Umalliq T’aqaq apachimusqan carta
Ancha munasqa wayqe panaykuna:
Ancha kusikuywanmi kay cartata apachimuykichis. Ñoqaykupas apóstol Juan hinan qankunata “cheqaqtapuni munakuykichis”. Chaymantapas payqa kusikuqmi cristianokuna “cheqaq-kaypi purishasqanta rikuspa” (2 Juan 1, 4). ¡Ima munaymi cheqaq yachachikuyta yachayqa! Chay yachachikuyta yachasqanchisraykun manaña Hatun Babiloniapichu kashanchis nitaq pantasqa yachachikuykunatapas creenchisñachu. Chaymantapas chay yachachikuyta kasukuspaqa munakuq, khuyapayakuq kaytan yachachiwanchis. Chay yachachikuyllataqmi yanapawanchis Dioswan allinpi kananchispaq, qhepa tiempopi sumaq kawsayta suyakunapaqpas.
Ñoqaykuqa, anchatan kusikuyku Jehová Dios santo espiritunwan sapa p’unchay yanapawasqanchismanta. Imaynata yanapawasqanchismantan yacharanchis “Diospa santo espiritunwan yanapachikusun” nisqa, kinsa p’unchay hatun huñunakuypi, chaypiqa kusisqachá kasharankichis. Kay millay kawsaypa tukukuynin chayamunankamaqa imaymana mana allinkunan kanqa, chaymi Diospa espiritullanpi confiashananchis, chhaynapin imatapas allinta aguantasun.
Anuario nisqa librota leespan yachanchis huk lado nacionkunapi hermanokuna imaymana mana allinkunapi tarikusqankuta, ¿manachu chayta yachasqanchis sonqonchistaraq kuyurichin? Wakin chay hermanokunamantaqa chayraqmi bautizakuranku wakintaq manaraq ni bautizakusqakupaschu. Chhaynaña kaqtinpas paykunaqa qaqa hinan karanku iñiyninkupi. ¡May allinmi chay ruwasqankuqa karan! ¿Manachu chayta yachasqanchis kallpachawanchis imaña kaqtinpas tukuy sonqowan Diosta servishanallanchispaq? (1 Tes. 1:6-8.)
Wayqe panaykuna, ñoqaykuqa allintan reparashayku kay sasa tiempokunapi imaymana sasachakuykuna kasqanta. Yachaykun pisiña qolqe kaqtinpas familiapi ima sasachakuyña kaqtinpas tayta mamakunaqa familianku hukllachasqa kananpaq kallpachakunanku kasqanta. Chaykuna kasqanraykun wakinpaqqa sasa kanman Diospa Gobiernonmanta predicay, Diospa wasinpi imaymana ruwanakunata yanapakuypas. Chaykunata reparaspan ñoqaykuqa allinta estudiaspa Diosmanta mañakuspa ima decidirayku huñunakuykuna amaña ñawpaqpi hinañachu kananpaq, aswanpas 2009 wata 1 p’unchay enero killamantapacha cambiananpaq. Ñoqaykuqa maytapunin munayku familiaykichiswan kuska chaymantapas sapallaykichispi allintapuni Bibliata estudianaykichista.
Maytan kusikuyku askha runakunaq bautizakusqanmanta, astawanqa wawakunaq bautizakusqanmantan kusisqa tarikuyku. Wawakunaq bautizakusqanqa tayta mamakunaq kallpachakusqantan rikuchin, chayrayku allinmi wawaykichista huch’uychanmantapacha Dios munakuyta, paypaq hina kawsayta yachachisqaykichisqa. Wawakuna imaymanapiña escuelankupi tarikunku chaypas qankunachá yanapashankichis allinlla kanankupaqqa (Sal. 128:1-6).
Chaymantapas kusikuywanmi willaykichis Bibliamanta estudiaqkuna askhaman yapakusqanmanta, chaypaqqa misionerokuna precursor especial nisqakuna iman astawanqa llank’aranku. Umalliq T’aqapi kaqkunaqa ancha allinpaqmi qhawariyku llapa hermanokuna tukuy sonqowan llank’asqankumanta, chaypi llapa llank’aqkunan nishanku “Kawsay unuta ukyay munaqqa mana qolqellawan ukyachun”, nispa (Apo. 22:17). Chaymantapas tukuy sonqowanmi chaskiyku pachantinpi 289.678 bautizasqa hermanokunata, paykunan qayna wata bautizakuranku.
Chaymantapas ancha allinpunin apóstol Juanpa nisqanta yuyariyqa. Paymi niran: “Kay pachaqa tukukapushanmi, tukuy imaymana mana chanin munayninkunapiwan. Diospa munayninta ruwaqmi ichaqa wiñaypaq kawsanqa”, nispa (1 Juan 2:17). Arí, chay nisqanqa cheqaqpunin “kay pachaqa tukukapushan[ñan]”, chaymi kallpachakushananchis Diospa munayninta ruwananchispaq ‘makillataq kashananchispas’ (Mat. 24:42). Chayta ruwasun chayqa, kusisqallan kasunchis chaymantapas Diospa bendicionninkunatan chaskisunchis (Isa. 63:7).
Anuario nisqa libropin willakushan askha llaqtakunapi hermanokuna imaymanapi tarikusqankumanta. Chaykuna qankunatapas kallpachanasuykichistan munayku, chhaynapi Diospa munayninta astawan ruwashanallaykichispaq. Wayqe panaykuna qankunataqa yuyarishallaykichispunin, ñoqaykuqa mañakushallaykun allinlla kashanaykichispaq. Papanchis Jehová Dios qankunallawan kashachun.
Kayta apachimushaykiku
Umalliq T’aqa hermanoykichiskuna