Ama ch’usaqman saqmasunchu
1. ¿Imaynatan 1 Corintios 9:26 textoq nisqan yanapawasunman?
1 Pablon qelqarqan: “Ñoqapas chay hinatan phawani, ichaqa manan ñawsa hinachu. Chay hinatan maqanakuni, ichaqa manan ch’usaqman saqmaq hinachu”, nispa (1 Cor. 9:26). Chaypi nisqan hina ima ruway munasqanmanmi aypaytapuni munarqan. Kay tiempopipas Pabloq nisqanqa yanapawasunmi predicayninchispi, arí, munanchismi ‘saqmasqanchis’ otaq kallpachakusqanchis allinpipuni tukunanta. ¿Imaynatan ruwasunman?
2. ¿Imaynatan predicasunman Pablo hina ñawpa cristianokuna hina?
2 Askha runakunaq kasqanman risun. Pablopas ñawpa tiempopi iñiqmasikunapas askha runakunaq kasqanmanmi predicaq riqku (Hech. 5:42; 16:13; 17:17). Sichus predicasqanchispi runakuna ch’isintaña wasinkupi tarikunkuman chayqa, yaqapaschá chay horaspi predicasunman. Paraderokunapiqa askha runakunan tarikunku llank’anankuman rinankupaq otaq wasinkuman kutinankupaqpas, ¿predicakunmanchu chaykunapi? ¿Ima horaspitaq mercadokunapi runakuna tarikunku? Chay horaskunapi predicayqa allinpunin kanman.
3. ¿Imaynatan allin yuyaywan huk cheqaspi predicasunman?
3 Allin yuyaywan huk cheqaspi predicasun. Kallpachakusqanchis allinpuni kananpaqqa qhawarinanchismi predicación imayna aparikusqanta. Sichus huk cheqaspi predicamunankupaq askha iñiqmasikunata kamachikun chayqa, sasan kanman allinta aparikunanpaq. Chhaynaqa, ¿manachu pisillapi t’aqawaq? Sichus pisi predicaqkunata huk huch’uy llaqtaman kamachikunqa chayqa, ratullan ruwanqaku hinaspapas askha runakunawanmi rimanqaku. Chaymantapas, ¿mañakusunmanchu wasinchis cercallapi predicananchispaq? Chhaynapin manaña tiempota usuchisunchu karuman rispa.
4. ¿Iman yanapawasun ‘runakuna challwaypi’ allin kanapaq?
4 Jesusmi predicaqkunata nirqan: ‘Runakuna challwaq [kankichis]’, nispa (Mar. 1:17). Allin challwaqqa manan llikanta comuntachu wikch’uyun, aswanpas tukuy atisqantan ruwan challwata hap’inanpaq, chaymi allinta qhawarin ima horas may cheqaspis allin kanman chayta, hinan tiemponta mana usuchispa challwayta qallarin. Chhaynapin kallpachakusqanqa allinpi tukun. Ñoqanchispas chay hinatan kallpachakunanchis (Heb. 6:11).