SOFONIYA
1 Mu ntsiku za Yosiya,+ mwana wa Amoni+ mambo wa ku Yuda, Sofoniya* mwana wa Kuzi, mwana wa Jedhaliya, mwana wa Amariya, mwana wa Ezekiya, atambira mphangwa izi za Yahova:
2 “Ine ndinadzafudza pinthu pyonsene piri pa dziko yapantsi,” alonga Yahova.+
3 “Ndinadzafudza anthu na pinyama pyene.
Ndinadzafudza mbalame na ntsomba za mʼbara,+
Pontho ndinadzafudza miyala yakugwegwedusa,*+ kuphatanizambo anthu anacita pyakuipa;
Ndinadzafudzambo anthu mu dziko ineyi,” alonga Yahova.
4 “Ine ndinadzatcunyusa Yuda,
Pontho ndinadzatcunyusa anthu onsene anakhala mu Yerusalemu,
Ndinadzabulusa pinthu pyonsene pyakuti pisacita khundu ya Bhaale,+
Dzina ya anyantsembe a alungu anango, pabodzi na anyantsembe anango,+
5 Ndinadzafudza ale anagodamira anyankhondo akudzulu padzulu panyumba zawo,+
Ale anagodamira Yahova mbadumbira kuti anakhala akukhulupirika kuna iye+
Mu ndzidzi ubodzi ene
mbadumbira kukhala akukhulupirika kuna Malkamu.+
7 Matamani pamaso pa Yahova Mbuya Wankulu Kakamwe, thangwi ntsiku ya Yahova iri dhuzi.+
Yahova akhunganya ntsembe; iye acenesa ale adacemera iye.
8 “Ine Yahova ndinadzatcunyusa atsogoleri, ana a mambo+ na onsene anabvala nguwo ninga anthu a madzindza anango,
Pa ntsiku inafuna ine kupereka ntsembe yanga.
9 Pa ntsiku ineyi, ine ndinadzatcunyusa onsene anakwira pa guwa,*
Ale anadzadza uphanga na kunyengeza nʼnyumba ya ambuyawo.
10 Pa ntsiku ineyi,” alonga Yahova,
“Pansuwo Ukulu wa Ntsomba panadzabveka nʼkhuwo,+
Mu nzinda Upswa munadzabveka kulira,+
Pontho mʼmapiri munadzabveka kutitimira.
11 Lirani imwe anthu anakhala ku Makitesi,*
Thangwi anyamalonda onsene amala kufudzwa;*
Pontho onsene ale akhapima parata amala kuphiwa.
12 Pa ndzidzi unoyu, ine ndinadzasaka mwadidi mu Yerusalemu na nyale,
Pontho ndinadzatcunyusa ale anakomerwa na makhaliro awo akuipa, mbalonga mʼmitima mwawo:
‘Yahova nee anadzacita pinthu pyadidi, pontho iye nee anadzacita pinthu pyakuipa.’+
13 Mpfuma zawo zinadzatapatwa, pontho nyumba zawo zinadzafudzwa.+
Iwo anadzamanga nyumba, mbwenye nee anadzakhalamo;
Pontho anadzatceka miti ya mauva, mbwenye nee anadzamwa vinyu yace.+
14 Ntsiku ikulu ya Yahova iri dhuzi!+
Iri dhuzi, pontho ikufika mwakucimbiza kakamwe!+
Nʼkhuwo wa ntsiku ya Yahova unakhala wakugopswa.+
Pa ntsiku ineyi, ngakhale anyankhondo anadzalira.+
15 Ntsiku ineyi ndi ntsiku yakuipirwa,+
Ntsiku ya nyatwa na yakutsukwala,+
Ntsiku ya condzi na yakufudza,
Ntsiku ya cidima cikulu kakamwe,+
Ntsiku ya mitambo na ya cidima cakuti bwerani mudzaone,+
16 Inadzakhala ntsiku ya kuliza nyanga, pontho ntsiku ya mikhuwo ya nkhondo,+
Ntsiku yakuti mizinda ya citsidzikizo cakuwanga na nyumba za ndzulu zinakhala pa nkhomo zinadzafudzwa.+
17 Ndinadzabweresa nyatwa kuna anthu,
Pontho iwo anadzafamba ninga maboliboli,+
Thangwi iwo adawira Yahova.+
Ciropa cawo cinadzakhutulwa ninga pfumbi,
18 Parata yawo na ouro yawo, nee pinadzaapulumusa pa ntsiku yakuipirwa kwa Yahova;+
Kuipirwa kwace kwakhala ninga moto wakuti unadzapisa dziko yonsene yapantsi,+
Thangwi iye anadzafudza anthu onsene anakhala pa dziko yapantsi, inde, kufudza kwakugopswa kakamwe.”+
2 Ntemo mbudzati kuphata basa,
Ntsiku mbidzati kupita mwakucimbiza ninga mapwepwa akumburuswa na mphepo,
Mbudzati kubwera kuna imwe ukali ukulu wa Yahova,+
Mbidzati kubwera kuna imwe ntsiku yakuipirwa kwa Yahova,
anthu onsene akupfulika* a pa dziko yapantsi,
Imwe akuti musabvera mitemo yace yakulungama.*
Sakani ulungami, sakani kucepeseka.
Panango* imwe munadzabiswa pa ntsiku yakuipirwa kwa Yahova.+
4 Thangwi Gaza unadzakhala nzinda wakusowa anthu;
Pontho Asikaloni anadzakhala madembe.+
5 “Dzedze kuna ale anakhala nʼkhundu-nʼkhundu mwa bara, dzindza ya Akereti!+
Mafala a Yahova akusandikani.
Iwe Kanani, dziko ya Afilisti, ine ndinadzakufudza,
Toera anthu akhonde kukhala pontho mu dziko yako.
6 Pontho nʼkhundu-nʼkhundu mwa bara munadzakhala mbuto yakudyesera pifuyo,
Yakuti iri na micera ya nkumbizi na mathanga akucitwa na miyala a mabira.
7 Ceneci cinadzakhala cisa ca anthu anafuna kudzapulumuka a dzindza ya Yuda;+
Iwo anadzadya kweneko.
Namasiku iwo anadzagona mʼmanyumba a Asikaloni.
Thangwi Yahova Mulungu wawo anadzaatsalakana,
Pontho iye anadzabweresa ale adaendeswa ku ubitcu.”+
8 “Ine ndabva kuxola kukhacita Moabhe,+ pontho ndabva kutikana kukhacita Aamoni,+
Iwo akhatikana mbumba yanga mbaathusa kuti anaakwatira cisa cawo.+
9 Natenepa, ine ndiri kudumbira mu dzina yanga,” alonga Yahova wa anyankhondo, Mulungu wa Izraeli,
Moabhe anadzakhala ninga Sodhoma,+
Pontho Aamoni anadzakhala ninga Gomora,+
Mbuto yakuti inamera tsanga yakupfika, mbuto ya mataka a munyu, pontho mbuto yakuti kwenda na kwenda inadzakhala yakusowa anthu.+
Ale anafuna kusala a mbumba yanga anadzatapata pinthu pyawo,
Pontho ale anafuna kusala a dzindza yanga anadzakwata dziko yawo.
10 Pyenepi pinadzaacitikira thangwi ya kudzikuza kwawo,+
Thangwi iwo asatikana, pontho asadzikuza kakamwe pakati pa mbumba ya Yahova wa anyankhondo.
11 Yahova anadzacita pinthu pyakudzumisa kuna iwo;
Thangwi iye anadzafudza alungu onsene a pa dziko yapantsi,
Madzindza onsene anakhala ntsuwa anadzagodama pamaso pace,*+
Mʼbodzi na mʼbodzi pa mbuto yace.
12 Imwe anthu a ku Etiopya munadzaphiwambo na supada yanga.+
13 Iye anafuthula djanja yace kukhundu yakunkwiriro mbipha Asirya,
Pontho iye anadzacitisa nzinda wa Ninive kukhala madembe,+ mbukhala wakusowa madzi ninga thando.
14 Pinyama pyonsene pya ntsanga pinadzagona pakati pa nzinda unoyu.
Namasiku, bvuwo-bvuwo na nungu anadzagona pa mizati yakugwa ya nzinda unoyu.
Kulira* kwa mbalame kunadzabveka na pa janela.
Pantsi pa misuwo panadzaoneka madongolomwa;
Thangwi iye anadzabulusa matabwa a sedhro akhadaikhwa pa pfufu.
15 Unoyu ndi nzinda wakudzikuza wakuti ukakhala mwakutsidzikizika,
Pontho ukhalonga muntima mwawo: ‘Ine ndine wakufunika kakamwe, nkhabepo unango ninga ine.’
Iwo wadzakhala nzinda wakugopswa kakamwe,
Mbuto inagona pinyama pya ntsanga!
Anthu onsene anafuna kudzapita na penepo anadzaimba ciruzwi mbasukusa nsolo.”+
3 Dzedze kuna nzinda wakukhonda bvera, wakupswipa na wakuponderera anango!+
2 Anthu a mu nzinda unoyu nee abvera;+ nee atawira kusandikwa.+
Nee akhulupira Yahova;+ pontho nee afendedzera Mulungu wawo.+
3 Atsogoleri a mu nzinda unoyu ndi ninga nkhalamu zakuti zikulira.+
Anyakutonga miseru awo ndi ninga mibindzi yakuti isasodza namasiku;
Iwo nkhabe siya nee gogodo ibodzi toera kudya mangwana mwace.
4 Aprofeta ace ndi akudzikuza na aumpfakafaka.+
5 Yahova ndi wakulungama, pontho ali pakati pa anthu a mu nzinda unoyu;+ iye nkhabe cita pinthu pyakuipa.
Ntsiku zonsene namacibese iye asadziwisa mitemo yace,+
Iye nkhabe phonya, asakhala ninga ceza ca dzuwa.
Mbwenye nyakucita pyakuipa nkhabe kukhala na manyadzo.+
6 “Ine ndafudza madzindza, nyumba zawo za ndzulu zinakhala pankhomo zafudzwa.
Ndafudza miseu yawo, pontho nkhabebve anapita na mʼmiseu ineyi.
Mizinda yawo yafudzwa mbisala yakusowa anthu.+
7 Ine ndapanga nzinda: ‘Mwandimomwene iwe unadzandigopa mbutawira kusandikwa,’+
Toera ndikhonde kuufudza* thangwi ya pyenepi pyonsene,+
Pontho toera mbuto inakhala iwo ikhonde kufudzwa.
Mbwenye iwe ukhafuna kakamwe kucita pyakuipa.+
8 ‘Natenepa, pitirizani kundidikhira,’+ alonga Yahova,
‘Mpaka ntsiku inafuna kudzalamuka ine toera kutapata,*
Thangwi cifuno canga ndi kugumanya madzindza na maumambo,
Toera ndiakhuthulire kuipirwa kwanga, ukali wanga onsene;+
Thangwi kuipirwa kwanga kwakhala ninga moto wakuti unadzapisa dziko yonsene yapantsi.+
9 Pa ndzidzi unoyu ndinadzacinja cilongero ca mbumba zonsene kudza cilongero cakucena,
Toera iwo onsene asimbe dzina ya Yahova,
10 Ale anacita maphembero akudembetera kuna ine, mwana wankazi wa mbumba yanga idabalaliswa,
Anadzandibweresera miyoni kubulukira kucisa ca mikulo ya ku Etiopya.+
11 Pa ntsiku ineyi nee unadzapaswa manyadzo
Thangwi ya pinthu pyonsene pyakuipa pikhandicitira iwe,+
Ine ndinadzabulusa pakati pako anthu akudzikuza na akugaya;
Pontho iwe cipo unadzakhala wakudzikuza paphiri yanga yakucena.+
12 Ine ndinadzatawirisa kuti mbumba yakucepeseka na yakukhurudzika ikhale pakati pako,+
Pontho iwo anadzathawira mu dzina ya Yahova.
13 Ale adasalikira mu Izraeli+ nee anadzacita pinthu pyakuipa;+
Iwo nee anadzalonga uthambi, pontho nee anadzanyengeza anthu na lirimi yawo;
Iwo anadzadya mbagona, pontho nkhabe munthu anafuna kuagopesa.”+
14 Khuwa mwakukomerwa iwe mwana wankazi wa Sioni!
Khuwa mwakutsandzaya iwe Izraeli!+
Iwe mwana wankazi wa Yerusalemu,+ tsandzaya, pontho komerwa na ntima wako onsene!
15 Yahova amalisa kutcunyuswa kukhali na iwe.+
Iye acitisa nyamalwa wako kubwerera nduli.+
Yahova, Mambo wa Izraeli ali pakati pako.+
Iwe nee unadzagopabve nyatwa.+
16 Pa ntsiku ineyi Yerusalemu anadzapangwa:
“Iwe Sioni, leka kugopa.+
Leka kugwisa manja ako.
17 Yahova Mulungu wako ali na iwe.+
Ninga nyankhondo wamphambvu, iye anadzakupulumusa.
Thangwi ya iwe, iye anadzatsandzaya kakamwe.+
Iye anadzakhurudzika thangwi ya kukomerwa na ufuni unapangiza iye kuna iwe.
Iye anadzakhuwa mwakutsandzaya thangwi yakukomerwa na iwe.
18 Ndinadzacemeresa ale anatsukwala thangwi yakukhonda gumanika mʼmaphwando ako;+
Iwo nee akhali na iwe thangwi akhatsalakanwa mwakusowa cilemedzo ku dziko inango.+
19 Pa ndzidzi unoyu, ine ndinadzatcunyusa onsene anakuponderera;+
Ndinadzapulumusa ale anatcikhama,+
Pontho ndinadzagumanya ale adabalaliswa.+
Ine ndinadzacitisa kuti iwo asimbwe, pontho akhale akubvekera*
Mu dziko yonsene idapaswa iwo manyadzo.
20 Pa ndzidzi unoyu ine ndinadzakubweresani pontho kunyumba,
Inde, pa ndzidzi unoyu ine ndinadzakugumanyani.
Thangwi ine ndinadzakucitisani kukhala akubvekera,* pontho ndinadzakucitisani kuti musimbwe+ pakati pa mbumba zonsene za pa dziko yapantsi,
Ndingadzabweresa anthu anu adaendeswa ku ubitcu, imwe munadzaona pyenepi,” alonga Yahova.+
Dzina ineyi isabveka “Yahova Amʼbisa (Ankoya).”
Pisaoneka kuti miyala ineyi ndi mabasa peno pinthu pyakuti pisacita khundu yakulambira madzimunthu.
Panango ineyi ndi guwa ikhaikhirwa mpando wa mambo.
Pisaoneka kuti ineyi ikhali khundu ibodzi ya Yerusalemu yakuti ikhali dhuzi na Nsuwo Ukulu wa Ntsomba.
Fala na Fala: “amala kumatamiswa.”
Peno: “manungo awo.”
Peno: “akucepeseka.”
Fala na Fala: “matongero ace.”
Peno: “Pingakwanisika.”
Peno: “namasikati.”
Peno: “anadzamulambira.”
Ineyi panango ndi dungu ya mphepo peno kulira kwa pinyama pya ntsanga.
Peno: “kuutcunyusa.”
Munjira inango: “ndinadzalamuka ninga mboni.”
Peno: “kumulambira mwakuphatana.”
Fala na Fala: “na dzina.”
Fala na Fala: “na dzina.”