Testigokunapaq, ¿soqta p’unchayllapichu Dios kay pachata kamaran?

Manan. Wakin runakunaña ninku: “Soqta p’unchayllapin kay pachaqa kamasqa karan”, nispa chaypas, manan noqaykuqa chaypiqa creeykuchu. ¿Imarayku? Chhaynata rimaqkunaq piensasqan mana Bibliaq nisqanman jinachu kasqanrayku. Chaymi kunan iskaymanta yachasun.

1. ¿Soqta p’unchayllapichu kay pacha kamasqa karan? Wakin runakunaqa kunan tiempo reqsisqanchis p’unchaypaqmi piensanku Bibliapi “p’unchay” nisqanta, chaymi ninku: “Soqta p’unchayllapin kay pachaqa kamasqa karan”, nispa. Bibliapin ichaqa askha watakunata mayninpi nin “p’unchay” nispa (Génesis 2:4; Salmo 90:4).

2. ¿Jayk’a watañan kay pacha kashan? Chay runakunan nillankutaq: “Pisi waranqa watakunallaraqmi kay pachaqa kashan”, nispa. Bibliaq willasqanman jinan ichaqa kay pachaqa ña kamasqaña kasharan manaraq Dios chay soqta p’unchaykunapi imachus ruwasqanta qallarishaqtinqa (Génesis 1:1). Chaymi noqaykuqa creeyku científico runakunaq nisqanta, paykunaq nisqanman jinaqa askha waranqa-waranqa watakunañan kay pachaqa kashan.

Noqaykupaqqa Diospa kamasqanmi kay pachaqa kashan, ichaqa manan chayraykuchu científico runakunaq nisqan contra kayku. Aswanpas Bibliaq willasqanqa científico runakunaq nisqankuwan yaqa kaqllan kashan.