NAUMI
1 Mafala analonga pyakutongwa kwa Ninive.+ Bukhu ya masomphenya adaona Naumi* wa ku Elikosi:
2 Yahova ndi Mulungu wakuti asafuna kuti anthu alambire iye basi,+ pontho asabwezera pyakuipa anyamalwa ace;
Yahova asabwezera pyakuipa anyamalwa ace, pontho ali dzololo toera kupangiza ukali wace.+
Yahova asabwezera pyakuipa anyamalwa ace,
Pontho iye asapitiriza kukhala wakuipirwa na anyamalwa ace.
3 Yahova ndi wakudembuka kuipirwa,+ pontho ndi wamphambvu kakamwe,+
Mbwenye Yahova nee anasiya kutcunyusa anyakudawa.+
Iye asaphatisira mphepo yakufudza na condzi,
Pontho pfumbi ya manyalo ace ndi mitambo.+
Pinthu pidamera pa Bhasani na pa Karmelo pisanyala,+
Pontho maluwa a ku Libhano asanyala.
5 Mapiri asatekenyeka thangwi ya iye,
Pontho nthunda zisanyunguluka.+
Dziko inadzatetemera pamaso pace,
Pontho mataka na pinthu pyonsene pinagumanika mu dziko pinadzatetemera.+
6 Kodi iye angaipirwa mbani anakwanisa kulimira?+
Pontho mbani anakwanisa kupirira ukali wace ukulu?+
Ukali wace unadzakhuthulwa ninga moto,
Pontho iye asacitisa miyala kunyedzeka.
7 Yahova ndi wadidi,+ iye ndi mbuto yakuthawira mu ndzidzi wa nyatwa.+
Iye asakumbuka* ale anathawira kuna iye.+
8 Iye anadzaphatisira madzi toera kufudziratu Ninive,*
Pontho cidima cinadzathamangisa anyamalwa ace.
9 Ndi pinthu pipi pyakuipa pinanyerezera imwe kucitira Yahova?
Iye anadzakufudzani kwenda na kwenda.
Iye nee anadzafunikabve kukufudzani pontho.+
10 Thangwi iwo amangana-mangana ninga minga,
Pontho iwo akhala ninga ale analedzera na pyakumwa pyakuledzeresa;*
Mbwenye anafudzwa ninga maudzu akuuma.
11 Mwa iwe munadzabuluka munthu ananyerezera kucita pinthu pyakuipa kuna Yahova,
Munthu wakuti asapereka uphungu wakusowa basa.
12 Yahova alonga:
“Maseze iwo ndi amphambvu, pontho ndi azinji,
Mbwenye anadzafudzwa mbakhonda kuonekabve.
Ine ndakuthabusa,* mbwenye nee ndinadzakuthabusabve.
13 Cincino ndinagwanda goli yace mbandiibulusa paphewa pako,+
Pontho ndinagwanda unyolo udamangwa na iwe.
14 Yahova alonga tenepa thangwi ya iwe:*
‘Iwe nee unadzabala ana toera apitirize kudziwika na dzina yako.
Ndinadzafudza madzimunthu akusemwa na madzimunthu a utale* panyumba* ya alungu ako.
Ine ndinadzakukhunganyira nthumbi thangwi iwe ndiwe wakusowa basa.’
15 Onani! Padzulu pa mapiri pana manyalo a munthu anabweresa mphangwa zadidi,
Ule anadziwisa pya ntendere.+
Iwe Yuda, cita maphwando ako,+ pontho cita pidapikira iwe,
Thangwi munthu wakusowa basa nkhabe kudzapitabve na pana iwe.
Mwakukhonda penula iye anadzafudzwa.”
2 Munthu wakuti anadzakubalalisa abwera kuna iwe.*+
Tsidzikizani mipanda yanu.
Pitirizani kuonera njira.
Khunganyikani,* pontho khalani akuwanga toera kumenya nkhondo.
2 Yahova anadzacitisa kuti mbiri ya Yakobe ibwerere,
Pontho anadzacitisa kuti mbiri ya Izraeli ibwerere,
Thangwi anyakufudza, afudza dziko yawo;+
Pontho iwo agwanda nthawi zawo zipswa.
3 Maxango a anyamalwa a Ninive akhwazwa tinta yakufuira,
Anyankhondo ace abvala nguwo zakufuira kakamwe.
Khundu ya utale ya ngolo yace ya nkhondo isayetimira ninga moto
Pa ntsiku inakhunganyika iye toera kuenda kamenya nkhondo,
Pontho madipa awo a junipero ali pikapika.
4 Ngolo za nkhondo zisafamba balala-balala mʼmiseu.
Izo zisathamanga uku na uku mʼmbuto zapakweca.
Izo zisayetimira ninga pyakumwanikira napyo, pontho zisacetuma ninga njazi.
5 Iye* anadzacemeresa atsogoleri ace a anyankhondo.
Iwo anadzagwegweduka mu ndzidzi unaenda iwo.
Anadzathamanga mpaka pa mpanda wace;
Iwo anadzathimizira citsidzikizo ca mpanda.
6 Misuwo ya mikulo inadzafungulwa,
Pontho nyumba inakhala mambo inadzafudzwa.*
7 Pidatongwa ndi ipi: Nzinda uyu wadulwa nguwo,
Iwo unadzakwatwa, pontho mabitcu ace akazi anadzalira;
Kulira kwawo kunadzabveka ninga nkhangaiwa, pontho anadzamenya panthimandzi.
8 Kutomera kale, Ninive+ akhali ninga thawala ya madzi,
Mbwenye cincino anthu akuthawa.
“Limirani! Limirani!”
Mbwenye nkhabe anabwerera nduli.+
9 Tapatani parata, tapatani ouro!
Mpfuma za mwenemu nkhabe mala.
Mwenemu mwakoyiwa ntundu onsene wa pinthu pyakufunika kakamwe.
10 Mu nzinda nkhabebve pinthu, iwo wafudzwa, mbusala madembe!+
Mitima yawo yanyunguluka thangwi ya kugopa, mabondo awo agoboka, pontho pyuno pyawo pisatetemera;
Nkhope zawo zonsene zisapangiza kudzudzumika.
11 Iri kupi mbuto inabisalira nkhalamu,+ iri kupi mbuto inadyera nkhalamu zingʼono,
Mbuto yakuti nkhalamu zisabuluka na anace,
Mbazisowa munthu anafuna kuzigopesa?
12 Nkhalamu yaphata nyama zizinji, mbazikhwedzula-khwedzula toera kupasa anace,
Pontho iyo ikhapha nyama toera kupasa nkhalamu zikazi.
Iyo ikhadzadza nyama zizinji mphako mwayo,
Pontho ikhadzadza mbuto inakhala iyo na nyama zakukhwedzulwa-khwedzulwa.
13 Yahova wa anyankhondo alonga: “Ona! Ine ndine nyamalwa wako,+
Ine ndinadzapisa ngolo zako za nkhondo mbapaoneka utci basi,+
Pontho nkhalamu zako zingʼono zinadzaphiwa na supada.
Ndinadzamalisa kusaka nyama kunacita iwe pa dziko yapantsi,
Pontho mafala a anthu ako anapereka mphangwa nee anadzabvekabve.”+
3 Dzedze kuna nzinda wakuti anthu a mwenemo asapha andzawo!
Iwo wadzala na uthambi, pontho na umbava.
Ndzidzi onsene iwo usatapata pya anango.
2 Ine ndabva kulira kwa mitcamu, pontho ndabva kulira kwa maroda,
Ine ndaona makavalo mbakathamanga, pontho ndaona ngolo za nkhondo mbizikathamanga kakamwe.
3 Anyankhondo anafamba na makavalo, masupada akuyetimira, madipa akucetuma,
Anthu azinji afa, mikuku mizinji ya manungo a anthu akufa,
Mbuto zonsene zisagumanika manungo a anthu akufa.
Iwo asagwegweduka na manungo a anthu akufa.
4 Pyenepi pisacitika thangwi ya ulukwali uzinji unacita iye,
Iye ndi wakubalika na wakutundusa, nkazi waluso yakucita pyaufiti,
Iye asaphatisira ulukwali ninga nsampha kuna madzindza anango,
pontho asaphatisira pyaufiti pyace ninga nsampha kuna mabanja.
5 Yahova wa anyankhondo alonga: “Ona! Ine ndine nyamalwa wako,*+
Ine ndinadzakundzula saya yako mpaka kuphimbira nkhope yako;
Ndinadzacitisa kuti madzindza anango akuone pezi;
Pontho ndinadzacitisa maumambo toera aone kupwazika kwako.
6 Ine ndinadzakuponyera pinthu pyakunyanyasa
Mbandikucitisa kukhala wakupwazika;
Pontho ndinakucitisa kukhala cinthu cakugopswa kuna anango.+
7 Anthu onsene anafuna kukuona anakuthawa+ mbalonga:
‘Ninive afudzwa!
Mbani anafuna kumbvera ntsisi?’
Ndinagumana kupi anthu toera kukubalangaza?
8 Kodi iwe ndiwe wadidi kakamwe kupiringana No-Amoni,*+ wakuti akakhala dhuzi na mikulo mingʼono ya Nilo?+
Iye akhadazungulirwa na madzi;
Mpfuma yace ikhali bara, pontho mpanda wace ukhali bara.
9 Mphambvu zace zonsene zikhabuluka ku Etiopya na ku Ejitu.
Puti+ na Libhiya ndiwo akhamʼphedzera.*+
10 Mbwenye ngakhale No-Amoni aendeswa ku dziko inango;
Iye akwatwa mbaendeswa ku ubitcu.+
Pontho anace amala gwandwa-gwandwa mʼmagurayi* onsene a miseu.
Iwo acita pyakulotera toera kusankhula amuna a cidzo,
Pontho amuna onsene a cidzo amangwa na maunyolo.
11 Iwembo unadzaledzera;+
Iwe unadzabisala.
Iwe unadzasaka ciphedzo toera kuthawa nyamalwa.
12 Mbuto zako zonsene za citsidzikizo cakuwanga zinadzakhala ninga miti ya misambvu yakuti iri na misapo yakutoma kutokota;
Iyo ingagubudzwa, misapo isagwa nkanwa mwa ale anaidya.
13 Ona! Anyankhondo ako akhala ninga akazi pakati pako.
Misuwo mikulu ya mu dziko yako inadzafungulwa toera anyamalwa ako apite.
Moto unadzapisa mipiringanyo ya misuwo yako mikulu.
14 Tunga madzi mbudzati kuzungulirwa!+
Tsidzikiza mwadidi mipanda yako.
Pita mʼmatope, pontho doba mataka;
Phata cikombole mbuumba mabhuloko.
15 Ngakhale tenepo, moto unadzakupisa.
Iwe unadzaphiwa na supada.+
Iwe unadzadyiwa ninga pinacita anyadzombe angʼono kuna pyakumera.+
Thimizirika kakamwe toera ukhale ninga anyadzombe angʼono!
Inde, thimizirika kakamwe toera ukhale ninga anyadzombe!
16 Iwe wathimizira anyamalonda ako mbakhala akunjipa kakamwe kupiringana nyenyezi zakudzulu.
Anyadzombe angʼono asacinja khanda yawo, pontho asamburuka mbaenda kutali.
17 Anyakuonera ako ndi ninga anyadzombe,
Pontho atsogoleri ako a anyankhondo ndi ninga nkumbi wa anyadzombe.
Mu ntsiku zakutonthola iwo asabisala mʼmabenga a mpanda,
Mbwenye dzuwa ingagaka, iwo asamburuka mbaenda kutali;
Pontho nkhabe anadziwako kunaenda iwo.
18 Iwe mambo wa Asirya, akumbizi ako akuodzira;
Atsogoleri ako ali nawa-nawa mʼmanyumba mwawo.
Mbumba yako yabalaliswa mʼmapiri,
Pontho nkhabe anaigumanya.+
19 Nyatwa ingakugwera, nkhabe munthu anafuna kukubalangaza.
Cironda cako nkhabe pola.
Anthu onsene anafuna kubva mphangwa thangwi ya iwe anadzaimba manja;+
Mbani adakhonda thabuka ndzidzi onsene thangwi ya pyakuipa pikhacita iwe?”+
Dzina ineyi isabveka “Nyakubalangaza.”
Peno: “asatsalakana.” Fala na Fala: “asadziwa.”
Fala na Fala: “mbuto yace.”
Peno: “pyakumwa pyakuledzeresa pyakucitwa na tirigu.”
Unoyu ndi Yuda.
Unoyu ndi Asirya.
Peno: “madzimunthu akunyunguluswa.”
Peno: “templo.”
Unoyu ndi Ninive.
Fala na Fala: “Wangisani pyunu pyanu.”
Panango unoyu ndi mambo wa ku Asirya.
Peno: “inadzagomolwa.”
Unoyu ndi Ninive.
Unoyu ndi Tebha.
Fala na Fala: “aphedzi ako.”
Fala na Fala: “mʼmphambano zonsene za miseu.”