Reinomanta allin suyakuyta willasun
1 Kay sasa tiempokunapiqa manan ima suyakuypas runakunapaq kanchu (Efe. 2:12). Wakin runakunan qhapaq kaykunapi, kamachikuqkunapi, ciencia nisqapi hap’ipakunku, chaykunaqa manan ima allin suyakuytapas qonchu. Ñoqanchismi ichaqa cheqaq suyakuyniyoq kanchis, chay suyakuymi “allin churasqata allin takyasqata almanchista hap’in, imaynan anclapas barcota allinta sayachin hinata”. ¡Ancha kusikunapaqmi chayqa! (Heb. 6:19.)
2 Diospa Reinon kamachimuqtinmi kay Hallp’aqa paraisoman tukupunqa. Munakusqanchis runakunapas kawsarinpunqakun (Hech. 24:15). Wakcha kaypas, mana chanin kaypas, onqoykunapas, machu paya kaypas, wañuypas manañan kanqachu (Sal. 9:18; Mat. 12:20, 21; Apo. 21:3, 4). Pisi tiempomantan hunt’akunqa chay promesakuna hukkunapas. ¿Mayqen promesaq hunt’akunantan munawaq?
3 Allin willakuykunaqa willanapaqmi: ¿Allinchu kanman Reinomanta yachasqanchis suyakuykunata hukkunaman mana willay? Manan, Jehová Diosta runamasinchista munakusqanchismi kallpachawanchis Jesús hina ‘wakchakunaman allin willakuykunata willanapaq [...]. Presokunaman kacharisqa kanankuta willanapaq, ñawsakunaman qhawarinankuta willanapaq. [...] Sarunchasqakunamanpas kacharichisqa’ kanankuta willanapaq (Luc. 4:18). Apóstol Pabloqa qhatunakunapipas maypiña runakunaq kasqanpipas allin willakuykunata “willaspallaña purirqan” (Hech. 18:5). Apóstol Pabloq ruwasqanta hina ruwasun chayqa, manan suyakuyninchista pisiyachisunchu kay pachapi ‘afanakuykunawan, qhapaq kaykunawanpas’ (Mar. 4:19).
4 Reinomanta willaqtinchis manaña uyariwasunchu, pisitaña uyariwasun, hark’awasunña chaypas suyakuyninchisqa manan pisiyanqachu, mana iskayaspa ‘suyakuyninchispi qaqata sayasqanchisrayku’, ‘allin willakuykunamantapas mana p’enqakusqanchisrayku’ (Heb. 10:23; Rom. 1:16). Predicashallasun chayqa, mana uyarikuqkunapas uyariwasunmanmi.
5 Predicaspaqa kay pachapi imaymana millay kawsaykunaq kasqanmantan willanchis imaynata chaykunawan Bibliapi profeciakuna hunt’akusqanmantapas, ichaqa manan runakunata wañuyman huchachanapaqchu predicanchis. Aswanmi Diospa Reinonmanta sumaq willakuykunata apanchis. Chhaynaqa, allin willakuykunata kusikuywan predicashallasun ‘suyakusqanchis lliw hunt’asqa kanankama’ (Heb. 6:11).