Bibliamanta allin yachachiq kasun
1. ¿Imaraykun allinpuni Bibliawan yachachiy?
1 Sichus Bibliata allinta reqsisunchis chayqa, allintan Diosmanta yachachisun; pantasqa yachachikuykunatapas, runakunaq costumbrenkunatapas allinta sut’inchasun (2 Tim. 2:15; 1 Ped. 3:15).
2. ¿Iman yanapawasun ratulla textokunata tarinanchispaq?
2 Allinta Bibliata reqsiy: Sichus ima maquinatapas sapa kutilla utilizasun chayqa, yachasunmi imayna manejanata, allintataq reqsisunpas. Chhaynallataqmi Bibliawanpas sapa p’unchay leesunchis qallariymanta tukukuykama chayqa, manan imakuna yachachisqallanmantachu yachasunchis, aswanpas askha textokunata umanchispi hap’isunchis, chaymantapas faciltan ima textotapas tarisunchis. Chaymantapas Bibliamanta yachayninchista yapaspaqa, piwanpas maypipas mana manchakuspan rimasun, wasin-wasintapas predicasun (1 Tes. 1:5).
3, 4. a) ¿Imatan ruwasunman Bibliata allinta reqsinanchispaq? b) ¿Imakunan yanapasunki astawan Bibliata reqsinaykipaq?
3 Huñunakuykunapi Bibliata leekuqtinqa Biblianchista kicharispan maskhananchis chay textota, hinaspa qatipananchis leesqata. Chaymantapas sapankanchis Bibliata estudiaqtinchis otaq huñunakuypaq preparakuqtinchisqa maskhananchismi mana copiasqa textokunata, chaymantataq tapukunanchis: “¿Imaynatan kay textokuna tupan estudiasqay temawan? ¿Imaynatan kawsayniypi yanapawanman?” nispa. Chaymantapas askha iñiqmasinchiskuna computadorankupi otaq chaymanta horqosqa textokunata leenankumantaqa kikin Bibliamantapunin leenku, chaymi paykunata yanapan predicacionpi ratulla textokunata tarinankupaq (Juan 14:26).
4 Wakin familiakunan tiemponkuta t’aqanku askha textokunata umankupi hap’inankupaq. ¿Imaynatan chayta ruwanku? Huk tarjetapi anotanku textokunata qhepanpitaq chay textokunaq ima nisqanta qelqanku. Chaymantataq huk ladollanta qhawaspa turnanakuspa ninku mayqen textochus kasqanta. Chaymantapas demostracionkunatan ruwakunman predicacionpi tapukuykunata Bibliawan imayna kutichinamanta.
5. ¿Imaraykun kallpachakunanchis Bibliamanta allin yachachiq kanapaq?
5 Bibliamantaqa manan ima libropas aswan allinqa kanchu, Bibliallan pimanpas ‘yachayta qon’ salvakunanpaq (2 Tim. 3:15). Ichaqa yaqa llapan runakunan mana yachankuchu Bibliapi yachachikuykuna ancha chaniyoq kasqanta, chaymi allinta preparakunanchis paykunaman yachachinanchispaq (Pro. 2:1-5).