¿Israel nacionpichu Armagedón guerra qallarinqa? | ¿Imatapas Biblia willashanmanchu chaymanta?

Bibliaq willasqanman jinaqa Armagedón guerraqa manan juj partellapichu aparikunqa, aswanpas chay guerraqa llapa mundontinpin aparikunqa, chaypin llapa gobiernokuna Dioswan maqanakunqaku.

•  Chay guerramanta rimaspan Bibliapi nin: “Chay rimaykunaqa supaykunamantan jamun, [...] jallp’a pachapi llapa reykunamantaqmi chayanpas, chhaynapi tukuy atiyniyoq Diospa jatun p’unchaynin guerraman chay reykunata juñunankupaq. […] Chay reykunatan juñurqanku hebreo rimaypi Armagedón nisqa partepi”, nispa (Apocalipsis 16:14, 16).

Armagedón nisqa simiqa Hebreo rimaypi Har Maguedṓn nisqamantan jamun, chayqa “Meguidó orqo” ninantan nin. Ñaupa Israel nacionpin juj llaqta karqan Meguidó nisqa sutiyoq. Chayraykun wakinqa piensanku Armagedón guerraqa kay tiempo Israel nacionpi aparikunanpaq. Ichaqa chay Armagedón guerraqa “jallp’a pachapi llapa reykunawan” soldadonkunawan imataq aparikunqa chayqa, manan Meguidó llaqtapas ni Medio Oriente nisqa ladopas chay guerrataqa chaskiyta atinmanchu.

Apocalipsis libropi yaqa llapa qelqasqantapas mosqoypi jinan apóstol Juanqa rikurqan, rijch’anachiypi jinataqmi llapa imapas kashan (Apocalipsis 1:1). Chaymantapas Armagedón nisqaqa manan maypichu kashan, aswanmi chhaynata nikun kay pachapi imakunachus pasanqa chayta; nacionkunan juñukunqaku Dios contra maqanakunankupaq, paykunaqa manan munanqakuchu Diospa gobiernonman k’umuykuyta (Apocalipsis 19:11-16, 19-21).