¿Yacharankichu?

¿Imaraykun Jesús mana allinpaq rikuran judiokuna juramento ruwasqankuta?

MOISESPA chaskisqan kamachikuypa nisqan jina, mayninpiqa allinmi karan Diospa sutinpi juray. Jesuspa tiemponpin ichaqa yaqa llapa judiokuna ima rimasqankupas cheqaq kasqanta rikuchinankupaq sapa raton juraqku Diospa sutinpi. Chaymi Jesusqa mana allinpaq rikuran chay ruwasqankuta. Chayraykun payqa niran: “‘Arí’ nisqaykichisqa ‘arí’ nisqallapuni kachun, ‘manan’ nisqaykichistaq ‘manan’ nisqallapuni kachun”, nispa (Mat. 5:33-37; 23:16-22).

Talmud libroq wakin partekunapi willasqan jina, judiokunaqa sapa ratonmi juraqku rimasqanku cheqaq kasqanta rikuchinankupaq. Chay libropin willallantaq ima juramentotas junt’anankupuni karan ima juramentotataqsi mana chayta.

Manan Jesusllachu mana allinpaq rikuran judiokuna juramento ruwasqankutaqa. Flavio Josefoq nisqan jina wakin judiokunapas manas jayk’aqpas juraqkuchu, paykunapaqqa llullakuymantapas aswan millaysi kasqa jurayqa. Chaymantapas, pipas juraqtaqa llullata jinas qhawariqku. Sabiduría de Sirach nisqa judío libropas nillantaqmi: “Nishuta juraq runaqa, mana allin kaqtan sonqonpi wiñachin”, nispa (23:11). Jesuspaqqa manapunin allinchu karan yanqa jurayqa. Chayrayku, sichus cheqaqta imatapas rimasun chayqa manan jurananchisraqchu pipas creewananchispaqqa.