¿Juchachu kanman vegano runa kay? | ¿Imaninmi Biblia?

Aychata mana mijuq otaq animalmanta paqariq ima alimentotapas mana mijuq runakunatan vegano runakuna nispa nikun. Askha runakunan pachantinpi chaymanta astawan yachayta munanku.

• “Vegano runakunaqa manan allinpaqchu qhawarinku mijunapaq, p’achatapas ruwanapaq, otaq imata ruwanapaqpas animalkuna ñak’arichiyta otaq wañuchiytapas” (The Vegan Society).

Askha runakunan vegano nisqa runakunaman tukupunku animalkunata munakusqankurayku, kay pachanchista cuidayta munasqankurayku, saludninkurayku otaq religionninkuraykupas.

• “Veganismo nisqaqa manan saludninchista cuidananchispaq wakin mijunakunata mana mijuy jinallachu, aswanpas juj creencia jinan, vegano runakunaqa aychata mana mijuspa kay pachapi imaymana sasachakuykunata tukuchiyta atinankupaqmi yuyaykunku” (Britannica Academic).

¿Tukuchinmanchu chay veganismo nisqa kay pachapi imaymana sasachakuykunata? ¿Imaninmi Biblia?

¿Imaynatan kamaqninchis qhawarin runakunata animalkunatapas?

Bibliaq nisqanman jinaqa kamaqninchis Jehováa Diosmi runata kamachisqa kay pachapi llapa animalkunata kamachinanpaq, chhaynaqa runakunawan animalkunawanqa manan kaqllachu kanchis (Génesis 1:27, 28). Qhepamanmi Diosqa runakunata nillasqataq aychata mijuyta atisqankuta (Génesis 9:3). Ichaqa manan allinpaqchu qhawarin animalkuna maltrataytaqa (Proverbios 12:10).

Bibliaq nisqanman jinaqa aychata mijusunchus manachus chaytaqa sapankanb decidinanchis. Manan aychata mijujtinchischu otaq mana mijujtinchischu Diosqa aswan allinpaq qhawariwasun (1 Corintios 8:8). Manan pitapas imata mijusqanmantapas otaq mana mijusqanmantapas juchachananchischu (Romanos 14:3).

¿Pillan kay pachapi sasachakuykunata tukuchinman?

Bibliaqa sut’itan willawanchis imataña runakuna ruwankuman chaypas, manan kay pachapi sasachakuykunata tukuchiyta atinkumanchu nispa. Imaymanakuna rikusqanchisqa kashan politicokunaq mana allinkuna ruwasqankurayku, ch’aqwaykuna kasqanrayku iman. Chaykunataqa manan pipas tukuchiyta atinmanchu. Bibliapin nishan:

• “Q’ewisqa kaqtaqa manan rectoyachiyta atikunmanchu”, nispa (Eclesiastés 1:15).

Kamaqnillanchismi kay pachapi sasachakuykunataqa tukuchinqa. Khaynatan Bibliapi willashan imatachus ruwananmanta:

• “Chayllamanmi rikullanitaq mosoq cielota mosoq jallp’a pachatawan, ñaupaq kaq cielopas ñaupaq kaq jallp’a pachapas manañan kasqachu, lamar-qochapas manañan kapusqachu”, nispa (Apocalipsis 21:1).

Chaypiqa “ñaupaq kaq cielo” nispaqa rimashan kay pacha gobiernokunamantan, chay gobiernokunatan Dios chinkachipunqa jinaspa churanqa “mosoq cielota” otaq Diospa gobiernonta. Chay gobiernon “ñaupaq kaq jallp’a pachata” otaq millay runakunata chinkachipunqa, jinaspan “mosoq jallp’a pachata” otaq kasukuq runakunata kamachinqa.

Chhaynaqa Diospa gobiernon kamachimullaqtinmi kusisqa kasunchis, animalkunawanpas thaj nisqa kausasunchis (Isaías 11:6-9).