Allin sayashaq pukarakunata thunisun
1 Pachak-pachak watakuna ñawpaqmantañan Satanasqa pantasqa yachachikuykunawan runakunaq yuyayninta tutayachishan sonqonkutapas rumiyachishan. Kaymi chay wakin yachachikuyninkuna: almaqa mana wañuqmi, kinsan Diosqa, nina rawraypin millay runaqa ñak’arin. Hinaspapas runakunatan iskayachin Diospi Bibliapipas mana iñinankupaq. Runakunatan tanqan hukniray kasqankurayku cheqninakunankupaq, suyunkuta sinchita munakunankupaqwan. Chaykunan runakunaq yuyayninta tutayachin cheqaq kaqta mana yachanankupaq (2 Cor. 4:4). ¿Imaynatan allin pukarakunaman otaq torrekunaman rikch’akuq yachachikuykunata thunisunman? (2 Cor 10:4, 5.)
2 Sonqonkupi saphichasqa kashan: Runakunaqa huch’uyninkumantapachan imaymana yachachikuykunapi iñiranku, chaymi yaqa llapa runakunaq sonqonkupi chaykuna saphichasqa kashan. Paykunata yanapayta munanchis chayqa respetananchismi yuyaykusqankuta (1 Ped. 3:15).
3 ¿Imapin iñinku? ¿Imarayku chaypi iñinku? Chaykunamanta willakusqankutan makilla uyarinanchis, chaypin rikuchisun paykuna respetasqanchista (Sant. 1:19). Yaqapaschá pillapas munakusqan runa wañupuran hinaspa hukmanta rikuyta munaspa almaqa manan wañunchu nisqa yachachikuypi iñin. Otaq familianwan huñunakuyta munaspa pantasqa religionpi fiestakunata yuyarin. Willakusqanta allinta uyarispan yachasun sonqonpi ima yuyaykusqanta chayman hinataq allinta yanapasun (Pro. 16:23).
4 Jesusta qatikusun: Kamachikuy Simita yachachiq runaman Jesuspa kutichisqanmi allinta yanapawasun. Chay runaq iñisqanqa sonqonpin saphichasqa kasharan chaymi hukllapi kutichinman karan chayqa manapaschá uyarinmanchu karan. Chaymi Jesusqa ñawpaqta Qelqamanta willariran, chaymanta ima yuyaykusqanta tapuran chaymantataq huk rikch’anachiyta willaran allinta yuyaymanananpaq (Luc. 10:25-37).
5 Pantasqa religionkunaq yachachikuynin runakunaq sonqonpi imayna saphichasqaña kanman chaypas Diospa Simin Qelqaqa t’iranmanmi saphinmantapacha chay yachachikuykunata (Heb. 4:12). Sichus pacienciawan runakunaq sonqonman chayaqta yachachisun chayqa cheqaq kaqtan munakunqaku, pantasqa yachachikuytataq cheqnikunqaku (Juan 8:32).