Jehová Diosmi yanapawanku maypichus plantawanku chaypi t’ikarinaykupaq

1979 watapin hermano Mats esposan Ann-Catrin ima Galaad Escuelaman rirqanku. Chaymantapachaqa Irán, Mauricio, Myanmar, Tanzania, Uganda, Zaire llaqtaman iman paykunataqa kacharqanku. Galaad Escuelapi jujnin yachachiqmi paykunamanqa juj consejota qosqa, paypa sutinmi karqan Jack Redford. Chay consejon paykunataqa yanaparqan “maypiña plantasqa kaqtinkupas” “jujmantaña plantasqa kaqtinkupas” allillan kanankupaq. Paykunan willariwasun imakunapis tarikurqanku chayta.

Willariwayku, ¿imaynatan Bibliamanta yacharqankichis?

Mats: Segunda Guerra Mundial kashaqtinqa Polonia nacionpin papayqa tiyasharqan, chaypis payqa rikuq imaynas iglesia catolicapiqa ñishu iskay uya karqanku chayta. Chaywanpas “Kanpunichá cheqaq religionqa”, nispan payqa niq. Tiempowanmi noqaqa repararqani imaynas payqa razonta rimasharqan chayta. Noqamanqa gustawaqpunin usasqa librokuna rantiy, chhaynata rantishaspan juj kuti rantikurqani La verdad que lleva a vida eterna nisqa librota. Chay titulota rikuspan noqaqa nirqani: “Kay libroqa jujniraymá juj librokunamantaqa”, nispa. Jinan chay tutapacha llapanta leepurqani. Leesqayman jinan nirqani: “Kaypunimá Diosmanta jamuq cheqaq yachachikuyqa”, nispa

1972 watamanta abril killamantapachan Jehová Diospa testigonkunaq orqomusqan askha qelqakunata leeyta qallarirqani. Chaypin allinta yacharqani Bibliamanta imaymana tapukusqayta. Chaykunata yachaspaymi Jesuspa willasqan comerciante runa jinaraq tarikurqani. Payqa ancha valeq perlata tarispan tukuy ima kaqninta venderqan chhaynapi chay perlata rantikunanpaq. Noqaqa doctor kanaypaqmi universidadpi estudiayta munasharqani, ichaqa tarisqay “perlata” rantinaypaqpas tukuy imata vendeshayman jinatan llapa imachus munasqayta qhepaman saqepurqani (Mat. 13:​45, 46). Jinan 1972 watapi 10 p’unchay diciembre killapi bautizakapurqani.

Juj watapi jinallan papaypas sullk’a hermanoypas Diosmanta yachayta qallarirqanku jinaspa bautizakapurqanku. Noqaqa 1973 watapi julio killapin precursor regular kapurqani. Maypichus kasharqani chay congregacionpin kallarqantaq Ann-Catrin sutiyoq juj hermana, payqa munay sipasmi karqan, tukuy sonqon Diostapas serviq. Paywanmi reqsinakuyta qallarirqani jinaspa 1975 watapi casarakurqayku. Chay qhepamanqa Suecia nacionpi kaq Strömsund llaqtapin Diosta serviyta qallarirqayku, tawa watan chaypi karqayku. Chay llaqtapi wakin runakunaqa munaqkun Diosmanta yachayta.

Ann-Catrin: Papayqa Estocolmo llaqtapi kaq universidadpi estudionta tukushaspas Diosmanta yachayta qallarisqa. Payqa munakuqmi Diosta, noqatapas kinsa killallayoqraq kashaqtiysi apawasqa juñunakuykunaman, predicacionman ima. Mamitayqa manan allinpaqchu chayta qhawarisqa, jinas payqa jark’ananpaq imaymanata ruwasqa. “Testigokunaqa pantasqan kashanku” nispas niq. Ichaqa manan imaynamanta chayta rikuchiyta atirqanchu, jinan paypas tiempowanqa bautizakapurqan, Testigon kapurqan. Noqaqa 13 wataypi kashaspan bautizakurqani, 16 wataypi kashaspataq precursora kapurqani. Chaymantaqa Umeå llaqtapin servirqani, chay llaqtapiqa pisin Diosmanta willaqkuna karqanku; chay qhepamanmi nombrawarqanku precursora especial kanaypaq.

Matswan casarakusqayku qhepamanqa askhatan runakunata yanaparqayku Diosta reqsinankupaq. Paykunamanta jujninmi karqan Maivor sutiyoq sipas, payqa deporte nisqapin allinta ñauparishasqa. Ichaqa Diosta servinanraykun llapa chaykunata saqepurqan, jinaspa sullk’a hermanaywan kuska precursora kapurqanku. Kuskan 1984 watapi aparikuq Galaad Escuelamanpas rirqanku, jinaspa Ecuador nacionman kacharqanku chaypi misionera kanankupaq.

Qankunaqa askha partekunapin misionero karqankichis ¿riki? ¿Iman yanaparqasunkichis “maypichus plantasqa kankichis chaypi t’ikariychis” nisqa yuyaychayta kasukunaykichispaq?

Mats: Arí, noqaykutaqa askha partepin “jujmanta plantawarqanku”. Maymanpas rinaykupaq kamachiwaqtinkuqa Jesuspin piensaq kayku. Payqa llamp’u sonqo humilde sonqon karqan; pay jina kanaykupaqmi kallpachakuq kayku (Col. 2:​6, 7). Chaypaqqa juj hermanokuna noqaykuman yachakunankutaqa, noqaykun paykunaman yachakuq kayku. Imaraykus imatapas ruwanku, imaynatas ruwanku chaytan allinta qhawariq kayku; chayman jinataq noqaykupas ruwaq kayku. Chaymantapas tukuy atisqaykutan kallpachakuq kayku imayna costumbreyoqsi kanku, imaynatas piensanku chayta entiendenaykupaq. Chaykunapi Jesusta qatikuspaqa “unuq purisqanpi plantasqa sach’a jinan kaq kayku”, chhaynapin maypichá plantawaqku chaypiqa t’ikarillaqpuni kayku (Sal. 1:​2, 3).

Ann-Catrin: Juj plantasqa sach’a allinta wiñananpaqqa chaskinanmi intiq k’anchayninta, calorninta. Noqaykupaqqa Jehová Diosmi chay “inti” jina karqan (Sal. 84:11). Calor jinataq karqan hermanokuna, paykunaqa sumaqtan qhawariwaqku. Noqaykuqa Irán nacionpi Teherán llaqtapi kaq juch’uy iñiq t’aqapin kasharqayku, chaypi iñiqmasikunaqa Bibliapi willasqan ñaupa tiempo runakuna jinan kaqku; sumaqtan jujkunata chaskiqku. Maytan munaykuman karqan Irán nacionpi qhepakamuytaqa, ichaqa 1980 watapin julio killapi Gobierno prohibirqan predicanaykuta. Noqaykumanpas 48 horasllatan qowarqanku chay nacionmanta lloqsinaykupaq. Chaymantaqa África ladopi Zaire nacionmanmi kachawarqanku, chay nacionpaq sutinqa kunanqa República Democrática del Congo nisqan.

África ladoman rinaykuta yachaspan noqaqa waqayta qallarirqani. Chay ladomantaqa mach’aqwaykunamanta, onqoykunamanta imallan willakuyta uyariq kani, chaymi manchasqa kasharqani. Ichaqa iskay reqsisqayku amigokunan niwarqanku: “¿Imaynapitaq manaraq reqsishaspari manchakuwaqchis? ¡Rillaychis! Rikullankichis kunan, África ladota allinta reqsiruspaqa manañan chaymanta kutimuyta munankichisñachu”, nispa. Paykunaqa askha watan chay ladopi kamusqaku. Tiempowanmi repararqani imaynas cheqaqllata rimasharqanku chayta. Chay África ladopi hermanokunaqa may sumaq sonqon kasqaku. Soqta wata qhepamanqa prohibirqankun chay ladopi predicanaykutapas; noqaykupas ripunaykun karqan chaymantaqa. Ripunayku kashaqtinmi mana reparaylla Jehová Diosmanta mañakushasqani chayllapi qhepakunaykupaq, chayta cuentata qokuspan noqaqa asirikullarqani.

Llapa kay watakunapi Diosta servisqaykichispiqa karqanpunichá kusikuykunaqa, ¿manachu chayta willariwankikuman?

Mats: Astawanqa yuyarini juj lado nacionkunamanta misionerokunawan reqsinakusqaykutan, kay Diospa llaqtallanpin chaytaqa tariwaq, may munaypunin chayqa. Chaymantapas wakin partekunapiqa 20 runakunaman imaraqmi sapankayku estudiota qoq kayku. Chaymantapas may kusisqan yuyarini África ladopi hermanokunata, paykunaqa may munakuq, may sumaq sonqollañan kanku. Tanzania nacionpi iñiq t’aqakunata watukushaspaqa mayninqa hermanokunaq wasi punkunkupin “cuartoykuta” sayaykachiq kayku; chayqa combi jina juj carrochan karqan. Chaypin paykunaqa may munayta chaskiwaqku, atisqankuman jinan imatapas qoykuwaqku; mayninqa “mastaraqmi qoykuwaqkupas” (2 Cor. 8:3). Chaymantapas noqaykuqa “willanakuna hora” nisqatan rijurichirqayku. Chaypin manaraq puñuq ripushaspa esposaywan kuska imakunatachá chay p’unchay pasarqayku chayta willanakuq kayku. May munaypunin chay ratukunaqa kaq. Llapa chaykunamantan Jehová Diosta gracias niq kayku.

Ann-Catrin: Noqaqa maytan kusikurqani askha nacionkunamanta hermanokunata reqsispay. Chaypin yacharqayku francés, luganda, persa suajili nisqa simikuna rimayta; imaymana costumbrenkunamantapas yacharqaykun. Chayllaraq Diospa llaqtanman jaykumuq mosoq hermanokunatapas capacitarqaykun; paykunawanqa allin amigontinmi kapurqayku, chhaynapin Jehová Diosta “juj nisqalla” servirqayku (Sof. 3:9).

Chaymantapas may kachawasqanku llaqtamanpas rispaqa Jehová Diospa imaymana munay kamasqankunatan rikuq kayku. Juj viajepipas Jehová Dios pusawashankuman jinan karqan. Jehová Diosmi chhayna munayta bendeciwarqanku.

Tarikurqankichispunichá ima llakipipas, chhayna karqan chayqa, ¿imaynatan chayta atiparqankichis?

Mats: Arí, q’oñipi kaq imaymana onqoykunan jap’iwarqanku, chay onqoykunamanta jujninmi kashan malaria. Esposaytapas askha kutitan operarqanku. Papaykumantapas llakikuqmi kayku; paykunaqa kuraqñan kapusharqanku. Chaypin mayta gracias niyku hermanoykuta hermanaykuta, paykunan cuidarqanku pacienciawan may munakuywan ima (1 Tim. 5:4). Chaywanpas mayninqa llakisqan kaq kayku. Karupitaq kasharqayku chayqa, manan paykunata yanapayta atiqchu kayku.

Ann-Catrin: 1983 watapi Zaire nacionpi kashaqtiyku sinchita onqopurqani cólera nisqa onqoywan. Chaymi doctorqa qosayta nirqan: “Kunan p’unchaymi kay nacionmanta apapunayki”, nispa. Jinan qhepantin p’unchay cargata apaq avionpi Suecia nacionman ripurqayku.

Mats: Dortorqa “manan qhaliyanqachu” nisharqanmi, chaywanpas esposayqa qhaliyallarqanmi. Ichaqa llakisqan kasharqayku, mayninqa waqapakuqraqmi kayku; “manapaschá atisunñachu misionero kayta” nisharqaykun. Ichaqa juj wata qhepallamanmi Zaire nacionta kutirqayku, chaypin Lubumbashi llaqtapi juj juch’uy congregacionpi serviyta qallarirqayku, chaypiqa suajili simitan rimaqku.

Ann-Catrin: Lubumbashi llaqtapi kashaqtiykun onqoq kapurqani, ichaqa manaraq nacespan wawayqa wañukapurqan. Manaña piensarqaykuchu wawayoq kanaykupaq chaypas may sonqo nanaymi noqapaqqa karqan wawaypaq wañukapusqanqa. Chhayna llakipi tarikushaqtiykun Jehová Diosqa bendeciwarqanku. Askha runakunamanmi Bibliamanta yachachiyta qallarirqayku. Chhaynapin manaraq watapi iñiq t’aqaykupi hermanokunaqa yapakurqan, 35 kasqaykumantan 70 kapurqayku; juñunakuyman jamuqkunapas yapakurqanmi 40 runakunamanta hasta 220 runakunakama. Chayraykun astawanraq Diosmanta willayman qokurqayku, chaykuna ruwasqaykupin Jehová Diosqa sonqochawarqanku. Chaywanpas yuyarillaqpunin kayku wawaykutaqa. Maytan suyakushayku Jehová Dios sonqoykuq nanasqanta wiñaypaq chinkachinanta.

Mats: Tiempowanqa esposayqa nishutan samapakuq, qhasqonmi ñishuta mat’iq. Chay tiempollapitaqmi noqapipas tariwarqanku rakhu ch’unchullniypi cáncer onqoyta, ñishu graveñan chayqa kashasqa jinan operachikurqani. Kunanqa allillanmi kashani, esposaypas tukuy atisqantan imatapas ruwashan.

Manan noqallaykuchu chhaynakunapiqa tarikushayku, lliumi imaymana llakipi, sasachakuykunapi tarikushanku. Chaytan allinta rikurqayku 1994 watapi. Chay tiempopin Ruanda nacionpi lliuta runakunata wañuchipurqanku, wakin ayqekuqkunatataq juj campopi churarqanku. Chay campopi kaq hermanokunatan noqaykuqa visitarqayku. Paykunaqa tukuy sonqon Diospi confiaqku pacienciawanmi aguantaqku, may sumaqtan jujkunatapas chaskiqku. Chaypin kayta repararqayku: Jehová Diosqa imapiña tarikunki chaypas qaqatan sayachisunki (Sal. 55:22).

Ann-Catrin: 2007 watapin juj accidente pasawarqanku. Uganda nacionpi Betel wasi ruwakusqan juñunakuymanmi rirqayku, chay juñunakuy qhepamanmi Kenia nacionpi Nairobi llaqtaman viajasharqayku. Noqaykuwan kuskan viajasharqanku 25 misionerokuna, Betel wasipi llank’aqkuna ima. Manaraq Kenia nacionpaq fronteraman chayashaqtiykun juj carro chocawarqanku. Kaq ratun wañukapurqan choferpas pisqa hermanokunapas, juj hermananchistaq hospitalpi wañukapurqan. ¡Maytapunin munashayku chay amigoykunawan jujmanta tupayta! (Job 14:​13-15).

Tiempowanqa cuerpoypi k’irikunaqa thanipurqanmi. Ichaqa traumasqan kasharqayku noqaykupas, chay carropi viajaq wakin runakunapas. Noqaqa tutakunan imapas pasashanman jinaraq mancharisqa rijch’ariq kani, sonqoypas sayarunman jinaraqmi tarikuq kani. Chhaynapi tarikushaqtiykuqa Jehová Diosmanta mañakuy gustawasqanku textokunata leey iman yanapawarqanku. Chaymantapas doctormanmi rirqayku yanapawanankupaq. Chaykunawan yanapachikuspan chay sasachakuyta aguantarqayku. Jehová Diosmantaqa mañakullaykupunin noqayku jina tarikuq hermanokunata sonqochaypi yanapawanankupaq.

Chhayna sasachakuykunapi tarikusqaykichismanta rimashaspan nirqankichis Jehová Diosqa “janku runtuta jinan apawarqanku”, nispa. ¿Imatataq chaywanri nisharqankichis?

Mats: Suajili simipin juj rimay kan “Tumebebwa kama mayai mabichi”, nisqa rimay, chayqa “janku runtuta jinan apawarqanku”, ninantan nin. Chaywanqa nikushan pipas janku runtuta apaspaqa munayllata apasqanmantan. Chhaynatan Jehová Diosqa munayllata, sumaqllata apakachawarqanku. Manan jayk’aqpas imatapas faltachiwarqankuchu, mayninqa masraqmi imaykupas karqan. Umalliq t’aqaq imaynachus qhawariwasqankupin chaytaqa aswan allinta rikurqayku. Paykunawanmi Jehová Diosqa may jatun munakuyninta rikuchiwarqanku.

Ann-Catrin: Jehová Diosqa sumaqllata, munakuywan cuidawasqankumanta qosaypaq nisqanmi yuyarichiwan imaynatas juj kuti yanapawarqanku chayta. Juj p’unchaymi wajamuwarqanku, chaypin willawarqanku “papaykin hospitalpi grave onqosqa kashan” nispa. Qosayqa chayllaraqmi malaria onqoymanta qhaliyapurqan, chaymi mana qolqeyku karqanchu Suecia nacionman viajanaykupaq. Jinan pasajeta rantinaykupaq carroykuta vendenaykupaq piensasharqayku. Chayllamanmi wajamuwarqanku juj casarasqa iñiqmasikuna, paykunaqa yacharusqakun imaynapi tarikusqaykuta, chaymi avionpi juj pasajeta pagapuwarqanku. Juj kuraq hermanan wajamuwallarqankutaq, payqa juj cajachapin qolqeta waqaychakusqa “pipas necesitaqpaq” nispataq chay cajachaman letrerota churasqa. Chhaynatan Jehová Diosqa usqhaylla yanapawarqanku (Heb. 13:6).

Qankunaqa 50 watañan tukuy tiempoykichiswan Jehová Diosta servishankichis ¿riki? Willariwayku, ¿imakunatan chay watakunapi yacharqankichis?

Ann-Catrin: Isaías 30:15 textopi nisqan cheqaq kasqantan yacharqani. Chaypin nin: “Thajlla kaspan, noqapi confiaspallan kallpayoqqa kankichis”, nispa. Arí, sichus Jehová Diospi confiasun chayqa, ima sasachakuypiña tarikusun chaypas paymi noqanchismanta maqanakunqa (2 Crón. 20:​15, 17). Tukuy atisqaykutan kallpachakurqayku maypiña kaspapas Jehová Diosta servinaykupaq chay ruwasqaykumantaqa imaymana bendicionkunatan chaskirqayku, manan ima ruwasqaykupas chaywanqa tupanmanchu.

Mats: Noqaqa astawanqa yacharqani Diospi tukuy sonqo confiaytan. Maypiña kashanki chaypas imapiña tarikushanki chaypas, payqa yanapasunkipunin (Sal. 37:5). Payqa Siminman jinan tukuy ladopi noqaykuwan kasharqan. Kunanqa kay Myanmar nacionpi kaq Betelpin kashayku, kaypipas payqa noqaykuwanpunin kashan.

Maytan munaykuman llapa waynakunapas sipaskunapas, imayna munakuqsi Jehová Dios chayta rikunankuta. Paykunapas Jehová Dioswan yanapachikunqaku maypichus plantasqa karqanku chaypi t’ikarinankupaq chayqa, rikunqakupunin Diospa munakuynintaqa.