Ama puriysillasunchu
1. ¿Imatan Pablo hina ruwasunman hukkunawan predicashaspa?
1 Apóstol Pablo hukkunawan predicaq rispaqa ‘iñiyninkupi kallpachanakunankupaqmi’ yanapakuq (Rom. 1:12). ¿Ñoqanchisri predicacionman lloqsispa kallpachanakunchischu iñiqmasinchiskunawan? Puriysinallanchismantaqa may allinmi kanman imakunan yanapawarqanchis allinta predicananchispaq chaykunamanta rimay.
2. ¿Imaynatan iñiqmasinchista yanapasunman mana manchakuq kananpaq, imarayku allinpuni chay ruway?
2 Yanapay mana manchakunankupaq. Wakin iñiqmasikunatan reparanchis uyankupi rimayninkupipas predicashaspa manchakusqankuta. Chaymi sonqomanta nisunman: “Allintan kallpachakushanki”, nispa; chhaynapi mana manchakunankupaq. ¿Imatawanmi ruwasunman? Huk watukuq umallin predicaqmasinkunaman nin: “Ñoqapas manchakunin predicayta, chaymi Diosmanta mañakuni thak kayta qowananpaq”, nispa. Huk iñiqmasipas nillantaqmi: “Asirikuyqa allinmi. Mayninpin ichaqa Diosmanta mana mañakuqtiyqa manan asirikuytapas atinichu”, nispa. Imachus manchakuyninchista pisiyachirqan chaytaqa willasunmanmi predicaqmasinchisman.
3. ¿Imakunamanta rimasunman predicaqmasinchiswan?
3 Yanapanakusun. Sichus hukkuna uyarinankupaq hina predicayta yachanki otaq qelqanchiskunapi predicanapaq yanapaykunata huk simikunawan rimasqayki allin kasqanta reparanki chayqa, chaykunamanta rimawaq predicaqmasiykiwan (Prov. 27:17). Revisitaykiman kutishaspaqa willawaqmi iñiqmasiykiman imamanta yachachinki, imaynata yachachinki chaytapas. Estudiota qosqayki qhepamanqa willawaqmi imarayku huk yachachikuyta otaq huk textotapas kuti-kutirispa yachachisqaykita otaq imarayku hukniraymanta yachachisqaykitapas.
4. ¿Imanaqtinmi iñiqmasinchista yanapananchis?
4 Ñawpaq tiempopi cristianokunaqa manan predicasqanku runakunallatachu yanaparqanku, aswanpas paykunapura yanapanakurqanku (Hech. 11:23; 15:32). Chaymi Pabloqa Timoteota yanaparqan hukkunaman allinta yachachinanpaq (2 Tim. 2:2). Sichus yachasqanchista iñiqmasinchisman willasun chayqa, mana manchakuspan aswan allinta predicanqaku, astawanqa chay ruwasqanchiswanmi Diosninchista kusichisun (Heb. 13:15, 16).