Kuraq hermanonchiskunaqa anchatan valenku

Hermananchis Connie jinapaschá qanpas tarikushanki, kuraq kapusqaykiraykupaschá manaña nishutachu imatapas ruwayta atishanki. Wayna otaq sipas kashaspaykiqa tukuy sonqomantachá Jehová Diosta servirqanki. Chaypi nishuta piensaspaqa pisipawaqmi. ¿Iman yanapasunkiman ama pisipanaykipaq?

¿IMA RUWANAYKITAN MUNAN DIOSNINCHIS?

Tapurikuy: “¿Ima ruwanaytan Jehová Dios munan?”, nispa. Deuteronomio 6:5 textopin nin: “Jehová Diosniykitan munakunki tukuy sonqoykiwan, tukuy almaykiwan, tukuy kallpaykipiwan”, nispa. Chaypi nisqanqa thaj kaytan qowanchis ¿riki? ¿Imaraykutaq chayta ninchis?

Chay textopi nisqanman jinaqa Jehová Diosninchisqa tukuy sonqowan servinanchistan munan. Chaypi yuyaymananki chayqa, manañan jujkunawanqa comparakunkichu; manañan comparankichu ñaupaqpi imachus ruwasqaykita kunan imachus ruwasqaykiwanpas.

Kaypi piensariy: Wayna o sipas kashaspa, ¿imatan ruwaranki Jehová Diosninchispaq? Chay tiempoqa tukuy atisqaykitachá ruwaranki payta servinaykipaq. ¿Imatan kay tiempopi Diosninchispaq ruwashanki? Kallpaykiman jinachá tukuy atisqaykita ruwashanki payta servinaykipaq. Qhawarisqaykiman jina kunanpas imatachus ñaupa tiempopi ruwaranki kaqllatataqmi ruwashanki: Tukuy kallpaykitan Diosman qoshanki.

JUJKUNATA KALLPACHAY

Ama kuraq kasqaykipichu piensay, aswanpas imaynatas jujkunata yanapariwaq chaypi piensariy. Imatachá wayna o sipas kashaspa mana ruwarankichu chayta ruway, ¿imamantan rimashanchis? Chayta qhawarisun.

Experienciaykita jujkunaman willariy. Qhawariy imatas ñaupa tiempopi wakin runakuna nirqanku chayta:

Rey Davidmi nirqan: “Waynan karqani, kunantaq machuña kapuni, ichaqa manan jayk’aqpas rikurqanichu chanin runata qonqasqataqa, manan rikurqanichu wawankuna mijunata mañapakushaqtapas”, nispa (Sal. 37:25).

Josué nirqan: “Rikusqaykichis jina, noqaqa wañupunaypaqñan kashani. Qankunaqa allintan yachankichis Jehová Diospa rimasqanqa llapallanpuni junt’akusqanta, qankunaq allinniykichispaqmi payqa llapa prometesqanta junt’arqan, manan jujpas mana junt’asqaqa karqanchu”, nispa (Jos. 23:14).

Davidpas Josuepas experienciawanmi rimasharqanku. Paykunaqa imaymanatan rikurqanku, chaymantapas askha watakunan Jehová Diostaqa servirqanku. Paykunaq rimasqankuqa ancha valorniyoqmi karqan. Chhaynallatataqmi qankunamantapas nikunman: Unayñataq Jehová Diosta servishankichis chayqa ancha valorniyoqmi rimasqaykichisqa.

Askha wataña Jehová Diosta servishanki chayqa, jujkunamanmi willariwaq imakunatas rikuranki chayta. Willariwaqmi imakunatas Diosninchis ruwaran qanrayku jujkunarayku chaytapas. ¿Yuyashankichu imaynatas Jehová Dios llaqtanta bendecirqan chayta? Ama qanllapaqchu chaykuna yachasqaykitaqa jap’ikuy, jujkunamanpas willariy. Uyariqniykikunaqa anchatan kallpachakunqaku, kusikunqaku iman. Qanpas ancha kusisqan kanki (Romanos 1:​11, 12).

Juñunakuykunaman rispapas jujkunataqa kallpachawaqchismi. Chayrayku tukuy atisqaykita ruway juñunakuykunaman rinaykipaq. Chayta ruwanki chayqa kallpachasqan hermanokuna kanqaku qanta rikuspanku, qanpas kallpachasqan kanki. Qallariypi yachamusqanchis hermananchis Connie nin: “Juñunakuykunaman rispan noqaqa kallpachasqa kani. ¿Imaynapin llakisqa kayman juñunakuykunapi hermanokunawan munayta abrazanakushaspay? Noqapas hermanonchiskunaman munakusqayta rikuchinaypaqqa regalochakunatan ruwani. Chaymantapas atisqayman jinan Diospa llaqtanpi imaymana ruwaypi yanapakuni”, nispa.

JEHOVA DIOSQA ANCHATAN VALORAN LLANK’ASQAYKITA

Bibliapi willasqan wakin runakunaqa, kuraqña kasqankuraykun manaña nishutachu imatapas ruwarqanku. Chhaynaña kaqtinpas Jehová Diosqa munakushallarqanmi paykunataqa, chay munakuynintaqa rikuchirqanmi paykunaman. Simeón sutiyoq runamanta rimasun, payqa kuraqña kasharan chaypas rikurqanmi Jesusta. Ichaqa templota rispaqa rikurqanchá waynakunaq imaymanakuna ruwasqanta. ¿Imaninmanmi karan chayta rikuspa? Yaqapaschá sonqonpi nirqan: “Khayna kuraqñataq kapuni chayqa imapaqñataq Diospaq valeyman”, nispa. Ichaqa manan chhaynachu karan. Diosninchismi paymanta nirqan imaynas “payqa Dios sonqo runa, chanin runa” chayta. Chaymantapas Jesustan wawallataraq rikuchirqan. Paytan churarqan llapan runakunaman Jesús Mesías kasqanta willamunanpaqpas (Luc. 2:​25-35). Jehová Diosninchisqa manan Simeón kuraq kasqanpichu ni kallpan pisiyasqanpichu piensaq, aswanpas may jatun iñiq kasqanpin. Chaymi paymanqa “santo espiritunta” ima qorqan.

Qanpas kuraqña kashaspaykipas kusisqan kanayki, Diosninchisqa anchatan valoran atisqaykiman jina ima ruwasqaykitapas. Diosninchisqa ancha kusisqan kashan qanwan. Chaymantapas “payqa pipas atisqanman jinalla qonantan munan” (2 Cor. 8:12).

Chaypi allinta piensanki chayqa atisqaykiman jinallan imatapas ruwanki. Yaqapaschá imaymana formamanta predicacionpi yanapakuwaq, pisi tiempollapas lloqsiwaqmi. Hermanonchiskunatapas celularninta wajaspa o cartata qelqaspa kallpachariy. Chaykunata ruwanki chayqa sonqochankun astawanraq llanllarinqa. Qanqa askha watañataq Diosta servishanki chayqa, astawanmi paykunaqa kusikunqaku chayta paykunarayku ruwaqtiykiqa.

Yaqapaschá imamantapas mal kashanki, onqosqa imapaschá kashanki, chhaynaña kashanki chaypas imaymanatan Diosninchispaqqa ruwawaq. Chaypaq qhaway “Juj warmi wañuymanta librakun” nisqa willakuyta, chaypin willashan África oriental ladopi juj kuraq hermananchis juj warmita yanapasqanmanta.

Qanqa askha watañataq Diosta servishanki chayqa, Dios sonqolla kasqaykiqa kallpachanqapunin jujkunata. Allin ejemplon kanki kay pachapi imaymanakunata aguantasqaykirayku. Amapuni qonqankichu Hebreos 6:10 textotaqa, chaypin nin: “Diosqa chaninpunin, payqa manapunin qonqanqachu imachus ruwasqaykichista sutinta munakusqaykichistapas, chaytan qankunaqa rikuchishankichis iñiqmasikunata kunankama servispa”, nispa.

YANAPASHALLAYCHIS JUJKUNATAQA

Científico runakunaq nisqanman jinaqa, wakin kuraq runakuna yanapashallanku jujkunata chayqa, ratullas imatapas yuyarinku, manas ima onqoypas faciltachu jap’in, aswan unaytas kausankupas.

Jujkunapaq imaymanakunata ruwaspaqa, manapaschá kuraq kasqaykipi llapa sasachakuytachu chinkachinki. Chay kuraq kayta, nanayta, llakikuyta wañuytapas Diospa gobiernollanmi llapanta chinkachinqa (Rom. 5:12).

Chhaynaña kaqtinpas, qankunaqa allintan jujkunata yanapashankichis Jehová Diosninchista reqsinankupaq. Kuraq hermanokuna, ama jayk’aqpas qonqankichischu: Jehová Diosninchisqa anchatan valoran imakunatas ruwashankichis chayta. Iñiq t’aqapi hermanonchiskunapaqpas ejemplon kankichis, anchatan munakuykiku.