¿Imatan ruwananchis huk simi rimaqta predicaqtinchis?
1. ¿Iman sucedenman predicasqanchis llaqtapi huk simi rimaqkuna kaqtin?
1 Predicaqtinchisqa sapa kutillanmi tupanchis huk simi rimaqwan, wakinqa allintan uyarikunku predicasqanchista. Paykunata yanapanapaqmi Sucursal wasimanta kamachimunku wayqe panakunata chay runakunaq rimasqanku simipi huñunakuykunata ruwanankupaq predicanankupaqpas. Sichus predicasqanchis llaqtapi huk simi rimaqkuna kan chayqa, yaqapaschá huk simipi predicaq wayqe pananchiskunapas kaq predicasqanchis cheqaspi predicankuman. Chhayna kaqtinqa, ¿imatan ruwasunman mana chhaqrusqa predicanapaq? (1 Cor. 14:33, NM.)
2. ¿Imatan ruwasunman predicasqanchis llaqtallapitaq huk simi rimaq wayqe pananchiskunapas predicaqtinku?
2 Huk yuyaylla llank’asun: Callekunapi maypipas predicaspaqa piwanpas rimasunmanmi huk simitaña rimaqtinpas; munasqan rimaypitaq librokunata revistakunatapas qosunman. Ichaqa, wasin wasinta predicaspaqa predicananchis simillapin predicananchis, chay simi rimaqkunallatataq maskhananchispas. Superintendente de servicio umalliqmi sumaqta rimanakunan huk simipi predicaq wayqe pananchiskunaq umalliqninwan, allintataq anotananku may cheqaspi predicanankupaq (Pro. 11:14). Sichus predicasqanchis llaqtapi mana kanchu huk simipi predicaq wayqe pananchiskuna chayqa, ¿imatan ruwasunman huk simi rimaq runata tarispa? Kallpachakunanchismi chay runata predicananchispaq, astawan yachayta munaqtintaq yanapashanallanchis.
3. ¿Imatan ruwasunman kaq cheqasllapi huk simipi predicaq wayqe pananchiskunawan tupaspa?
3 Kaqllan llank’ananchisqa: Sichus huk simipi predicaq wayqe pananchiskuna kaq predicananchis cheqaspi, kaq p’unchayllapitaq predicashankuman chayri, ¿imatan ruwasunman? Chhayna kaqtinqa, munakuywan llamp’u sonqo kaywanmi umalliqkuna rimanakunanku maypichus sapanka t’aqa predicanankupaq. Chaypaqqa qhawarinanku chay cheqaspi mayqen simipi rimanapaq aswan allin kanman chayta, chayman hinataq ninakunkuman mayqen t’aqa huk cheqasman rinanpaq (Juan 13:34, 35; Sant. 3:17, 18).
4. ¿Bibliaq ima willasqanmi kay tiempopi hunt’akushan?
4 Bibliaqa willaranña tukuy t’aqa rimaqkuna allin willakuykuna uyarinankuta (Apo. 14:6, 7). Sichus allinta rimanakuspa huk sonqolla llank’asun chayqa, manañan huk simipi predicaq wayqe pananchiskunaq predicasqanta hukmanta predicallasuntaqchu, chhaynapin aswan askha runakunaman allin willakuykunata chayachisun, tukuy t’aqa rimaqkunataq allin willakuykunata uyarinqaku (Efe. 4:16).