Dandamen Kuwanish Maswir Mey ma mu Spiritu

1. Maswir ik mamwing ma pakampwil matutangay nich Yehova? (Mateu 5:3)

YEHOVA wayitanga antu ni maswir kanang ma pakampwil. Chilakej, mulong wa kwikal ni mwom, tukwet kuswir kwa yakuda, ya kudjal ni ndond ya kushakam. Anch twaburen chom chimwing pakach pa yom yiney ap mu chisu chikemp kwau, mwom wetu ukutwish kukasikan. Kudoshaku kututang ni maswir ma ku mujimbu, Yehova watutanga kand ni maswir ma mu spiritu. (Tang Mateu 5:3.) Chawiy anch tukimbin kwikal ni musangar wakin, tufanyidin kushinshikin maswir minam ni kumawanish.

2. Let chilakej chimekeshina kurumburik kwa mazu “[kwikal] ni kuswir kwa yom ya Nzamb.”

² Chirumburikin ik “[kwikal ni] kuswir kwa yom ya Nzamb”? Mazu ma Grek masadinau pinap maletin chitongijok cha mwin kwitol yom ya mu spiritu. Mazu minam maletin chitongijok mu manang cha muntu witina. Tongin muntu uumina udjita yinzany ni ushicha kwi njil. Uziyin ku mujimbu mulong kakwetap yakuda, amupipejin mulong wa mutapu uday, ujingidin pa muten, ni uchuku uding kwend mu mashik. Muntu winou wij anch ukwet kuswir kwa ukwash mulong wa kudandamen kwikal mwom ni kwikal ni usu. Mutapu umwing kand, muntu ukweta kuswir kwa yom ya Nzamb​—ap anch mwin kwitol yom ya mu spiritu—​ukwet kuswir kwa ukwash mulong wa kuswimp mashakamin mend. Chawiy ukwet impu ya kutaninamu mu yakuda ya mu spiritu yipaninay Yehova kud antu amukatina Ndiy.

3. Yom ik tukwisambina mu mutu wa mulong winou?

³ Mu mutu wa mulong winou, tukuman yom tukutwisha kwilejin ku chilakej cha mband Mwin Fenisiy wamwita Yesu ukwash. Rusang riner rimekeshin mikadil yiwamp yisatu yifanyidinau kukudish antu awonsu akweta kuswir kwa kuwanish maswir mau ma mu spiritu. Kupwa, tukwisambin chilakej cha Paul, cha Pita ni cha Mwant David, amakundj ading aswila mu spiritu.

CHILAKEJ CHA KWIKEPISH, CHA KULIK KUZIY NI CHA RITIY

4. Mband Mwin Fenisiy wading ukatin anch Yesu amusadin ik?

⁴ Dichuku dimwing, mband umwing Mwin Fenisiy wamusejina Yesu. Mwanend changadim wading ni ‘chilembil wamumeshang mar nakash.’ (Mat. 15:21-28) Mband winou wasa manungun ni wamwilembina Yesu chakwel amukwash. Pamusejinay Yesu, mband winou wamekesha mikadil ya usey nakash. El tuyishinshikinany.

5. Mikadil ik yiwamp yamekeshay mband Mwin Fenisiy, ni yom ik yamusadinau kud Yesu? (Tal kand chipich.)

⁵ Mband Mwin Fenisiy wamekesha kwikepish kwakin. Mulong wak tulondina mwamu? Mulong kajimanap kukwatijan ni mutapu wamwakulau kud Yesu, pamufanakeshay ni mwan wa kabu pa ndond pa kumufanakesh ni muntu wakad kwikal Mwin Yuda. Ang wading ey, yom ik wafanyina kusal? Ov, wafanyina kwiyov anch akusaal kal ni kulik kumwit ukwash? Mband Mwin Fenisiy wading mwin kwikepish, pakwez wasala kand chom chikwau; wadandamena kumwit Yesu ukwash. Yom ik yamubachika kusal mwamu? Wading ni ritiy muday Yesu. Ritiy ra mband winou ramubachika Yesu kusal chom kanang mulong wa kumukwash. Ap anch walonda anch amutuma pa mangand mulong wa kuyikwash ching kusu “amikoku ashadikina kal a muchid wa Isarel,” Yesu wadosha chilembil wadingay nich mband winou wa muchid ukwau.

6. Yom ik twilejidina ku rusang ra mband Mwin Fenisiy?

⁶ Mulong wa kuwanish maswir metu ma mu spiritu, tufanyidin niyetu kukudish mikadil mud yiney. Tufanyidin kwikal ikepishina, in kujijaman, ni akweta ritiy rikash. Ching kusu muntu wikepishina ndiy ukutwisha kudandamen kumwit Nzamb ukwash. Tufanyidin kand kwikal ni ritiy rikash muday Yesu Kristu ni kuyichingejin antu asadidinay mulong wa kuyitakel in kwilej end. (Mat. 24:45-47) Yehova ni Mwanend akatining kuwanish maswir ma mu spiritu ma antu amekeshina mikadil yiney. (Ilakej ni Yakobu 1:5-7.) El tushinshikinany chad mutapu ukatay Yehova kutwinkish yakuda ya mu spiritu, ya kudjal ya mu spiritu, ni ndond ya kwichidijin mu spiritu. Tukuman yom tufanyidina kusal mulong wa kutaninamu mu yom yiney kusutin kushinshikin chilakej cha kambuy Pita, kambuy Paul ni Mwant David.

MUD PITA​—DANDAMEN KUWANISH NAWAMP MASWIR MEY MA MU SPIRITU

7. Chisend ik chamwinkishau Pita, pakwez yom ik yikwau yading yikwetay kuswir kwa kusal? Rumburil. (Hebereu 5:14–6:1)

⁷ Tushinshikinany chilakej cha kambuy Pita. Wading pakach pa In Yuda a kusambish ajingunina anch Yesu wading Mesiya, muntu wading usadidinau kud Yehova mulong wa kuyilej Antwend “mazu makata kulet mwom wa chikupu.” (Yoh. 6:66-68) Kurutu kwa Yesu kuya mwiur, wamuleja Pita anch: “Dish amikoku am akemp.” (Yoh. 21:17) Pita wawanisha chisend chinech ni kushinshaman, ni Yehova wamusadina kand mulong wa kufund mikand yaad yida mu Bibil. Pakwez, Pita wading ukwet kand kuswir kwa kuwanish maswir mend ma mu spiritu. Chilakej, watanga mikand yipepidilau yasambelay kufund kambuy Paul. Pita wading wij anch yom yimwing yafunday Paul yading “yikasikena kutesh.” (2 Pita 3:15, 16) Pakwez Pita wadandamena kutang; wikala ni ritiy anch Yehova ukumukwash kusanger, ap kutesh ni kusadin “yakuda yikash” yamupepilau Paul kufund mu mikand yend.​—Tang Hebereu 5:14–6:1.

8. Yom ik yasalay Pita kupwa kwa mwangel wa Nzamb kumujingunin mutapu usu wa kutesh yom?

⁸ Pita wamekesha anch ukwet ritiy muday Yehova kusutin kuziyin ku umutakel watambulay. Chilakej, padingay ku chaw cha musumb wa Yopa, wamana mu chishimushimu mwangel wa Nzamb ukat kumulej kujip ni kuda annam ading ijondina kukwatijan ni Chijil cha Moses. Kud In Yuda, umutakel winou wadingap kamu uswapela kulimish, mulong ading ij anch chid chiyimp kusal mwamu. Kwinsambishin Pita wakula anch: “Nsalejam, bwat, mulong kand kal nidangangap chom ap chimwing chijondina ni chitakanena.” Kupwa mwangel wamuleja anch: “Lik kwel yom yashitwishinay kal Nzamb anch yijondin.” (Mid. 10:9-15) Pita wadoshinaku dilejan. Mutapu ik twija mwamu? Chisu chikemp mwamu kupwa kwa kuman chishimushimu, amakundj asatu atumau kud Korney muntu wa muchid ukwau, eza ni amwita Pita chakwel aya ambamb ni mwant wau. Mu uyakin, Pita kafanyinap kwitiy kwandam mu chikumbu cha muntu wakad kwikal Mwin Yuda. In Yuda ayimanang antu a michid yikwau anch ijondin. (Mid. 10:28, 29) Pakwez Pita witiya kapamp kamwing mutapu usu wa kutesh yom wamujinguninau kud Yehova. (Jnsw. 4:18) Wamuleja Korney pamwing ni antu a mu dijuku dend rusang ruwamp ni wova musangar nakash mulong awonsu itiya uyakin, atambula spiritu utumbila, ni ayibatisha.​—Mid. 10:44-48.

9. Kukudish maku ma yakuda ya mu spiritu kukat kutukwash mu mitapu ik yaad?

⁹ Mud mwasalay Pita, tufanyidin niyetu kwilej Dizu da Nzamb. Yisu ni yisu tufanyidin kutang yom yiswapela kutesh. Chitwitin kand kukudish maku ma kuda yakuda yikash—uyakin ukutwisha kwikal ukasikena kutesh. Tufanyidin kwikal ni kashinsh anch twitekidin chisu cha kutang nawamp Dizu da Nzamb. Ni chid kand cha usey kud etu, kwikasikesh kutesh nawamp yom yatukasikenang kutesh pakur. Mulong wak? Mulong kusal mwamu kukat kutukwash mu mitapu yaad: Cha kusambish, tukat kwilej yom piur pa Yehova yikata kutukwash kumukat ni kumulimish chipandakena; ni cha kaad, kusal mwamu kukat kutubachik kuyilej antu akwau piur pa Tatukwetu wa mwiur. (Rom 11:33; Kuj. 4:11) Chilakej cha Pita chitufundishin kand dilejan dikwau da usey: Anch kwikal kuswimp kanang mu mutapu wetu wa kutesh mu Dizu da Nzamb, tufanyidin kwikal aswapela kuswimp yitongijok ni yisal yetu. Ching anch twasal mwamu chad lel twatwish kudandamen kuwanish nawamp maswir metu ma mu spiritu ni kwikal asadidinau kud Yehova chisu chawonsu.

MUD PAUL—DANDAMEN KUDJAL WUNTU USU WA MU SPIRITU

10. Kukwatijan ni Kolosay 3:8-10, yom ik tufanyidina kusal mulong wa kumusangaresh Yehova?

¹⁰ Mulong wa kumusangaresh Nzamb, tufanyidin kusal usu wa kutaninamu mu yom yikwau yitwinkishinay: ya kudjal ya mu spiritu. Ov, chirumburikin ik? Kambuy Paul wafunda anch “djolany wuntu ukur” ni “djalany wuntu usu.” (Tang Kolosay 3:​8-10.) Chitin chisu ni kusal usu nakash mulong wa kudjal wuntu usu. Shinshikin chilakej cha Paul amwinend. Padingay nsand, wasala usu nakash mulong wa kwikal ni dilau da Nzamb. (Gal. 1:14; Filip 3:4, 5) Pakwez wading uburedin ronganyin rakin piur pa rutong ra Nzamb, chawiy tukutwish kulond anch wading kazwendj mu spiritu. Mulong kadingap kija malejan ma Kristu, wading mwin chibud ni yom yiney yamwikadisha “muntu wakad kalimish” wading ukweta mikadil yiyimp.​—1 Tim. 1:13.

11. Yom ik yafanyinay Paul kusal usu wa kuswimp? Rumburil.

¹¹ Kurutu ikala Mwin Kristu, Paul wading ni ujim nakash. Mukand wa Midimu urumburil anch wayijimena in kwilej a Yesu ni “wadandamena kuyifunyin . . . ni kukimb kuyijip.” (Mid. 9:1) Kupwa kwa kwikal Mwin Kristu, Paul wasala usu nakash mulong wa kudjol wuntu wend ukur. (Efes 4:22, 31) Ap mwamu, chisu chakanganyay kutanijan ni Barnabas, “kwalanka ujim.” (Mid. 15:37-39) Pa chisu chinicha, Paul kasalap yom yading yisotilay Nzamb anch asal. Pakwez wadandamena kusal usu mulong wa kwikal ni wuntu wading umusangareshina Yehova.​—1 Kor. 9:27.

12. Yom ik yamukwasha Paul kutwish kudjol wuntu wend ukur?

¹² Paul wading ukwet mutapu wa kudjol wuntu wend ukur ni kudjal wuntu usu, mulong kadingap kachingejidina pa usu wend amwinend. (Filip 4:13) Mud Pita, Paul wading uchingejidin “usu ukatay kupan Nzamb.” (1 Pita 4:11) Chikalap nchik mwamu, yisu yimwing Paul warumboka ni waziya. Pakwez paziyangay, watongijokinang pa yom yiwamp yamusadinau kud Tatukwend wa mwiur, ni chinech chamwinkisha kutakaman kwa kusal usu wa kuswimp ni kumusangaresh Yehova.​—Rom 7:21-25.

13. Mutapu ik tukutwisha kumwimburij Paul?

¹³ Tukutwish kumwimburij Paul kusutin kwijik anch chikalap nchik mivu twasadina kal mu mudimu wa Yehova, tufanyidin kudandamen kusal usu wa kudjol wuntu ukur ni kudjal wuntu usu—yawiy yiney ya kudjal ya mu spiritu yikatay kutwinkish Yehova. Anch tukwet ulim kanang—mud ujim ap chaku cha kulondan yom yiyimp—tufanyidinap kutong anch tukutwishap kumusangaresh Yehova ap pakemp. Tufanyidin kukwat mupak wa kudandamen kuswimp yisal yetu ni mutapu wetu wa kutong. (Rom 12:1, 2; Efes 4:24) Pakwez ap chisu tusadina mwamu, chid cha usey kuvurik uyakin ou: Chinyim ni masun machiminau kal kwau chakwel matuwanyin kapamp kamwing, etu tufanyidin kusal usu wa kuswimp chakwel masun ma mu spiritu makatay Yehova kutwinkish matuwanyin. Chid cha usey kuswimp mulong wa kwikal ni wuntu ukatinay Nzamb anch twikal nich.

MUD DAVID—DANDAMEN KWICHIDIJ MU SPIRITU

14-15. Mutapu ik ukatay Yehova kuyichidij antwend mu spiritu? (Kuseng 27:5) (Tal kand chibur.)

¹⁴ Mulong wa kwikal ni musangar wakin, tukwet kuswir kwa yom yikwau kudoshaku yakuda ya mu spiritu ni ya kudjal ya mu spiritu. Tukwet kand kuswir kwa ndond ya kwichidijin ya mu spiritu. Ov, ndond ik yiney, ni mutapu ik tukutwisha kwikal ni kashinsh anch tudandamedin kwikalamu?

¹⁵ Mwant David wisambina piur pa ndond ya kwichidijin ya mu spiritu yikatay kupan Yehova. (Tang Kuseng 27:5.) Yehova ukat kuyichidij antwend chakwel kangal chom kanang ap muntu kanang ashesha ritiy rau muday Ndiy. Mutapu ik ukatay kusal mwamu? Ushidinamu anch kwikil chom cha kujipan nich chikutwisha kuyisal nayimp. (Kus. 34:7; Isay 54:17) Ap anch Satan nau ayilembil end akwet usu nakash, kakutwishap kutushesh chikupu. Ap anch ashesh mwom wetu, Yehova ukutuchirishinau kand pakutuvumbulay. (1 Kor. 15:55-57; Kuj. 21:3, 4) Yehova ukutukwash kand chisu turishina ni yakamish, chakwel tudandamen kumusadin ni kupandakan yovil yiyimp yikutwisha kuyipish urund wetu ni ndiy. (Jnsw. 12:25; Mat. 6:27-29) Tatukwetu wa rukat utwinkin kand dijuku da mu spiritu da akadivar nau anambaz akata kutukwash ni amakurump mulong wa kututakel. (Isay 32:1, 2) Anch twakumangan pamwing ku yikumangan, tukat kwilej mitapu yikwau tukutwisha kwikal akwashinau ni achidijinau kud Yehova.​—Heb. 10:24, 25.

16. Yehova wamuchidija David mu mitapu ik?

¹⁶ Mulong David wamuziyina Yehova, chawiy wamuchidija kusutin kumukwash kukwat mipak yiwamp ni kwikal ni musangar. (Ilakej ni Jinswir 5:1, 2.) Pakwez chisu chalikay David kumuziyin Yehova, kamuchidijap ku yibudikin yiyimp ya yisal yend. (2 Sam. 12:9, 10) Pakwez chid nchik pa yisu yamanay David mar pakad mulong? David wamuleja Yehova yakamish yend mu malembil, ni Yehova wamukasikesha David kusutin kumwinkish kashinsh anch umukatin ni umubangidin.​—Kus. 23:1-6.

17. Mutapu ik tukutwisha kumwimburij David?

¹⁷ Tukutwish kumwimburij David kusutin kumwit Yehova ukwash chisu tukimbina kukwat mipak. Tufanyidin kwitiyin anch, ang yisu yimwing turishin ni yikokujol, chidap mulong Yehova wakangeny kutukwash, pakwez chid mulong wa mipak yetu yiyimp twakwatina. (Gal. 6:7, 8) Ni anch twarish ni yikokujol pakad mulong, tufanyidin kumulej Yehova yakamish yetu mu malembil ni kwikal ni kashinsh anch ukulam michim yetu ni manang metu.​—Filip 4:6, 7.

DANDAMEN KUWANISH MASWIR MEY MA MU SPIRITU

18. Chikokujol ik turishina nich, ni mutapu ik tukutwisha kudandamen kuwanish maswir metu ma mu spiritu? (Tal kand yipich.)

¹⁸ Mutu wa mulong wa muvu wa 2026 ulondin anch: “Ayuk kwau antu akweta kuswir kwa yom ya Nzamb mu mwom wau.” Chid cha usey nakash kusal mwamu nlel. Mulong wak? Mulong nlel tushich nau antu avud akad musangar ni akad kwitiyin anch akwet maswir minam, ap akata kupakish kumawanish mu mitapu yau ayinau, kusutin marelijon ma makasu ap kusutin mafilozofi ma an a antu. Tufanyidinap kwitiy mutapu winou wa kutong wikal ni usu pad etu. Yom ik yikutwisha kutukwash kusal mwamu? Kusutin kuda yakuda ya mu spiritu yitwinkishinay Yehova, kudjal wuntu usu ni kulikidil chakwel Yehova atuchidij mu spiritu.