“Jehová Diosqa manan qonqawasqachu”

ÑAWPAQPI KAWSASQAY:

Bilbao llaqtapin nacerqani, chayqa España naciopin kashan, tawa ñañakunan karqayku. Llapaykupas católico kaspan sapa p’unchay misaman riq kayku, 23 wataypi kashaspaymi profesora karqani. Chay ruwayqa anchatan gustawaq chaymi 40 wata chaypi llank’arqani. Chaymantapas Religiontan yachachiq kani, chay ruwayqa kusichiwaqmi, tardenkunatataq warmi wawakunata yachachiq kani primer comunionta ruwanankupaq.

12 watañan kusisqa qosaywan kawsasharqayku, 33 wataypi kashaqtiymi qosay wañukapurqan tawa wawayoqtataq saqewarqan. Qosay wañukapusqan qhepamanmi kay tapuyniykuna karqan: “Wañuymanta Jesús kachariwanchisña chayqa, ¿imaraykun wañushallanchis? Allin runakuna hanaq pachaman ripunku chayqa, ¿imaraykun Diospa Gobiernon hamunanta mañakunchis? Dios wañuqtinchis juzgawanchisña chayqa, ¿imaraykun hanaq pachamanta, purgatoriomanta, otaq infiernomanta lloqsinanchis juicio p’unchaypi juzgawananchispaq?”, nispa. Religionniyqa manan chay tapuykunaman kutichiwarqankuchu.

Askha sacerdotekunatan chhaynata tapurqani. Chaykunamanta hukninmi niwarqan: “Manan yachanichu, obispota tapukamuy. Diospi iñinkiña chayqa imapaqñataq tapukachakunki”, nispa. Chaywanpas yachaytan munarqani, chaymi Jesuita, Pentecostal, Gnóstico religonkunaman rirqani, ichaqa manan mayqenninkupas tapuniykunaman sut’itaqa kutichiwarqankuchu.

BIBLIAQ YANAPAYNINWAN CAMBIAPUNI:

60 más wataypi kashaqtiymi 7 watanpi huknin kaq alumnay invitawarqan Jehová Diospa testigonkunaq huñunakuyninman. Allinpaqña qhawarirqani chaypi uyarimusqayta rikusqayta chaypas, ruwanaykuna kasqanraykun manaña paykunawan tupapurqanichu. Iskay wata qhepamantaq Juanwan Maitewan predicawarqanku. Kinsa killan tapuyninkunata kutichiwarqanku chay qhepamanñan Biblia estudiayta qallarirqayku.

Ima hinaraqmi Testigokunata suyaq kani Bibliamanta yachachiwanankupaq. Imachus yachachiwasqanku cheqaqpuni kasqanta sut’inchanaypaqmi kinsa Bibliawan yanapachikurqani. Pisi tiempollapin repararqani creenciaykuna Bibliawan mana tupasqanta. ¡Askha watakunan pantasqa yachachikuykunapi iñirqani! Creesqaykunaqa huk sach’a hinan allin saphichasqa kasharqan chaytan saphinmantapacha horqopusharqanku, chaymi llakisqa kasharqani.

Qhepa qosaypas onqopuspan wañupullarqantaq. Chay tiempopin jubilakapurqanin hinaspan Bilbao llaqtamanta huk tiempo ripurqani. Juanpas esposanpas huk llaqtamanmi ripullarqankutaq, chaymi Biblia estudiayta saqepurqani. Bibliamanta yachasqaytan ichaqa qorita hinan qhawarirqani, manataqmi hayk’aqpas qonqarqanichu.

20 wata qhepamanmi 82 wataypi kashaqtiy Juanwan Maitewan Bilbao llaqtaman kutimurqanku. Paykunata rikuspayqa anchatan kusikurqani. Chaypin repararqani Jehová Dios manan qonqawasqanta, chaymi hukmanta paykunawan Bibliata estudiarqani. Paykunaqa pacienciawanmi sapa kuti kaq tapuyniykunaman kutichiwarqanku. Bibliaq yachachisqanta askha kutitan uyariyta munaq kani, chhaynapi ñawpaq creesqaykunata saqepunaypaq. Hinaspapas yachayta munarqani imaynatan amigoykunaman familiaykunamanpas cheqaq yachasqayta willanaypaq.

Jehová Diospa testigonkunaq hatun huñunakuyninpi 87 wataypi bautizakapurqani. Chay p’unchaypi anchata kusikurqani, llapa bautizakuqkunan huk sumaq discursota uyarirqayku, chaymi waqarqaniraq. Jehová Diospas rimapayawashanman hinan karqan. Bautizakusqay qhepallamanmi askha Testigokuna hamurqanku felicitawanankupaq manaña reqsiwarqankuchu chaypas.

KUNAN KAWSASQAY:

Yacharqaninpuni Jesús ‘ñan’ kasqanta (Juan 14:6). Biblia estudiasqaymi ichaqa yanapawarqan Jehová Diosta reqsinaypaq, Paymanmi Jesusqa pusawanchis. Kunanqa amigoyman munakusqay Taytaman hinan mañakuni. Acerquémonos a Jehováa librotan leesqaymi cambiawarqan. Qallariypiqa huk tutallapin llapanta leerqani, chaypin yacharqani Jehová Dios ancha khuyapayakuq kasqanta, chaymi kusichiwarqan.

Unay watakunan cheqaq kayta maskharqani, chaypi yuyaymanaspan Jesuspa nisqanta yuyarini: “Diosmanta mañakuychis qosunkichismi, maskhaychis tarinkichismi, waqyakuychis kicharimusunkichismi”, nispa (Mateo 7:7). Kunanqa tariniñan tapukuyniykunaq kutichiyninta, chaytan hukkunaman willashani.

90 wataypiñan kashani, chaywanpas astawanraqmi Jehová Diosmanta yachanay kashan. Huñunakuypin sapa kutillanmi ancha sumaq yachachikuykunata yachamuni, kusikunitaq iñiqmasikunawan kaspa. Ima hinaraqmi yachachiyta munashani Paraisopi (Apocalipsis 21:3, 4). Astawanqa wañupuq familiaykunawanmi tupayta munashani (Hechos 24:15). Paykunamanpas Diosmantan yachachisaq, willasaqtaq imaynatan kurakña kashaspa Jehová Diosta servisqaytapas.