Tapuykuna

◼ Mayninpiqa telefonopin uyarichinku huñunakuypi yachachikusqata, ¿imaraykun chayta allin yuyaywan ruwana?

Mayninpin wakin iñiqmasinchiskuna mana huñunakuyman hamuyta atinkuchu, onqosqa kasqankurayku otaq imapas kaqtin; paykunapaqmi askha Huñunakuy Wasikunapi telefonota churachinku chhaynapi wasillankumanta huñunakuypi yachachikusqata uyarinankupaq. Chhaynata telefonopi uyarichisqankuqa allinmi, ichaqa allin yuyaywanmi chayta ruwana, asegurakunataqmi necesitaqkunallapaq ruwakunanpaq. Chayraykun encargasqa umallikunaqa allin yuyaywan chayta ruwananku, chhaynapi tukuy imapas “maychus ruwanaman hinapuni” allinta ruwakunanpaq (1 Cor. 14:40).

Pikunachus onqoyninkumanta mana qhaliyayta atinkuchu otaq sapa kutilla imawanpas onqonku, otaq mana wasinkumanta lloqsiyta atinkuchu paykunatan ñawpaqtaqa telefonopi uyarichina, chaytan umallikuna asegurakunanku. Wakin iñiqmasinchiskuna otaq iñiyninpi allinta wiñashaq estudiantekunapas mayninpi sinchita onqosqankurayku mana hamuyta atinkuchu, paykunapaqpas ruwakunmanmi chayta. Llapa telefonopi uyariqkunataqa huñunakuypipas kashankuman hinan yupana. Sichus mana atikunmanchu llapa mana hamuy atiqkunata telefonopi uyarichiyta chayqa, casetepi otaq imapipas grabakunmanmi huñunakuypi yachachikusqata, hinaspa chayta paykunaman qonkuman.

Chaywanpas telefonopi discursokunata uyariyqa manan huñunakuypi kay hinapunichu. Huñunakuykunallapin iñiqmasinchiskunawanqa allinta kallpachanakusunman. Chaymi chayllaraq hamuqkunapas mana faltakunankuchu huñunakuykunaman. Huñunakuypi kaqtillanchismi allinta yachanchis demostracionkunamanta, umallikunapas huñunakuypin astawan yanapawanchis; chayllapitaqmi munakuywan iñiqmasinchiskunawan kallpachanakunchis. Huk kutinmi huk hermanata sumaqta abrazaykusqaku huñunakuy tukuyta, chaymi payqa nisqa: “Telefonollapi uyariyman karqan chayqa, manan abrazaykuyta atiwankumanchu karqan”, nispa. Chay hermanaqa sut’illantan chaytaqa nisharqan (Rom. 1:11, 12).

Imaynan Anapas manapuni faltakuqchu Dios yupaychana wasiman riyta, chhaynallataqmi kanku askha kurak iñiqmasinchiskunapas. Paykunaqa tukuy atisqankutan ruwanku huñunakuykunaman hamunankupaq (Luc. 2:36, 37). Sinchi onqosqa kaqtinku otaq manapuni hamuyta atillaqtinkun telefonollapiña uyarinku huñunakuypi yachachikusqata, ichaqa manan aswan allinpaq hinachu chayta qhawarinku. Chhaynaqa paykuna hina kallpachakushallasun llapa huñunakuykunaman hamunanchispaq, chhaynapi Jehová Diosninchista hatunchananchispaq (Sal. 95:1-3, 6; 122:1).