8 T’AQA
Canaán hallp’ata hap’ikapunku
Josuepa umallisqanmi Canaán hallp’ata hap’ikapurqanku. Diosmi juezkunata churarqan llaqtanta yanapananpaq
PACHAK-PACHAK watakuna ñawpaqtaraqmi Jehová Dios Abrahamta prometesqa mirayninman Canaán hallp’ata qopunanpaq. Chaymanmi Israel runakuna Josuepa umallisqan haykunankuña kasharqan.
Canaanpi tiyaq runakunaqa sinchi millaymi karqanku. Chaymi Jehová Dios Israel runakunata kamachirqan Canaanpi kaq llaqtakunata thunichinankupaq.
Manaraq Canaán hallp’aman haykushaqtinkun Josué iskay runakunata kacharqan chay llaqtata qhawamunankupaq. Hinan paykunaqa Jericó llaqtaman haykurqanku hinaspa Rahab warmiq wasinpi alojakurqanku. Chay warmiqa Israelmanta kasqankuta yachashaspan wasinpi paykunata pakarqan. ¿Imarayku? Uyarisqan Jehová Dios llaqtanta yanapananpaq milagrokuna ruwasqanmanta, chaymi Diospi iñisqa. Rahabqa chay runakunatan valekurqan Jericó llaqtata thunichishaqtinku ama paytapas familiantapas wañuchinankupaq.
Qhepamanmi Israel runakuna Canaán hallp’aman haykurqanku, Jehová Diospa yanapayninwantaq Jericó llaqtata atiparqanku. Rahabmi ichaqa familiantin mana wañurqankuchu. Chaymantapachan Josué ejercitonwan soqta wata huk llaqtakunawan maqanakurqanku. Chhaynapin Diospa Prometesqan yaqa llapa hallp’akunata hap’ikapuspa Israelpi llapa ayllukuna rakinakapurqanku.
Wañupunanpaqña kashaqtinmi Josué llapa Israel runakunata huñurqan. Chaypin yuyarichirqan ñawpa taytakunapaq Dios imaymana ruwasqanmanta, kallpacharqantaqmi hunt’aq sonqo kanankupaq. Josuepas yanapaqninkunapas wañupusqanku qhepamanmi ichaqa Diosmanta karunchakuspa pantasqa dioskunata yupaycharqanku. 300 watakuna pasasqanpin askha kutipi Diosta mana kasurqankuchu. Chaymi Diosqa Filistea runakunaman huk enemigonkumanwan hap’iykachiq, yanapayninta mañakuqtinkun ichaqa huk kacharichiqta churaq. Chay kacharichiqkunan llapanpi 12 karqanku, paykunatan nikurqan juezkuna nispa.
Chaykunamanta willaq libron qallarin Otoniel juezmanta willaspa, tukuntaq allin kallpayoq Sansón juezmanta willaspa. Jueces libropi willakuykunan kayta yachachiwanchis: Jehová Diosta kasukusun chayqa, allintan kawsasun mana chayqa imaymana sasachakuykunapin tarikusun.