“Agradecekuq kaychis”
1 Jesusqa chunka runakunatan qhaliyachiran lepra onqoyninmanta, ichaqa huknillanmi agradecekuran. Hinan Jesusqa tapuran: “¿Manachu qhaliyasqakunaqa chunka karqanku? ¿Maypitaq isqonri?” nispa (Luc. 17:11-19). Chay willakuymi yachachiwanchis agradecekuq kananchispaq, chaymi agradecekunanchis qoykukuq munakuq Jehová Diosninchista ‘tukuy allin kaqkunamanta, tukuy chanin kaqkunamantapas’ (Col. 3:15; Sant. 1:17).
2 ¿Imakunamantan agradecekunanchis? Kacharichiy sacrificiomanta (Juan 3:16); cheqaq kayta reqsisqanchismanta (Juan 6:44); teqsimuyuntinpi huknisqalla kawsasqanchismanta (Sal. 133:1-3), hukkunamantapas. Mana agradecekuq kaspaqa Israel runakuna hinachá Jehová Diospa tukuy imaymana ruwasqankunata qonqapusunman (Sal. 106:12, 13).
3 Agradecekuq kasqanchista rikuchisun: Lepra onqoyniyoqkunamanta ¿hayk’an Jesusta agradecekuranku? Chunkantinkuchá agradecekuranku, ichaqa hukllan agradecekusqanta rikuchiran (Luc. 17:15). Ñoqanchispas agradecekuq kasqanchista rikuchisunman tukuy sonqowan predicaspa. Jehová Diosta tukuy imaymana ruwasqanmanta agradecekusunchis chayqa, kallpachakusunmi runakunaman paymanta willanapaq, chhaynapi rikuchisun pay hina munakuq qoykukuq kasqanchista (Luc. 6:45). Hinaspapas, sichus runakunaman Diospa ‘musphana ruwasqankunamanta’, ‘yuyariwasqanchismantawan’ willasun chayqa, astawanmi Diosta agradecekusun munakusunpas (Sal. 40:5).
4 Hukkunata yanapasun agradecekuq kanankupaq: Makillan kashananchis, chhaynapin wawanchiskunatapas Biblia estudiaqkunatapas yanapasun agradecekuq kanankupaq. Tayta mamakunaqa imaymana ruwasqankupin wawankuta yanapankuman Jehová Diosta agradecekunankupaq, yaqapaschá Diospa kamasqankunata qhawachispa (Rom. 1:20). Estudiota qoshaspapas khaynata tapusunman: “¿Imatan kay Jehová Diosmanta yachachisunki?” nispa. Agradecekuspaqa astawanmi Diosta munakunqa kusichiytataq munanqapas.
5 Kay tukukuy qaylla p’unchaykunapiqa mana agradecekuqmi runakuna kanku, kaqninkutapas mana allinpaq qhawarinku (2 Tim. 3:1, 2). Jehová Diospa kamachinkunan ichaqa agradecekuq kasqankurayku tukuy sonqowan predicanku, ¡maytachá Jehová Diosqa kusikun chayta rikuspa! (Sant 1:22-25.)