Jehová Diosta tukuy kallpawan servispaqa kusikunchismi
1 Apóstol Pabloqa kusisqan ‘kallpanta tukukuran’ Diospa qosqan llank’anata hunt’ananrayku (2 Cor. 12:15). Kay tiempopipas, askha iñiqmasinchiskunan apóstol Pablo hina allin llank’aq precursor kanku. Wakin wayqe panakuna familiankurayku askhataña llank’anku chaypas, tiemponkuta horqonku sapa semana predicanankupaq. Wakinqa sinchi onqosqaña tarikuspapas atisqankuman hina kallpachakunku Diospa Reinonmanta willanankupaq. Yuyaqña kashaspapas imaynapiña tarikuspapas wayqe pananchiskunaqa Jehová Diosta servinankupaqmi kallpachakushanku, chayta rikusqanchismi anchata kallpachawanchis.
2 Runamasinchista munakusqanchisrayku: Sichus Diosta servinanchispaq tukuy atisqanchista ruwanchis, munakunchistaq Diosta runamasinchistapas chayqa, allin concienciayoqmi kasunchis. Apóstol Pabloqa kallpachakuranmi allin willakuykunata willananpaq, chaymi niran: “Kunan sut’inchaykichis: Ñoqaqa manañan huchayoqchu kani pillapas wiñaypaq huchachasqa kananmantaqa”, nispa (Hech. 20:24, 26; 1 Tes. 2:8). Sichus tukuy atisqanchisman hina predicashanchis chayqa, Diosqa manan cuentata mañawasunchu runaq huchachasqa kananmanta (Eze. 3:18-21).
3 Runamasinchista tukuy kallpanchiswan yanapaspaqa kusikunchismi (Hech. 20:35). Huk wayqenchis niran: “Ch’isiyaq Jehová Diosta servisqaymanta wasiyman sayk’usqaña kutimuni chaypas, ancha kusisqan kutimuni. Maytapunin Jehová Diosman graciasta qoni mana piqpa qechunan kusikuy qowasqanmanta”, nispa.
4 Diosta munakusqanchisrayku: Jehová Diospa llank’ananpi tukuy kallpanchista churanchis payta kusichinanchisrayku. Diosta munakusqanchisrayku kamachikuyninkunata kasukunchis, paymi kamachiwanchis runakunaman predicananchispaq, Jesuspa yachachisqankuna kanankupaq (1 Juan 5:3). Runakuna manaña uyariwaqtinchispas, otaq hark’awaqtinchispas tukuy sonqo llank’ashallasun Jehová Diospaq.
5 Cosechay tiempopitaq kashanchis chayqa, manan pisiyachinanchischu llank’ayninchista (Mat. 9:37). Chakra ruwaqqa ch’isiyaqtan llank’an cosechay tiempopiqa, mana chayta ruwaqtinqa atipachikunmanmi cosechawan. Chay hinallataqmi predicay llank’ayninchista hunt’anapaqqa pisillañan tiempo kashan. Chaymi tukuy sonqo predicananchis, kay tiemponchis ancha importante kasqanta yuyarispa (Luc. 13:24; 1 Cor. 7:29-31).