MIKEYA
1 Mu ntsiku za Yotamu,+ Ahazi+ na Ezekiya,+ amambo a ku Yuda,+ Yahova alonga na Mikeya*+ wa ku Moreseti mʼmasomphenya. Mʼmasomphenya anewa, iye alonga thangwi ya Samariya na Yerusalemu:
2 “Bveserani imwe mbumba zonsene,
Iwe dziko yapantsi na monsene munakhala mwenemo, bveserani mwadidi,
Yahova Mbuya Wankulu Kakamwe mbakutongeni,+
Yahova mbakutongeni kubulukira mu templo yace yakucena.
3 Onani! Yahova ali kubuluka pa mbuto inakhala iye;
Iye anadzatcita mbafamba padzulu pa mapiri a pa dziko yapantsi.
4 Mapiri anadzanyunguluka pantsi pa manyalo ace,+
Pontho magowa anadzagawika pakati,
Anadzanyunguluka ninga upula* wakuikhwa pa moto,
Ninga madzi akuti akukhuthulwa pantsi.
5 Pyenepi pyonsene pinadzacitika thangwi ya kundisandukira kwa Yakobe,
Thangwi ya madawo a nyumba ya Izraeli.+
Mbani adacitisa kuti Yakobe andisandukire?
Si anthu a ku Samariya tayu?+
Pontho mbani adacitisa kuti Yuda akhale na mbuto zaulambiri?+
Kodi si anthu a mu Yerusalemu tayu?
6 Ndinadzacitisa Samariya kukhala nkuku wa madembe,
Mbuto toera kutceka miti ya mauva;
Ndinadzaponya* miyala yace nʼgowa,
Pontho ndinadzasiya pakweca mbuto zidalikhiswa iye.
7 Madzimunthu ace onsene akusemwa anadzagwandwa-gwandwa,+
Pontho miyoni yonsene ikhatambira iye thangwi ya ulukwali ukhacita iye, inadzapiswa na moto.+
Ine ndinadzafudza madzimunthu ace onsene.
Samariya akhala na pinthu pyenepi pyonsene thangwi ya kobiri idagumana iye pakucita ulukwali,
Pontho pinthu pyenepi pinadzakwatwa toera kuenda kalipa napyo maputa a ku mbuto inango.”
8 Na thangwi ineyi, ine ndinadzalira, mbandikhuwa;+
Ndinadzafamba wakusowa ntsapato, pontho cipezipezi.+
Kulira kwanga kunadzakhala ninga kwa anambwa a ntsanga,
Pontho kubulira kwanga kunadzakhala ninga kwa avestruji.
Muliri unoyu wamwazika mpaka pansuwo ukulu wa mbumba yanga, ku Yerusalemu.+
10 “Lekani kulonga pyenepi ku Gati;
Lekani kulira nee pangʼono pene.
Imwe anakhala ku Bheti-Afra,* bulumundani pa pfumbi.
11 Imwe anakhala ku Safiri, ndokoni cipezipezi, pontho mwamanyadzo.
Anthu anakhala ku Zaanana nee abuluka kunja.
Bheti-Ezeli ikhali mbuto yanu yakuthawira, mbwenye cincino kunadzabveka kulira basi.
12 Anthu anakhala ku Maroti akhadikhira pinthu pyadidi,
Mbwenye ndi pinthu pyakuipa pidabuluka kuna Yahova, mbapienda ku nsuwo ukulu wa Yerusalemu.
13 Imwe anthu anakhala ku Lakisi,+ mangirani ngolo zanu mʼmakavalo,
Madawo a mwana wankazi wa Sioni abulukira kuna imwe,
Thangwi adacitisa Izraeli kundisandukira ndimwe.+
14 Ndi thangwi yace pakupangana na Moreseti-Gati, iwe unadzampasa miyoni.
Mbumba ya ku Akizibhi+ yanyengeza amambo a Izraeli.
15 Imwe anthu anakhala ku Maresa,+ ine ndinadzakubwereserani nyamalwa wakuti asatapata pinthu pyonsene.+
Mbiri ya Izraeli inadzafika mpaka ku Adhulamu.+
16 Cingani mipala, pontho cingani tsisi yonsene ya mʼmanungo mwanu thangwi nyatwa zinadzagwera ananu amuna anafuna imwe.
Cingani mipala mbamukhala ninga capungu,
Thangwi iwo aendeswa ku ubitcu, kutali kakamwe na imwe.”+
2 Dzedze kuna ale ananyerezera kucita pyakuipa,
Ale ananyerezera pyakuipa patalimba pawo!
Kunja kungaca iwo asacita pikhanyerezera iwo,
Thangwi iwo ali na mphambvu yakucita pyenepi.+
2 Iwo asafuna minda, mbaikwata;+
Pontho iwo asafuna nyumba mbazikwata;
Iwo asanyengeza munthu mbankwatira nyumba yace,+
Pontho asanyengeza munthu toera kunkwatira unthaka wace.
3 Natenepa, ipi ndi pidalonga Yahova:
‘Ine ndikunyerezera kubweresa nyatwa+ kuna imwe, nyatwa yakuti nee munaithawa.*+
Imwe nee munadzafambabve mwakugaya,+ thangwi unadzakhala ndzidzi wa nyatwa.+
4 Pa ntsiku ineyi, anthu anadzalonga nsangani thangwi ya imwe,
Pontho anadzalira mwakutsukwala kakamwe thangwi ya imwe.+
Iwo anadzalonga: “Ife tamala kusakazwa!+
Iye akwata pinthu pya mbumba yathu mbapipasa mbumba inango, iye atikwatira pinthu pyathu!+
Iye akwata minda yathu mbaipasa anthu akuti nee asamulambira.”
5 Na thangwi ineyi, pa mpingo wa Yahova nkhabe kudzaoneka munthu wakuti anaphatisira nkhambala yakupima nayo,
Toera kugawa dziko.
6 Mbwenye iwo asalonga: “Lekani kumwaza mphangwa.
Lekanibve kulonga pinthu ninga pyenepi;
Ife nee tinapasika manyadzo!”
7 Imwe dzindza ya Yakobe, pinalonga iwo ndi ipi:
“Kodi nzimu wa Yahova wacimwana kupirira?
Macitiro ace ndi anewa?”
Kodi mafala anga nee asaphedza ale anacita pinthu mwakulungama?
8 Mbwenye mwakukhonda dembuka mbumba yanga yandisandukira ninga nyamalwa.
Mwakusowa manyadzo, imwe mwabulusa pyakubalikisa napyo
Pa nguwo za ale anafamba mwacinyindiro ninga abuluka kunkhondo.
9 Akazi a mbumba yanga, imwe musaathamangisa nʼnyumba zawo zakubalika;
Kwenda na kwenda imwe musabulusa mbiri yanga kuna anawo.
10 Lamukani, pontho ndokoni, thangwi mu dziko ino nkhabemo mbuto toera kupuma,
Pontho nakuti iyo nee ndi yakucena,+ inadzafudzwa, kufudzwa kukulu kakamwe.+
11 Munthu angacita pinthu pyakusowa basa mbanyengezeka, pontho mbalonga uthambi uyu:
“Ine ndinadzamwaza mphangwa zinalonga pya vinyu na pyakumwa pyakuledzeresa,”
Unoyu ndi mʼmwazi mphangwa wadidi kuna mbumba iyi!+
12 Iwe Yakobe, ine ndinadzakugumanyani monsene;
Mwakukhonda penula, ine ndinadzagumanya ale anafuna kusala a Izraeli.+
Ine ndinadzakucitisani kuti mukhale pabodzi pene, ninga mabira nʼthanga,
Ninga nkumbi wa mabira wakuti uli pa mbuto inadyeserwa pifuyo;+
Penepo panadzabveka mikhuwo ya anthu azinji.’+
13 Ule anaphola benga pa pfufu anadzaatsogolera;
Iwo anadzaphola benga pansuwo ukulu, mbabuluka na penepo.+
Mambo wawo anadzaenda patsogolo pawo,
Pontho onsene anadzatsogolerwa na Yahova.”+
3 Ine ndalonga: “Ndaphata miyendo, bveserani imwe atsogoleri a dzindza ya Yakobe,
Pontho imwe atongi a dzindza ya Izraeli.+
Kodi simwe tayu akhafunika kucita pinthu pyakulungama?
2 Mbwenye imwe musaida pinthu pyadidi+ mbamufuna pinthu pyakuipa;+
Imwe musabulusa khanda ya mbumba yanga na nyama ya magogodo awo.+
3 Pontho musadya nyama ya mbumba yanga+
Mbamubulusa khanda yawo,
Musaswa magogodo awo, mbamuanyedza-nyedza,+
Ninga magogodo na nyama yakuti isaphikwa ncikalango.*
4 Unadzafika ndzidzi wakuti iwo anadzacemera Yahova toera kuphemba ciphedzo,
Mbwenye iye nee anadzaatawira.
5 Ipi ndi pinalonga Yahova kuna aprofeta anapeusa mbumba yanga,+
Akuti asakhazikisa ntendere+ angakhala na cinthu toera kutafuna* na mano awo,+
Mbwenye asamenyana na ale anakhonda kuikha cinthu pamulomo pawo:
6 ‘Imwe munadzakhala ncidima ninga namasiku;+ pontho nee munadzaona masomphenya;+
Imwe basi ene munadzaona cidima, imwe nee munadzacitabve pyakulotera.
Kuna aprofeta dzuwa inadzabira,
Pontho masikati anadzakhala cidima kuna iwo.+
7 Anyakuona masomphenya anadzapaswa manyadzo,+
Pontho anyakulotera anadzaphatiswa mwala.
Iwo onsene anadzafunga milomo yawo,
Thangwi Mulungu nee anadzaatawira.’”
8 Mbwenye ine ndiri na mphambvu zizinji thangwi ya nzimu wakucena wa Yahova,
Iwo usandiphedza toera ndicite pinthu mwaulungami, pontho mwacipapo,
Toera kupanga Yakobe kukhonda kwace kubvera, pontho toera kupanga Izraeli madawo ace.
9 Ndaphata miyendo, bveserani imwe atsogoleri a dzindza ya Yakobe,
Pontho imwe atongi a dzindza ya Izraeli.+
Imwe munaida ulungami, pontho imwe munagongonyesa pinthu pyonsene pyakulungama,+
10 Musapha anthu toera kumanga Sioni, pontho musaphatisira kusowa ulungami toera kumanga Yerusalemu.+
Ngakhale tenepo iwo asanyerezera kuti asanyindira Yahova mbalonga:
“Kodi Yahova nee ali na ife?+
Nkhabe nyatwa inafuna kutigwera.”+
12 Natenepa thangwi ya imwe,
Sioni anadzalimwa ninga munda,
Nzinda wa Yerusalemu unadzafudzwa mbusala madembe,+
Pontho phiri ya panyumba ya Mulungu inadzakhala ninga nthunda yakuti iri mu nsitu.+
4 Mu ntsiku zakumalisa,
Phiri idamangwa nyumba ya Yahova,+
Inadzakhazikika mwakuwanga padzulu pa mapiri anango,
Iyo inadzakhala yakulapha kupiringana nthunda zonsene,
Pontho anthu anadzaenda paphiri ineyi.+
2 Madzindza mazinji anadzabwera, mbalonga:
“Bwerani, tendeni tikwire paphiri ya Yahova,
Na panyumba ya Mulungu wa Yakobe.+
Iye anadzatipfundzisa njira zace,
Pontho ife tinadzafamba munjira zenezi.”
Thangwi mwambo unadzabuluka* ku Sioni,
Pontho mafala a Yahova anadzabuluka ku Yerusalemu.
3 Iye anadzakhala ntongi wa mbumba zizinji,+
Pontho iye anadzasasanyira pinthu pyakuti nee piri mwadidi pa madzindza amphambvu akutali.
Iwo anadzafula* masupada awo toera akhale pyakulima napyo,*
Pontho anadzafula madipa awo toera akhale pyakusadza* napyo.+
Nkhabepo mbumba inadzafuna kukwata supada toera kumenyana na inango,
Pontho iwo nkhabe kudzapfundzabve nkhondo.+
4 Mʼbodzi na mʼbodzi wa iwo anadzakhala pantsi pamuti wace wa mauva, pontho pantsi pamuti wace wa nsambvu,+
Nkhabe munthu anafuna kudzaagopesa,+
Thangwi adalonga pyenepi ndi Yahova wa anyankhondo.*
5 Thangwi madzindza onsene anadzafamba mu dzina ya alungu awo,
Mbwenye ife tinadzafamba mu dzina ya Yahova Mulungu+ wathu kwenda na kwenda.
6 Yahova alonga: “Pa ntsiku ineyi,
Ndinadzacemeresa ale akhatcikama,
Pontho ndinadzagumanya ale adabalalika,+
Kuphatanizambo ale adatcunyusa ine.
7 Ine ndinadzacitisa kuti ale akhatcikama, akhale nsoka wa anthu anafuna kusala,+
Pontho ndinacitisa ale adaendeswa kutali kukhala dzindza yamphambvu;+
Pontho Yahova anadzaatonga ninga mambo wawo Paphiri ya Sioni,
Kutomera cincino mpaka kwenda na kwenda.
8 Iwe nyumba yandzulu ya nyakuonera mabira,
Phiri ya mwana wankazi wa Sioni,+
Utongi wakutoma unadzabwerera kuna iwe, inde unadzabwerera kuna iwe,+
Umambo wa mwana wankazi wa Yerusalemu.+
9 Thangwi yanji iwe uli kukhuwa?
Nee uli na mambo,
Peno phungu wako afa?
Kodi ndi pyenepi pinakucitisa kubva kupha ninga kunabva nkazi pakubala?+
10 Iwe mwana wankazi wa Sioni, pfukunyuka mbukhuwa
Ninga pinacita nkazi wakuti ali kubala,
Thangwi cincino iwe unadzabuluka mu nzinda mbuenda kakhala ntsanga.
Unadzaenda mpaka ku Bhabhilonya,+
Pontho kweneko iwe unadzaombolwa;+
Kweneko Yahova anadzakupulumusa mʼmanja mwa anyamalwa ako.+
11 Cincino madzindza mazinji anadzabwera toera kumenyana na iwe;
Iwo analonga: ‘Tendeni tinfudze,
Pontho maso athu mbaone pyenepi mbapikacitika kuna Sioni.’
12 Mbwenye iwo nkhabe dziwa manyerezero a Yahova,
Iwo nkhabe kubvesesa pinafuna iye;
Thangwi iye anadzaagumanya ninga misumbu ya tirigu yakumala kwene kugwandwa yakuti iri pa mbuto yakububudira pinthu.
13 Iwe mwana wankazi wa Sioni lamuka, pontho bubuda tirigu;+
Thangwi ine ndinadzacinja nyanga zako mbazikhala za utale,
Pontho ndinadzacinja nyondo zako mbazikhala za nkuwa,
Pontho iwe unadzanyedza-nyedza mbumba zizinji za anthu.+
Iwe unadzapereka kuna Yahova mpfuma zidaba iwo,
Pontho pinthu pyawo unadzapipereka kuna Mbuya wandimomwene wa pa dziko yonsene yapantsi.”+
Na ndodo, iwo asaphekesa nkhope ya nyakutonga miseru wa Izraeli.+
Ndiwe nzinda ungʼono kakamwe pakati pa mizinda ya Yuda,
Mwa iwe munadzabuluka ule wakuti anadzakhala ntongi wa Izraeli, wakuti anadzacita pinafuna ine,+
Iye akhalipo kutomera kale kakamwe, kutomera mu ntsiku zakale.
3 Natenepa Mulungu anadzaasiya
Mpaka ndzidzi wakuti ule adasala pangʼono toera kubala, abale.
Pontho abale ace anango onsene anadzabwerera kuna mbumba ya Izraeli.
4 Iye anadzalamuka mbakumbiza mabira na mphambvu za Yahova,+
Pontho na utongi wa dzina ikulu ya Yahova Mulungu wace.
Iwo anadzakhala mwakutsidzikizika,+
Thangwi ukulu wace unadzafika mpaka kunkhomo kwa dziko yapantsi.+
5 Pontho iye anadzabweresa ntendere.+
Asirya angabwera mbapita mu dziko yathu, mbaponda-ponda nyumba zathu za ndzulu za citsidzikizo cakuwanga,+
Ife tinadzatumiza akumbizi anomwe, inde, atsogoleri asere a anthu toera kuenda kamenyana nawo.
6 Iwo anadzatcunyusa dziko ya Asirya na supada,+
Pontho anadzafungira miseu yonsene ya dziko ya Nirodhi.+
Ntongi unoyu anadzatipulumusa mʼmanja mwa Asirya,+
Iye anadzacita pyenepi Asirya angapita mu dziko yathu mbaponda mataka a cisa cathu.
7 Ale anafuna kusala a Yakobe anadzakhala pakati pa mbumba zizinji
Ninga bume yakubuluka kuna Yahova,
Ninga madzi anabvumba kuna pinthu pidamera
Akuti nkhabe kunyindira munthu
Peno kudikhira ana a anthu.
8 Ale anafuna kusala a Yakobe anadzakhala pakati pa madzindza,
Pakati pa mbumba zizinji,
Ninga nkhalamu pakati pa pikala pya ntsanga,
Ninga nkhalamu ingʼono pakati pa mikumbi ya mabira,
Yakuti isapita, isapomokera mbikhwedzula-khwedzula;
Pontho nkhabe anafuna kuapulumusa.
9 Iwe unadzakunda anyamalwa ako,
Pontho anyamalwa ako onsene anadzafudzwa.”
10 Yahova alonga: “Pa ntsiku ineyi,
Ine ndinadzapha makavalo pakati panu, pontho ndinadzafudza ngolo zanu za nkhondo.
11 Ine ndinadzafudza mizinda yonsene ya mu dziko mwanu,
Pontho ndinadzafudza mbuto zanu zonsene za citsidzikizo cakuwanga.
12 Ine ndinadzamalisa pya ungʼanga pinacita imwe,
Pontho pakati panu nkhabe kudzagumanika anyakucita pyakulotera.+
13 Ine ndinadzafudza madzimunthu adacita imwe na mizati yakulambira iri pakati panu,
Pontho imwe nee munadzagodamirabve pinthu pidacita imwe.+
15 Mwakuipirwa, pontho mwaukali, ine ndinadzabwezera pyakuipa
Madzindza adakhonda kundibvera.”
6 Ndaphata miyendo, bveserani pinalonga Yahova.
Lamukani, ndokoni mukalonge nseru wanu kuna mapiri,
Pontho nthunda mbizibve pinthu pinalonga imwe.+
2 Imwe mapiri, bveserani nseru uli na Yahova kuna mbumba yace,
Imwe miyala yakuwanga ya pa dziko yapantsi bveserani,+
Thangwi Yahova ali na nseru na mbumba yace.
Bveserani pinthu pinalonga iye kuna mbumba yace Izraeli:+
3 “Mbumba yanga, ndakucitiraninji?
Ine ndacitanji toera kukunetesani?+
Ndaphata miyendo, nditawireni.
4 Thangwi ine ndakubulusani mu dziko ya Ejitu,+
Pontho ndakubulusani mu dziko ikhali imwe mabitcu;*+
Ine ndakupasani Mose, Aroni na Miriya toera akutsogolereni.+
5 Ndaphata miyendo mbumba yanga, kumbukani pikhafuna kucita mambo Bhalaki wa ku Moabhe,+
Pontho kumbukani ntawiro udapereka Bhalamu mwana wa Bheori kuna iye+
Kumbukanimbo pire pidacitika ku Sitimu+ mpaka ku Jiligale+
Toera mudziwe pinthu pyakulungama pinacita Yahova.”
6 Ndinakwatanji pakuenda kaonana na Yahova?
Pontho ndinakwatanji pakuenda kagodamira Mulungu wanga anakhala kudzulu?
Kodi ndinenda kuna iye na ntsembe zakupiswa,
Na ana a ngʼombe a caka cibodzi?+
7 Kodi Yahova anakomerwa na pikwi pizinji pya mabira,
Na mafuta mazinji?+
Ndinapereka mwananga wakutoma thangwi yakusandukira kwanga,
Kodi ndinadzapereka mwananga thangwi ya madawo anga?+
8 Iye akupanga kuti ndi pipi pinthu pyadidi.
Kodi Yahova asafuna kuti ucitenji?
9 Fala ya Yahova yabveka mu nzinda;
Anthu audziwisi anadzagopa dzina yace.*
Bveserani pinalonga ndodo na ule adaikhazikisa.+
10 Kodi mpfuma idagumanywa thangwi yakucita pinthu pyakuipa iciripo nʼnyumba ya munthu anacita pyakuipa,
Na nʼdida wakupungulwa wa efa* wakuti ndi wakunyanyasa?
11 Kodi ndinakhala wakucena* ndingakhala na bhalansa yauthambi,
Na miyala yakupima nayo yakunyengeza?+
12 Thangwi anthu ace akupfuma adzala na uphanga,
Pontho anthu anakhala mwenemo asalonga uthambi;+
Iwo asalonga pinthu pyauthambi na mulomo wawo.+
13 “Natenepa ine ndinakumenya mbandikuphekesa,+
Mbandikusiya wamala kufudzika thangwi ya madawo ako.
14 Iwe unadzadya, mbwenye nee unadzakhuta;
Iwe unadzapitiriza kukhala na njala.+
Iwe unadzayesera kubisa mpfuma yako pa mbuto yadidi mbwenye nee unadzakwanisa kuitsidzikiza.
Pire pinafuna iwe kukwata ndinadzacitisa kuti anyamalwa ako apifudze.
15 Iwe unadzabzwala mbeu, mbwenye nee unadzabvuna.
Unadzakamula misapo ya miti ya milivera, mbwenye mafuta ace nee unadzaadya;
Unadzakamula mauva, mbwenye nee unadzamwa vinyu yace.+
16 Thangwi imwe musatowezera ntemo wa Omiri na misambo yonsene ya panyumba ya Akabu,+
Pontho musacita pinthu mwakubverana na uphungu wace.
Ndi thangwi yace ine ndinadzakutcunyusani,
Anthu anadzadzuma thangwi ya pinthu pinafuna kudzakucitirani ine;+
Pontho imwe munadzapirira kupwazwa kunafuna imwe kucitwa na mbumba.”+
7 Dzedze kuna ine! Ine ndakhala ninga munthu wakuti
Nee asagumana mauva toera kudya,
Pontho nee asagumana masambvu akutapira anafuna iye,
Anthu angamala kutcoda misapo ya mu ndzidzi wa malimwe,
Pontho angamala kusaka mauva adasala mu ndzidzi wakubvuna.
Nkhabepo anakhonda kutandira ndzace panjira toera kumupha.+
Mʼbodzi na mʼbodzi asateya ukonde* toera kumanga mʼbale wace.
3 Manja awo asadziwa mwadidi kucita pinthu pyakuipa;+
Ntsogoleri asapanga anthu toera ampase miyoni,
Nyakutonga miseru asaphemba kulipwa,+
Munthu wakubvekera asalonga pinafuna iye,+
Pontho iwo asacita pabodzi pene masasanyiro anewa.
4 Wadidi kakamwe pakati pawo asakhala ninga minga,
Munthu wakulungama kakamwe pakati pawo, ndi wakuipa kakamwe kupiringana mpanda wa minga.
Inadzafika ntsiku idalonga anyakuonera anu, pontho inadzafika ntsiku yakutongwa kwanu.+
Penepo onsene anadzasowa cakucita thangwi yakugopa.+
5 Lekani kukhulupira andzanu,
Peno kunyindira axamwali anu a ponda-ndipondembo.+
Cita mphole-mphole na pinthu pinalonga iwe kuna nkazi anafuna iwe.
6 Thangwi mwana wamamuna asapwaza babace,
Mwana wankazi nkhabe kubverana na mai wace,+
Pontho nkwenya nkhabe kubverana na mebzwalace;+
Anyamalwa a munthu ndi anthu a panyumba pace.+
7 Mbwenye ine, ndinapitiriza kuyangʼanira mbandidikhira Yahova.+
Ndinadikhira mwakupirira kuna Mulungu wacipulumuso canga.+
Mulungu wanga anadzandibva.+
8 Iwe nyamalwa* wanga, leka kukomerwa thangwi ine ndiri pa nyatwa.
Maseze ine ndagwa, ndinadzalamuka;
Maseze ine ndisakhala ncidima, Yahova anadzakhala ceza canga.
9 Ine ndinadzapirira ukali wa Yahova
Mpaka iye akhale kukhundu yanga, mbandicitira ulungami
Thangwi ine ndanʼdawira.+
Iye anadzandiendesa pa ceza,
Pontho ine ndinadzaona ulungami wace.
10 Nyamalwa wanga anadzaonambo pyenepi,
Pontho anadzaphatwa na manyadzo nkazi ule analonga kuna ine kuti:
“Ali kupi Yahova Mulungu wako?”+
Maso anga anaona nkazi unoyu.
Iye anadzapondwa-pondwa ninga matope a nʼnjira.
11 Ineyi inadzakhala ntsiku yakumanga mpanda wanu wa miyala;
Pa ntsiku ineyi, madire a dziko yanu anadzathimizirwa.
12 Pa ntsiku ineyi anthu anadzabwera kuna iwe
Bulukira ku Asirya na ku mizinda ya Ejitu,
Bulukira ku Ejitu mpaka ku Nkulo;*
Bulukira ku bara mpaka ku bara, pontho bulukira kuphiri ibodzi mpaka kuphiri inango.+
13 Dziko ineyi inadzakhala madembe thangwi ya anthu anakhala mwenemo,
Pyenepi pinadzacitika thangwi ya pinthu pidacita iwo.
14 Imwe Mulungu, ndaphata miyendo, kumbizani mbumba yanu na ndodo yanu, kumbizani nkumbi wa mabira wakuti ndi unthaka wanu,+
Nkumbi wakuti ukhali okhene mu nsitu, pakati pa miti ya misapo.
Iwo mbadye ku Bhasani na ku Jiliyadhi+ ninga pikhacita iwo kale.
15 “Ninga pidacitika mu ntsiku zikhabuluka imwe mu dziko ya Ejitu,
Ine ndinadzakuonesani pinthu pyakudzumisa.+
16 Madzindza anango anadzaona, mbakhala na manyadzo mwakukhonda tsalakana mphambvu zawo.+
Iwo anadzaikha manja pamulomo pawo;
Makutu awo anadzafungika.
17 Iwo anadzanyanguta pfumbi ninga nyoka;+
Ninga pinthu pinafamba na pfufu ya mimba pa dziko yapantsi, iwo anadzabwera mbakatetemera buluka mʼmbuto zinabisala iwo.
Iwo anadzabwera kuna Yahova Mulungu wathu mbakagopa,
Pontho iwo anadzakugopani.”+
18 Mbani Mulungu wakulandana na imwe,
Wakuti asalekerera madodo na madawo+ a ale adasala a unthaka wace?+
Iye nee anadzakhala wakuipirwa kwenda na kwenda,
Thangwi asakomerwa na kupangiza ufuni kuna mbumba yace.+
19 Iye anadzatibvera pontho ntsisi;+ iye anadzakunda madodo athu.
Madawo awo onsene imwe munadzaaponya pa mbuto yakuzika kakamwe ya bara.+
20 Imwe munadzapangiza kukhulupirika kwanu kuna Yakobe,
Pontho munadzapangiza ufuni wandimomwene kuna Abhrahamu,
Ninga pidadumbira imwe kale kuna ambuyathu.+
Ineyi ndi dzina yacigwagwa ya Mikayeli (dzina ineyi isabveka “Mbani Adalandana na Mulungu?”) peno Mikaiya (dzina ineyi isabveka “Mbani Adalandana na Yahova?”).
Panango unoyu ndi upula unacitwa na nyuci toera kukoya uci. Upula unoyu nkhabe nentsa kunyunguluka.
Fala na Fala: “Ndinadzakhuthula.”
Peno: “nyumba ya Afra.”
Fala na Fala: “nee munadzabulusa makhosi anu.”
Peno: “ncikalango ca mulomo ukulu.”
Munjira inango: “mu ndzidzi unaluma iwo.”
Peno: “parata.”
Peno: “citsogolero cinadzabuluka.”
Peno: “anadzasanduza.”
Peno: “pyakusindula napyo.”
Peno: “pyakusaira.”
Fala na Fala: “udalonga pyenepi ndi mulomo wa Yahova wa anyankhondo.”
Onani Mabvekero a Mafala Anango.
Fala na Fala: “nyumba ya mabitcu.”
Fala na Fala: “dzina yanu.”
Onani Apendise B14.
Peno: “wakusowa mulando.”
Peno: “amalapo.”
Peno: “malitcera akusodza nawo ntsanga.”
Mucihebheri fala yakuti “nyamalwa” isalonga pya nkazi.
Unoyu ndi nkulo wa Eufrate.