ABHAKUKI
1 Mphangwa zidapangwa mprofeta Abhakuki* mʼmasomphenya:
2 Yahova, mpaka lini ndinakhuwa toera kuphemba ciphedzo, imwe mbamukhonda kundibva?+
Mpaka lini ndinaphemba toera mundipulumuse ku uphanga, imwe mbamukhonda kucita pinthu?*+
3 Thangwi yanji imwe musandicitisa kuona pinthu pyakuipa?
Thangwi yanji imwe musasiya anthu anaponderera andzawo?
Thangwi yanji kufudza na uphanga pisacitika pamaso panga?
Pontho thangwi yanji kulongezana na kumenyana kwathimizirika?
4 Natenepa, mwambo nkhabebve mphambvu,
Pontho anthu nee ali kucitabve pinthu pyakulungama.
Thangwi anyakucita pyakuipa asaponderera anthu akulungama;
Na thangwi ineyi, anthu nkhabe kucita pyakulungama.+
5 “Yangʼanani pakati pa madzindza, pontho onesesani mwadidi!
Yangʼanisani mwadidi, mbamudzumatirwa kakamwe;
Thangwi piripo pinafuna kudzacitika mu ntsiku zanu,
Pyakuti nee munadzapikhulupira, maseze munthu akupangeni.+
Iwo asakunda mbuto zikulu za pa dziko yapantsi,
Toera akwate nyumba zakuti nee ndi zawo.+
7 Iwo ndi akugopswa, pontho asathusa anthu.
Iwo asakhazikisa ulungami wawo na utongi wawo.+
8 Makavalo awo asathamanga kakamwe kupiringana anyalugwe,
Pontho namasiku, iwo asagopswa kakamwe kupiringana mibindzi.+
Makavalo awo a nkhondo asathamanga kakamwe;
Iwo asabuluka kutali kakamwe.
Iwo asamburuka ninga capungu angafuna kuphata cinthu toera kudya.+
9 Onsene asabwera akukhunganyika toera kucita uphanga.+
Iwo angakhala pabodzi, nkhope zawo zisaoneka ninga mphepo yakumabulukiro a dzuwa,+
Pontho anthu adaphata iwo ninga mabitcu ndi azinji kakamwe ninga tcetca.
10 Iwo asasingirira amambo,
Pontho asaseka atsogoleri.+
Iwo asaseka mbuto zonsene za citsidzikizo cakuwanga;+
Iwo asatutira mataka, mbakunda mizinda.
11 Buluka penepo, iwo asafamba mwakucimbiza ninga mphepo, mbaenda kutsogolo,
Mbwenye iwo anadzakhala na mulando,+
Thangwi iwo asanyerezera kuti adaapasa mphambvu ndi mulungu wawo.”*+
12 Imwe Yahova, kodi nee ndimwe wakwenda na kwenda?+
Mulungu wanga Wakucena, imwe nkhabe kufa.+
Mphapo thangwi yanji musasiya ale anacita pinthu mwaumpfakafaka,+
Pontho thangwi yanji musapitiriza kumatama mu ndzidzi wakuti anthu akuipa asafudza anthu akulungama kupiringana iwo?+
14 Thangwi yanji musatawirisa kuti munthu atsalakanwe ninga ntsomba za mʼbara,
Pontho ninga nyama zinafamba na pfufu ya mimba zakuti nkhabe ntongi?
15 Iye* asamedza onsene na cimedzo.
Iye asaaphata na kokota yace,
Pontho iye asaaphata na malitcera ace.
Na thangwi ineyi, iye asakomerwa kakamwe.+
16 Natenepa, iye asapereka ntsembe kuna kokota yace,
Pontho asapereka ntsembe* kuna malitcera ace;
Iye akhakwanisa kugumana cakudya cakupasa ungumi wadidi thangwi ya pinthu pyenepi,
Pontho cakudya cace ndi cadidi kakamwe.
17 Kodi iye anadzapitiriza kuphata ntsomba na kokota yace?*
Kodi iye anapitiriza kupha madzindza a anthu, mbakhonda kuabvera ntsisi?+
Ine ndinadzapitiriza kuyangʼanira toera kubva pinafuna kulonga iye kubulukira mwa ine,
Pontho ndinapitiriza kunyerezera pinthu pinafuna kulonga ine, iye angandisandika.
2 Penepo Yahova anditawira:
“Pinthu pidaona iwe mʼmasomphenya, pilembe mwadidi pa miyala yakusemwa,+
Toera ule anafuna kupileri mwakugaluza akhonde kunentseka.+
3 Pana ndzidzi udakhazikiswa toera masomphenya anewa akwanirisike,
Ndzidzi unoyu unadzafika mwakucimbiza, pontho masomphenya anewa nee anadzakhala authambi.
Maseze aoneke ninga akudembuka, pitiriza na kuadikhira!+
Thangwi mwakukhonda penula, masomphenya anewa anadzakwanirisika.
Iwo nee anadzadembuka!
4 Yangʼana munthu wakudzikuza;
Iye nee ndi wakulungama muntima mwace.
Mbwenye munthu wakulungama anadzakhala mʼmaso thangwi ya cikhulupiro cace.+
5 Mwandimomwene, nakuti vinyu ndi yakunyengeza,
Munthu wakudzikuza nee anadzakwanisa kucita pinafuna iye.
Njala yace ndi ikulu kakamwe ninga Nthumbi;*
Iye ndi ninga kufa, thangwi nkhabe khuta.
Iye asapitiriza kugumanya madzindza onsene,
Pontho asakwata anthu onsene toera akhale ace.+
6 Kodi anthu anewa onsene, nee anadzanseka* mbansingirira?+
Iwo anadzalonga:
‘Dzedze kuna ule anagumanya pinthu pyakuti nee ndi pyace,
Mbathimizira kakamwe mangawa ali na iye!
Pyenepi pinacitika mpaka lini?
7 Kodi anthu adafiyari iwe, nee anadzabwera kuna iwe mwakucimbiza?
Iwo anadzalamuka, mbakusukusa mwamphambvu,
Pontho iwo anadzatapata pinthu pyako.+
8 Nakuti iwe watapata madzindza mazinji,
Madzindza anango onsene adasala anadzakutapatambo,+
Thangwi iwe wapha anthu,
Pontho thangwi wacita pinthu pyauphanga pa dziko,
Mʼmizinda na kuna anthu onsene anakhala mwenemo.+
9 Dzedze kuna ule anabweresa panyumba pace pinthu pinawina iye mwakusowa ulungami,
Toera ntsandza yace ikhale pa mbuto yapadzulu,
Kuti athawe nyatwa.
10 Pinthu pyakuipa pidacita iwe, pyabweresa manyadzo panyumba pako.
Thangwi yakupha anthu azinji, iwe wadawa.+
11 Mwala wa pa pfufu unadzalira,
Pontho unadzatawirwa na mphalupalu ziri pantsoi.
12 Dzedze kuna ule anapha anthu toera kumanga nzinda,
Pontho ule analikhisa nzinda mwakusowa ulungami!
13 Onani! Kodi si Yahova wa anyankhondo tayu anacitisa kuti anthu aphate basa mwakuwanga toera pinacita iwo pidzapiswe na moto,
Pontho siye tayu anacitisa madzindza a anthu kuneta papezi?+
14 Thangwi dziko yapantsi inadzadzala na cidziwiso ca mphambvu za Yahova
Ninga kudzala kwa madzi mʼbara.+
15 Dzedze kuna ule anapasa andzace pyakumwa,
Mbapibvungaza na kuipirwa na ukali toera kualedzeresa,
Kuti akwanise kuaona pezi!
16 Iwe unadzakhuta na pinthu pyakupasa manyadzo, mʼmbuto mwakukhala na mbiri.
Iwe unadzamweswambo mbuoniwa kuti nee wasidzwa.
Ndiko iri kunkono wamadyo wa Yahova inadzafika kuna iwe,+
Pontho manyadzo anadzaphimbira mbiri yako;
17 Thangwi pinthu pyauphanga pidacitira iwe Libhano pinadzakudzera,
Pontho kufudza kudacitisa pikala kugopa, kunadzabwera kuna iwe,
Thangwi iwe wapha anthu,
Pontho thangwi wacita pinthu pyauphanga pa dziko,
Mʼmizinda na kuna anthu onsene anakhala mwenemo.+
18 Kodi dzimunthu yakusemwa,
Yakuti yasemwa na munthu iri na basa yanji?
Dzimunthu ya utale* na mpfundzisi wauthambi piri na basa yanji,
Maseze adapicita asapinyindira,
Mbacita alungu akusowa basa akuti nkhabe kulonga?+
19 Dzedze kuna ule anapanga phindi ya muti: “Lamuka!”
Peno ule anapanga mwala wakuti nkhabe longa: “Lamuka! Tipfundzise!”
20 Mbwenye Yahova ali mu templo yace yakucena.+
Dziko yonsene yapantsi mbimatame pamaso pace!’”+
3 Iyi ndi phembero ya mprofeta Abhakuki, idacita iye ninga nyimbo inaimbwa paciliro:
2 Imwe Yahova, ine ndabva mphangwa thangwi ya imwe.
Yahova, ine ndadzumatirwa na mabasa anu.
Mu ndzidzi wakuthema,* imwe munadzacita pontho mabasa anu!
Mu ndzidzi wakuthema,* dziwisani mabasa anu.
Lekani kuduwala kutibvera ntsisi mu ndzidzi wa nyatwa.+
Mbiri yace yaphimbira kudzulu;+
Dziko yapantsi yadzala na anthu anansimba.
4 Kuyetimira kwace kukhali ninga ceza.+
Pinthu piwiri pikhacetuma mʼmanja mwace,
Yakuti ikhali mbuto idabisala mphambvu yace.
5 Muliri ukhaenda patsogolo pace,+
Pontho utenda unacitisa manungo kupisa ukhabwera nduli mwace.
6 Iye alimira, mataka mbatekenyeka.+
Iye ayangʼana, madzindza mbatetemera.+
Mapiri akukhalikira agomoka,
Pontho nthunda zakale kakamwe zagwa.+
Njira zinafamba na iye ndi zakale kakamwe.
7 Ine ndaona nyatwa zikhali mʼmisasa ya anthu a ku Kusi.
Nguwo za mu nsasa wa dziko ya Midhiyani zatetemera.+
8 Imwe Yahova, mwaipirwa thangwi ya mikulo,
Kodi ukali wanu ukulu wadzera mikulo?
Peno ukali wanu wadzera bara?+
9 Imwe mwabulusa uta wanu, pontho mwaukunga toera kuponya pswimo.
Ndodo* zapaswa basa. (Sela)
Imwe mwaphatisira mikulo toera kugawa dziko yapantsi.
10 Mapiri pidakuonani iwo apfukunyuka thangwi ya kubva kupha.+
Madzi abvumba kakamwe.
Madzi akuzika akukuma.+
Iwo akucita mabimbi makulu.
11 Dzuwa na mwezi pyalimira kudzulu.+
Mapswimo anu aenda ninga ceza.+
Dipa yanu ikhacetuma ninga njazi.
12 Mwakuipirwa imwe mwafamba pa dziko yapantsi.
Mwaukali imwe mwaponda-ponda madzindza.
13 Imwe mwaenda toera kupulumusa mbumba yanu, toera kupulumusa nyakudzodzwa wanu.
Imwe mwafudza ntsogoleri* wa nyumba ya anyakucita pyakuipa.
Nyumba ineyi yafudzwa kutomera pantsi mpaka kuntsoi. (Sela)
14 Imwe mwapha anyankhondo ace na pida pyawo pya nkhondo,*
Mu ndzidzi udaenda iwo ninga condzi toera kandithamangisa.
Iwo akhatsandzaya kakamwe kupha ncibisobiso munthu wakupondererwa.
15 Imwe mwapita na makavalo anu mʼbara,
Mwapita na pakati pa mabimbi makulu.
Magogodo anga atoma kubvunda;+
Miyendo yanga ikhatetemera.
Mbwenye ndikudikhira ntsiku ya nyatwa mwakukhurudzika,+
Thangwi ntsiku ineyi, inadzera ale anamenyana na ife.
17 Maseze muti wa nsambvu ukhonde kubuluka maluwa,
Pontho miti ya mauva ikhonde kukhala na misapo;
Maseze miti ya milivera ikhonde kubala mwadidi,
Pontho minda ikhonde kubuluka cakudya;
Maseze mabira azambazike nʼthanga,
Pontho ngʼombe mbizisoweka mʼmathanga;
18 Ngakhale tenepo, ine ndinadzatsandzaya thangwi ya Yahova;
Ine ndinadzakomerwa thangwi ya Mulungu wacipulumuso canga.+
19 Yahova Mbuya Wankulu Kakamwe ndiye anandipasa mphambvu;+
Iye anadzacitisa miyendo yanga kukhala ninga ya mbawala,
Pontho anadzacitisa kuti ndiponde mʼmbuto zaulambiri.+
Kuna nyakutsogolera nyimbo; yakuimbwa na pyakuimba napyo pyanga pya nkhambala.
Panango dzina ineyi isabveka “Kukhumbatira.”
Peno: “kundipulumusa?”
Munjira inango: “mphambvu zawo ziri muna mulungu wawo.”
“Iye” analongwa pa vesi iyi ndi Akaldheya akuti ndi anyamalwa.
Peno: “ntsembe zakupiswa.”
Munjira inango: “kusolola supada yace?”
Peno: “Seoli,” ndi kumasiye kunaikhwa anthu onsene. Onani Mabvekero a Mafala Anango.
Peno: “anadzamulongera misangani.”
Peno: “Dzimunthu yakunyunguluswa.”
Munjira inango: “Mu ndzidzi wathu.”
Munjira inango: “Mu ndzidzi wathu.”
Onani Mabvekero a Mafala Anango.
Munjira inango: “Mapswimo.”
Fala na Fala: “nsolo.”
Fala na Fala: “ndodo zawo.”
Fala na Fala: “mʼmimba mwanga mwanyunguluka.”