Kay revistata leeqkunaq tapukusqan

¿Hayk’aqmi Satanás cielomanta qarqomusqa karan? (Apo. 12:1-9.)

Apocalipsis libroqa manan willanchu hayk’aqchus chay sucedesqanta, ichaqa willanmi chaywan tupaq imakuna sucedesqanmanta, chaykunawanmi yachasunman hayk’aqchus kasqanta. Chaykunamanta ñawpaqkaqqa hanaq pachapi Diospa Reinon takyachisqa kasqanmi. Bibliaq willasqan hina, takyachisqa kasqan qhepamanmi “hanaq pachapi hatun maqanakuy” karan, chay maqanakuypiqa Saqran atipachikuran hinaspa qarqomusqa karan.

Bibliaqa sut’itan rikuchin 1914 watapi ‘wak suyu runakunaq kamachikunan tiempo hunt’akusqanmanta’ chay watapi Diospa Reinon takyachisqa kasqanmantapas (Luc. 21:24).a ¿Hayk’a tiempon chaymantapacha pasaran hanaq pachapi guerra kananpaq chaypi Satanaspas qarqosqa kananpaq?

Apocalipsis 12:4 nin: “Dragonmi [Satanás] wachakunanpaq kashaq warmiq ñawpaqenpi sayaykurqan, naceqtin hina wawata oqoykunanpaq”, nispa. Chay textoq nisqanmi rikuchin Diospa Reinon naceqtin hina Saqra chinkachiy munasqanta. Jehová Diosña hark’aran yuyaykusqanta Satanás mana ruwananpaq chaypas, Saqraqa decidisqan kasharan Diospa Reinonta chinkachinanpaq. Chayraykun “Miguel[qa] angelninkunantin” usqhaylla hanaq pachamanta ‘dragonta angelninkunatawan’ wikch’umuran. Chhaynapin yachanchis 1914 watapi Diospa Reinon takyachisqa kasqan qhepallaman Satanás qarqomusqa kasqanta.

Chaymantapas hanaq pachapaq akllasqa cristianokuna hayk’aqchus kawsarimpusqankumanta yachaymi yanapawasunman. Bibliaq nisqanman hinaqa, Reino takyachisqa kasqan qhepallamanmi kawsariyta qallariranku (Apo. 20:6).b Ichaqa manan Bibliaqa willanchu Cristo dragonwan angelninkunawan ima maqanakuqtin hawisqa wayqenkuna paywan kashasqankumanta. Chayrayku, Cristoq wayqenkuna kawsariyta qallariqtinqa ñan hanaq pachapi hatun maqanakuy karanña Satanaspas supayninkunantin qarqomusqañan karanku.

Chhaynaqa, manaña Biblia sut’itachu willan ima tiempopichus Satanás angelninkunantin hanaq pachamanta qarqosqa kasqankuta chaypas, chaywan tupaq willakuykunan rikuchin 1914 watapi Jesucristo rey churasqa kasqan qhepallaman qarqomusqa kasqankuta.

[Uranpi willakuykuna]