Umalli T’aqaq cartan

Munasqa llank’aqmasiykuna:

Ancha kusisqan kay cartata qelqamuykichis. Manaraq 2014 wata tukushaqtinmi Reyninchis Jesusqa pachak wataña enemigonkuna ukhupi kamachikusqan hunt’akunqa (Sal. 110:1, 2).

Sapa watanmi Umalliq T’aqaqa huk hatun huñunakuyta ruwan, 2013 watapin chay huñunakuy aparikurqan 5 octubre killapi, chay huñunakuypin Traducción del Nuevo Mundo nisqamanta encargakuqkuna inglés simipi revisasqa Bibliata qorqanku. Soqta chunka wata ñawpaqtan Jehová Diosqa hanaq pachapaq akllasqa wawankunawan t’ikrachirqan Traducción del Nuevo Mundo nisqa Bibliata (Rom. 8:15, 16). Chayraykun chay Bibliaqa aswan allin t’ikrasqa kashan huk Bibliakunamanta.

Yachachikuykuna Qelqaymanta Encargakuqkunan (Comité de Redacción) astawanqa kallpachakurqanku Biblia t’ikraypi. Chaymi Traducción del Nuevo Mundo nisqa Biblia 121 simikunapi hunt’asqata otaq huk partenta t’ikrakushan. Llapallaykichistan kallpachaykiku Jehová Dios qowasqanchis Bibliata sumaqpaq hap’inaykichispaq. Sapa p’unchay chayta leespa yuyaymanaspan astawan Jehová Diosman asuykunkichis (Sant. 4:8).

Anchatan llakikuyku iñiqmasikunaq ñak’arisqankumanta yachaspa, chaypaschá mana huk iñiqmasikuna hinachu mayninqa kusisqa kashankuman. Huk iñiqmasinchispa esposanmi qonqaylla onqorapurqan, hinan llapan cuerpon mana kuyuripurqanchu, doctorkunapas mana ima ruwayta atirqankuchu. ¡Chhaynapi tarikuyqa sinchi llakikuymi! Kunanqa qosanmi ch’isiyaqta cuidan, qhari wawanwan iskaynin warmi wawanwantaq sumaqta yanapanku. Kay familia hinan, qankunapas wawqe-panaykuna imaymana llakikuykunata kusikuywan aguantashankichis (Sant. 1:2-4). Hanaq pachapaq akllasqakunaña kasunman otaq wak ovejakunamantaña kasunman chaypas, hamuq tiempopi ancha kusisqa kasunchis sasachakuykunata aguantasqanchismanta, ¿imarayku? Wiñay kawsayta Jehová Dios qowasqanchismanta (Sant. 1:12).

2013 watapin Jesuspa wañupusqanta yuyarina huñunakuyman 19.241.252 runakuna hamurqanku. ¡Anchatan kusikunchis askha runakuna kay hatun huñunakuyman hamuspa Jehová Diosta Jesustapas hatunchasqankumanta! Maytan kusikullanchistaq iskay millón más iñiqmasikuna marzo, abril killakunapi precursor auxiliar kasqankumanta, chay ruwasqankuwanmi huk hinalla Jehová Diosta hatuncharqanku. Watukuq umalliq hamusqan killakunapi precursor auxiliar kaqkunaqa precursor regularkunaq huñunakuyninpi qallariymanta tukukuykama kanqaku, chaywanqa kusikullanchistaqmi. Allin yuyayniyoq iñiqmasikunaqa yachankun predicacionman, Dios servispa huk ruwaykunamanpas tiemponkuta qoyqa allinpuni kasqanta. Chay ruwasqankun yanapanqa iñiyninkupi allinta sayanankupaq Satanaspa trampankunamanpas mana urmanankupaq (1 Cor. 15:58).

Chaymantapas setiembre 2012 watamanta agosto 2013 watakaman 277.344 runakuna bautizakurqanku, chaymi kunanqa ñoqanchiswan kuska wiñay kawsayman apaq ñanpi purishanku (Mat. 7:13, 14). Kay mosoq iñiqmasikunaqa necesitankun iñiyninkupi allin ‘takyasqa kanankupaq’ yanapananchista (Col. 2:7). Chay hinaqa yanapanakusun tukukuykama aguantananchispaq (Mat. 24:13). Bibliapin niwanchis: “Manchalikunata yanapaykuychis, pisi kallpakunata kallpachaykuychis, hinallataq llapapaqpas pacienciayoq kaychis”, nispa (1 Tes. 5:14). Chaymantapas tukuy sonqowan Diosta mañakushallasun: “Gobiernoyki hamuchun”, nispa (1 Tes. 5:17; Mat. 6:10, NM).

Kallpachaykikun Anuario 2014 librota leenaykichispaq, tukuy sonqowanmi sapankaykichista munakuykichis.

Iñiqmasiykichiskuna,

Jehová Diospa testigonkunata Umalliq T’aqa