¿Yacharankichu?
¿Imanaqtinmi allin karan Israel runakuna iskay clase phalaq animalta Diosman jaywayta atisqanku?
JEHOVÁ Diosmi Israel runakunata kamachiran kullkutapas otaq urpitapas sacrificiopi payman jaywanankupaq. Chay animalkunata Diosman jaywanankupaq kamachishaqtinqa iskayninmantan sapa kutilla rimaq. Chaymi Israel runakunaqa mayqentapas jaywayta atiranku (Lev. 1:14; 12:8; 14:30). Chhaynata Diospa kamachisqanqa allinpunin karan wakin killakunapi kullkuta sasata jap’iyta atisqankurayku.
Kullku
Kullkukunaqa q’oñi tiempollapin Israel llaqtapiqa tiyaqku, chiri tiempo qallariqtinmi ichaqa maypichus q’oñi tiempo kasqanman viajaqku, Israel llaqtamanqa kutimuqku q’oñi tiempollapin (Cant. 2:11, 12; Jer. 8:7). Chaymi Israel runakunaqa chiri tiempopi sasata kullkukunata tariqku.
Urpi
Urpikunaqa tukuy tiempon Israel llaqtapi tiyaqku. Chaymantapas Israel runakunaqa wasinkupin urpikunata uywaqku (tupanachiy Juan 2:14, 16). Juj investigaq runan nin: “Israelpa llapa llaqtankunapi runakunaqa urpikunatan uywaqku. Paykunaqa wasinkuq perqanpin t’oqokunata ruwaqku chaypi urpikuna q’esachakunankupaq”, nispa (tupanachiy Isaías 60:8).
T’oqonpi kaq urpi
Chay kamachikuyta qospan Jehová Diosqa rikuchisharan munakuq khuyapayakuq kasqanta. Chaymi Israel runakunaqa watantin kullkutapas otaq urpitapas Diosman sacrificiopi jaywaqku.