¿Familiaykiwan kuskachu preparakushanki Diospa phiñakuynin p’unchaypaq?
1 Biblian willan pisi tiempollamanta kay pachaman Diospa phiñakuynin chayamunanta. Noepa tiemponpi hina sasa kawsaymi kashan (Mat. 24:37-39). Noeqa “Diospa munayninta ruwaspallapunin kawsarqan”, chaymi mana huk runakuna hinachu wañuran (Gén. 6:9). Payqa yanaparanmi familianta Diospa munayninta ruwaspallapuni kawsanankupaq, chaymi paykunapas mana wañurankuchu. Ñoqanchisri, ¿imaynatan familianchiswan kuska preparakusunman Diospa phiñakuynin p’unchaypi mana wañunanchispaq?
2 Chanin kawsaymanta willaqmi karan: Noeqa mana saqespan phisqa chunka wata hina ‘chanin kawsaymanta runakunaman willaran’ (2 Ped. 2:5). Maytachá runakunaqa Noeta asipayaranku predicasqanmanta, runaman tukuq angelkunapas kallpacharankuchá chay asipayaqkunata. Kay tiempopipas kaqllatataqmi runakuna ruwashanku, chaywanmi yachanchis Diospa phiñakuynin p’unchay chayamunanpaqña kashasqanta (2 Ped. 3:3, 4). Ichaqa Noepa tiemponmantaqa kunanmi askha runakuna predicasqanchista kasukuspa Jehová Diosta servishanku (Isa. 2:2). Diospa phiñakuynin p’unchaypi mana wañunanchispaq, uyariqninchiskunapas mana wañunankupaqqa predicashanallanchismi (1 Tim. 4:16). Chayrayku, tayta mamakuna, rimayniykichiswan ruwayniykichiswanpas wawaykichiskunata yachachiychis usqhaylla predicana tiempo kasqanta (2 Tim. 4:2).
3 “Diospa tukuy kamachisqanman hina ruwarqan”: Noewan familianwan mana wañunankupaqqa Jehová Diospa tukuy kamachisqantan kasukunanku karan (Gén. 6:22). Ñoqanchispas llapantan kasukunanchis Bibliaq nisqanta allin yuyayniyoq hunt’aq kamachi nisqantapas (1 Juan 5:3). Huk cristianon soqta wawayoq karan. Payqa qelqanchiskunapi huñunakuykunapi yachachikusqataqa kasukullaqpunin karan. Chaymi sapa semana familianwan Bibliata estudiaq, predicacionmanpas sapa semana tukuyta wawakunantin lloqsiq, hukninwan hukninwantaq sapa lloqsisqanpi predicaq. Diospa “tukuy kamachisqanta” kasukusqanraykun soqtantin wawankuna Jehová Dios serviq kapunku.
4 Diospa phiñakuynin p’unchayqa qonqayllan chayamunqa (Luc. 12:40). Sichus Noé hina familiantin Diosta kasukusun, iñiyniyoqtaq kasun chayqa, manan wañusunchu chay p’unchay chayamuqtin (Heb. 11:7)