¿Yanapachikushankichu Razonamiento nisqa librowan?
1. ¿Imaynatan Pablowan Jesuswan yachachiranku?
1 Apóstol Pabloqa kallpachakuranmi “Diospa Simin Qelqakunamanta” runakunawan tapunakuspa rimananpaq (Hech. 17:2, 3; 18:19). Imaynan Jesuspas Diospa Simin qelqakunamanta imaymanakunata yachachiq, rikch’anachiy simikunawantaq uyariqninkunaman Diospa munayninta entiendechiq, chhaynatan apóstol Pablopas yachachiran (Mat. 12:1-12). Paykuna hina yachachinanchispaqmi Razonamiento a partir de las Escrituras nisqa libro yanapawasun.
2. ¿Imaynan predicayninchis kanqa Razonamiento nisqa librowan yanapachikuqtinchis?
2 ¿Imaynatan predicayta qallarisunman? Razonamiento nisqa libropi 9 paginamanta 15 paginakaman yachachiwanchis runakunaman imayna predicayta qallarinapaq. Chay yachachikuykunamanta askhatan umanchispi hap’inanchis chayman hina predicanapaq, chhaynapin mana kaqllatachu llapa runakunaman predicasunchis (chayqa allinmi kanman sapa kutilla chay territoriota predicakun chayqa). Chaymantapas paykunapaq hinan predicayta atisunchis, aswan allintataq parlatapas paykunawan tupachisunman.
3. ¿Imaynatan yanapawasunman Razonamiento nisqa libropi 16-21 paginakuna?
3 ¿Rimasqanchista tatichiqtinkuri? Manaraq predicaq rishaspan qhawarisunman 16-21 paginata, hinaspa tapukusunman: “¿Imanispan wakin runakuna predicasqayta tatichiyta munankuman?” nispa, chaymantataq chay paginakunata t’aqwispa preparakusunman chay nisqankuman kutichinanchispaq.
4. ¿Imaynatan Razonamiento nisqa libro yanapawasunman sasa tapuykunata kutichinapaq?
4 ¿Imaynatan kutichisunman tapuwaqninchiskunata? Razonamiento nisqa libroqa yanapawasunmanmi sasa tapuykunata kutichinapaq. ¿Imatan chaypaq ruwana? Predicasqanchis runamanmi nisunman: “Chay tapuwasqaykimantan willashan kay libro”, nispa. Hinaspa Razonamiento nisqa librota qhawachisunman. Chay libropi yachachikuykunaqa qallariy paginanpi huk listapin rikhurin, chayta qhawarispan hukninta akllasunman hinaspa ima paginapichá chay yachachikuymanta rimashan chayta maskhasuman, chayta tariruspataq chaypi kaq tapuykunata ratulla qhawananchis. Manachus munasqanchista tarisunchis chayqa, chay libroq tukukuy paginanpi índice nisqatan qhawarinanchis. Runaq tapukusqanta chaypi tariqtinchisqa kikin libromantan leenanchis. Sichus Bibliapi huk versiculomanta tapuwanchis chayqa, 445 paginapi “Textos bíblicos que suelen aplicarse mal”, nisqatan maskhananchis.
5. ¿Imakunapaqwanmi allin kanman Razonamiento nisqa libro?
5 ¿Imakunapaqwanmi allin? Wakin cristianomasinchiskunan Razonamiento nisqa librota apanku escuelankuman otaq llank’anankuman, chhaynapi pipas fiestakunamanta otaq imamantapas tapukuqtinku chay librowan kutichinankupaq. Chaymantapas chay libropi “Creación”, “Evolución” nisqa temakunaqa askha wayna sipaskunatan yanaparan tareankuta ruwanankupaq. Chay libropin tarikullantaq “Estímulo” nisqa tema, chaypi textokunaqa allinpunin kanman onqosqakunata, wañupuq familianmanta llakisqakunatawan kallpachanapaq. Chaymantapas Razonamiento nisqa libroqa ancha allinpunin discursokunata preparanapaq, hinallataq predicanapaq huñunakuykunapi yachachinapaqwan.
6. ¿Imayna predicaqkunan kananchis?
6 Manan yachachisqanchiswan hukkunaq nisqanta upallachinapaqchu ñoqanchisqa predicanchis, nitaq imaymanakunamanta yachachinallapaqchu, aswanpas runakunawan tapunakuspa Diospa Simin qelqakunamanta allinta yachachinapaqmi. Chayraykun Razonamiento nisqa librowan yanapachikunanchis, chhaynapin yachachikuyninchisqa allin kanqa (1 Tim. 4:16).