Njira Ya Kupfunzisa Ya Yezu

NTSIKU inango Yezu apanga mamuna kuti iye akhafunika kufuna nyakuendekanace. Mamuna abvunza Yezu: ‘Kodi mbani nyakuendekana wanga?’ Mwandimomwene, Yezu akhadziwa pikhanyerezera mamuna uneule. Mamuna akhanyerezera kuti anyakuendekanace akhali anthu a ntundu wace na anyarelijiau yace basi. Natenepa tendeni tione pidalonga Yezu kwa iye.

M’midzidzi inango Yezu akhapfunzisa m’kulonga mbiri. Mphapo ici ndico cidacita iye. Iye alonga mbiri ya Muyuda na Musamariya. Tamala kale kupfunza kuti Ayuda azinji nee akhafuna Asamariya. Inde, iyi ndi mbiri ya Yezu:

Ntsiku inango pakhali na Muyuda akhatcitira na nseu wa phiri kuenda ku Yeriko. Mbwenye mapanga ankutira. Iwo akwata kobiri yace mbamenya kazinji mpaka duzi na kufa.

M’kupita kwa nzidzi, nyantsembe wa Muyuda akhagwanda na pa nseu. Iye aona mamuna adamenywa kazinji. Kodi musanyerezera kuti iye acitanji? Mwakudzidzimusa, iye apambukira basi ku ntunda unango wa nseu mbapitiriza na kuenda. Buluka penepo munthu unango wakufuna kakamwe relijiau agwanda na penepo. Akhali Mulevi. Kodi alimira? Nkhabe, iye hadalimirambo tayu towera kuphedza mamuna adamenywa kazinji. Mungakwanise kuona nyantsembe na Mulevi kule kutali mbakatcitira na nseu.

Mbwenye onani kuti mbani ali pano na mamuna adamenywa kazinji. Iye ndi Musamariya. Na akuphedza Muyuda. Iye akuikha mitombwe pa pironda. Patsogolo pace, iye akwata Muyuda mbaenda naye pa mbuto yakuti iye mbadakwanisa kupuma na kuwanga.

Pakumala kulonga mbiri yace, Yezu alonga kwa mamuna adancita mbvunzo: ‘Kodi mbani mwa atatu ananyerezera iwe kuti akhala ninga nyakuedekana wa mamuna adamenywa kazinji? Akhali nyantsembe, Mulevi peno Musamariya?’

Mamuna atawira: ‘Mamuna wa Musamariya. Iye akhala wakukoma ntima kwa mamuna adamenywa kazinji.’

Yezu alonga: ‘Watawira mwadidi. Natenepa ndoko ukacitire anango sawasawa ninga pidacita iye.’

Kodi imwe nkhabe kufuna njira ya kupfunzisa ya Yezu? Tingakwanise kupfunza pinthu pizinji kakamwe pyakufunika tingabvesera pinalonga Yezu m’Bibilya, kodi si tenepa?