“¡Kusisqalla kashaychis!” nisqa asambleapaq videokunata ruwakusqan

Kinsa p’unchay asambleapi videokuna rikusqanchisqa sonqonchismanmi chayan, yanapawanchistaqmi Biblia leesqanchista astawan entiendenanchispaq. 2020 watapaq “¡Kusisqalla kashaychis!” nisqa asambleapaqmi 114 videokuna ruwakamuran, chaykunamanta 43 videokunan karan umalliq t’aqaq jinallataq yanapaqninkunaq yachachimusqanku videokuna. ¿Jayk’a tiempopin jayk’a qolqewanmi chay videokunata ruwamuranku?

Kay watapi asambleapaq videokunata ruwanankupaqmi yanapakuranku lliu mundontinmanta yaqa 900 hermanokuna. Llapa videokunataqa iskay watapin ruwayta tukuranku, Nehemías: Jehová Diosmanta jamuq kusikuymi kallpachawasun nisqa videota ruwanankupaqmi llank’aranku 70.000 horasta, chay videoqa juj hora maspi qhawanapaqmi kashan. Llapa videokunata ruwaspataq llank’aranku 100.000 horasta.

Chaykunata ruwanapaqqa askha qolqetan necesitakuran: llank’aq hermanokunapaq, imaymana maquinakunata materialkunatapas rantinapaq, Jerusalén llaqtaq perqankunata jina tablakunawan ruwanapaqpas.

Grabacionkunamanta encargakuq Jared Gossman hermanonchismi nin: “Yachachikuymanta encargakuq hermanokunan munaranku yaqa llapa nacionkunamanta videonchiskuna kananta. Chhaynapi Jehová Diospa testigonkunaqa lliu mundontinmanta kasqanchista sut’ita rikukunanpaq. Chayraykun 24 grupopi hermanokuna 11 nacionkunapi wakin videokunata ruwamuranku, chaypaqqa qolqetan necesitakuran, jinaspapas allintan rimanakunanku karan imaynata llank’anankupaq”, nispa.

Yaqa llapa videonchiskunata ruwakunanpaqmi imaymana equipokunata necesitakuran, maypi grabananku cheqastapas allintan allichananku karan. Nehemías: Jehová Diosmanta jamuq kusikuymi kallpachawasun nisqa videotan grabaranku Mount Ebo nisqa grabana wasipi, chayqa kashan Patterson llaqtaq qayllanpin. Chay videota grabanankupaqmi chay grabana wasi ukhuta sumaqta allicharanku adornarankupas. Chay ukhupin Jerusalén llaqtaq perqankunata jina maderakunawan tablakunawan ruwaranku, chhaynapin qolqeqa mana nishuchu gastakuran. Chay perqakunataqa ñaupa tiempo llaqtakunaq perqankunata jinan k’apajta ruwaranku. Tablakunamanta ruwasqanku perqakunaqa soqta metro altoyoqmi sapankapas karan, chaykuna rumi jina rikukunanpaqtaq mana gastakuq llamp’u plasticokunawan forraranku. Chay ruwasqa perqakunaqa fácil apakachanallan karan, chhaynapin jujtañataq grabayta munaspaqa juj ladokunaman suchurichiqku. Chaywanpas yaqa 350.000 solestan gastaranku chay perqakunata ruwaspa.a

Videonchiskuna chhaynata ruwakusqanta yachaspaqa anchatan valoranchis kay watapaq asambleanchista. Manan iskayasunmanchu, kaykunawanqa astawanraqchá Jehová Diosqa mundontinpi yupaychasqa kanqa. Gracias wayqe-panaykuna qolqeykichista donacionpi churasqaykichismanta, chaytaqa churarankichis internetnintan donate.jw.org nisqapi otaq jujniraymantapas.