 12:10.

Mitcini ya ndzeru isacimbizisa basa. Ntcini wandzeru nkhabe kupitira mbuto ya anyakulemba na athumburuzi. Mbwenye mabasa awo anakwanisa kucitwa mwakucimbiza mukuphatisira mitcini ya ndzeru, madisionaryo a mu ntcini wandzeru na pinthu pinango toera kudinga mwacidikhodikho. Mboni za Yahova zacita programu ya Sistema Eletrônico de Fotocomposição Multilíngue (MEPS) mu kuphatisira programu ineyi mphangwa zinakwaniswa kuikhwa m’madzana a pilongero, pabodzi na pithundzithundzi, na kuzigumanya toera kudhindwa.

Thangwi yanji tisawangisira tenepa, ngakhale mu pilongero pinalongwa basi ene na anthu pikwi pingasi? Thangwi ndi cifuno ca Yahova kuti ‘anthu onsene apulumuke, adziwembo mapfundzisiro andimomwene.’—1 Timoti 2:3, 4.

Ndi basa ipi inaphatanizwa pa kulemba mabukhu athu?
Thangwi yanji tisathumburuza mabukhu athu mu pilongero pizinji?