I najvažno odluka so šaj nekoj te anel la tani te del lafi e Jehovaske kaj ka služinel leske celo životo hem te ovel delo tari leskiri familija. O Jehova mangela sekova jekh amendar te kerel adava. Soske? Ov mangela ola te oven lea amala hem te živinen zasekogaš (5. Moj. 30:19, 20; Gal. 6:7, 8). Sepak, o Jehova nikas na čhivela silaja te služinel leske. Ov mukhela sekoj korkori te odlučinel so ka kerel. Ama so ako jekh krstimo hristijani phagela e Devleskoro zakoni adalea so kerela pharo grevo? Ako na kainela pe, ov mora te ovel cidimo taro sobranie (1. Kor. 5:13). Sepak, čak hem keda ka avel dži ko adava, o Jehova celo vilea nadinela pe kaj adava so grešingja ka iranel pe ki leste. Ustvari, adaja tani jekh važno pričina soske o Jehova dengja i otkupnina — te šaj te prostinel okolenge so kainena pe bašo pumare grevija. Amaro Devel kova soj pherdo mangipaja, ljubezno pottikninela okolen so grešingje te kainen pe (Zah. 1:3; Rim. 2:4; Jak. 4:8; w24.08 14, pas. 1-2).

Džikote o apostol Jovan završingja pišibaja plo trito pismo, nesave džene više širingje hovavne sikljojba hem kergje te ovel podelbe. Sepak, javera ponadari da živinena sine „sprema o čačipe“. Ola sine poslušna e Jehovaske hem živinena sine „sprema leskere zapovedija“ (2. Jov. 4, 6). Akala verna hristijanja radujngje na samo e Jovane nego hem e Jehova (Izr. 27:11). So šaj te sikljova? Ako siem verna e Jehovaske adava ka anel amenge radost (1. Jov. 5:3). Na primer, radosna siem bašo adava so džanaja kaj radujnaja e Jehova. Ov radujnela pe keda dikhela kaj na keraja o lošna bukja so isi ko sveto hem siem poslušna ko leskere zapovedija. O angelija da ko nebo radujnena pe (Luka 15:10). Amen da radujnaja amen keda dikhaja sar amare phralja hem phenja ačhovena verna (2. Sol. 1:4). A keda akava sveto ka ovel uništimo, ka šaj te ova radosna adaleske so ačhilem verna e Jehovaske čak ko sveto kolea so vladingja o Satana (w24.11 12, pas. 17-18).

Kobor vreme valjani te dikhe nekas angleder te vakere kaj sian zainteresirimo lake? Ako vakerea lake sigate, šaj te mislinel peske kaj anea sigate odluke bizo te razmisline (Izr. 29:20). Tari javer strana ako adžikerea but, šaj te mislinel peske kaj na sian odlučno, posebno ako halili kaj interesinea tut lake (Prop. 11:4). Ma bistre kaj angleder te vakere nekaske so osetinea, na valjani te ove sigurno kaj ka ženine tut laja. Sepak valjani te ove sigurno kaj sian spremno bašo brako hem kaj adaja ličnost šaj te odgovorinel tuke sar bračno partneri. Ama, so ako haljovea kaj nekoj tano zainteresirimo tuke? Ako tu na sian zainteresirimo lake, trudin tut adava jasno te sikave tle postapkencar. Nane ljubezno te kere o javer te mislinel kaj mangea te počmine vrska, a ustvari nane tut asavki namera (Ef. 4:25; w24.05 22-23, pas. 9-10).