Leeqkunaq tapukusqan

¿Imatan apóstol Pablo nisharqan “manaraq nacenanpi naceq wawaman jinan” rijuriwarqan nisqanwan? (1 Corintios 15:8).

Apóstol Pablon 1 Corintios 15:8 textopi nirqan: “Llapankuq qhepantañan noqamanpas rijurillawantaq manaraq nacenanpi naceq wawaman jina”, nispa. Chay textoq nisqan jina apóstol Pabloqa rimashan Jesusta janaq pachapi rikusqanmantan. Ichaqa chay textota leespan unay watakuna piensarqanchis apóstol Pabloqa manaraq tiemponpi janaq pachapi tiyananpaq ajllasqa kasqanmanta. Allinta estudiaspan ichaqa reparanchis mana chhaynachu kasqanta.

Apóstol Pabloqa imakunas cristianoman tukupusqan p’unchaypi pasarqan chaymantan rimasharqan. Ichaqa, ¿imatataq apóstol Pablori nisharqan “manaraq nacenanpi naceq wawaman jinan” rijuriwarqan nisqanwan? Yaqapas kaykunamantan nishanman karqan.

Cristianoman tukupusqanqa mana piensaymi qonqay karqan. Qonqay wawa naceqtinqa tayta-mamakunaqa nishutan mancharikunku chaypaq mana allin preparasqachu kashasqankurayku. Chaymi apóstol Pablowanpas pasarqan. Payqa manan piensarqanku ñanpi Jesusta rikunanpaqqa, payqa Damasco iñiq t’aqapi kaq cristianokunata qatikachaqmi risharqan. Chaymi chaypi kaq cristianokunapas admirakurqanku apóstol Pablo qonqaymanta cristianoman tukupusqanmanta. Chaymantapas Jesusta rikusqan qhepamanqa askha p’unchaykunan apóstol Pabloqa ñausayapurqan (Hech. 9:1-9, 17-19).

Cristiano kapusqanqa “manaraq tiemponpin karqan”. Griego rimaypin “manaraq nacenanpi naceq wawakunataqa” manaraq tiemponpi naceq wawakunata nikun. Traducción Kadosh Israelita Mesiánica de estudio Bibliapipas khaynatan nin: “Manaraq tiemponpin nacerqani”, nispa. Cristianoman Pablo tukupushaqtinqa Jesusqa janaq pachapiñan kasharqan. Payqa manan jujkuna jinachu Jesuspa kausarimpusqanta rikurqan, payqa qhepatañan rikurqan (1 Cor. 15:4-8). Manaña chay p’unchay Jesusta rikunanpaq piensarqanchu chaypas manaraq tiemponpin Jesusta rikurqan. Yaqapaschá apóstol Pabloqa chaymanta rimashanman karqan.

Juch’uyaykukuq kasqanraykupaschá chaytaqa ninman karqan. Wakin estudiaq runakunaq nisqanku jina “manaraq nacenanpi naceq wawa jina” nispaqa nishanman karqan jujkunamanta juch’uypaq qhawarikusqanraykun. Yaqapaschá apóstol Pabloqa k’umuykukuq kasqanta rikuchishanman karqan. Chaypaschá juj kutipi pay kikin nirqan: “Noqaqa apostolkunamanta aswan juch’uy kaqmi kani, manataqmi “apóstol” nisqa kanaypaq jinapaschu kani Diospa iñiq t’aqanta qatikachasqayrayku. Ichaqa Dios ancha sumaq sonqo kasqanraykun kay llank’anapi kashani”, nispa (1 Cor. 15:9, 10).

Chhaynaqa, yaqapaschá apóstol Pabloqa “manaraq nacenanpi naceq wawaman jinan” rijuriwarqan nispaqa nishanman karqan cristianoman tukupusqan mana piensay qonqay kasqanrayku, qonqay Jesustapas rikusqanrayku. Chaymantapas cristiano kapusqan “manaraq tiemponpi” kasqanrayku otaq juch’uypaq qhawarikusqanrayku. Imaynaña karqan chaypas Jesusta rikuspan payqa cristianoman tukupurqan, payqa seguron kasharqan Jesuspa kausarimpusqanmanta, chayraykuchá payqa mana iskayaspa Jesuspa kausarimpusqanmanta jujkunamanpas willarqan (Hech. 22:6-11; 26:13-18).