Tapuykuna

◼ ¿“Allin yuyayniyoq hunt’aq kamachi” allinpaqchu qhawarin wakin Jehová Diospa testigonkuna paykunallamanta huñunakuspa Bibliaq yachachisqanta t’aqwisqankuta? (Mat. 24:45, 47.)

Manan. Chaywanpas, askha llaqtakunapin wakin iñiqmasinchiskuna paykunallamanta t’aqa t’aqapi huñukunku Bibliaq yachachikuyninkunata estudianankupaq. Wakinkunaqa ñawpa hebreo, griego rimaykunatan estudianku, Traducción del Nuevo Mundo nisqa allin t’ikrasqachu kashan icha manachu chayta yachanankupaq; wakintaq cienciamanta Bibliaq willasqanta t’aqwirinku. Internetman rinankupaqpas citanakunku, chaypitaq tapunakuspa chay temakunamanta rimanku. Chaymantapas discursokunata qonku qelqakunatapas ruwanku imaymana t’aqwisqankuta willanankupaq, chaykunawanmi huñunakuyninchiskunapi qelqanchiskunapi yachasqanchista astawanraq mast’ariyta munanku.

Diospa llaqtanqa pachantinpin ancha askha yachachikuykunata kallpachaytapas chaskikunchis huñunakuyninchiskunapi, asambleanchiskunapi, allin yuyayniyoq hunt’aq kamachiq qelqakuna qowasqanchispipas. Jehová Diosmi llaqtanta pusarishan santo espiritunwan Simin Qelqawan ima, chhaynapi ‘huk-nisqalla, huk yuyaynillayoq, huk sonqollayoq kawsananchispaq’, ‘iñiypi kallpachakunanchispaqpas’ (1 Cor. 1:10; Col. 2:6, 7). ¡Maytan Jehová Diosta agradecekunanchis kay tukukuy qaylla p’unchaykunapi chay tukuy yachachiykuna qowasqanchismanta! Chaymi ‘allin yuyayniyoq hunt’aq kamachiqa’ mana allinpaqchu qhawarin ima qelqatapas, huñunakuytapas, internetpi huñunakuytapas mana paypa kamachisqan kaqtinqa (Mat. 24:45-47).

Sichus pipas Jehová Diospa Reinonpaq llank’aypi yachayninwan yanapakuyta munan chayqa allinmi. Ichaqa, Diospa llaqtan Jesucristoq yanapayninwan ruwasqantaqa manan pipas ruwayninkunawan pisichananchu. Ñawpaq kaq siglopi apóstol Pablo cristianokunaman willaran ama yanqa sayk’uchikuq ruwaykunapi tiemponkuta usuchinankupaq, amallataq “ñawpa taytakunaq mana tukukuq suti qelqankutapas t’aqwishanankupaq. Chaykunaqa churanakuykunallatan hatarichin, manataqmi Diospa ruwayninkunapiqa imapaqpas valenchu” (1 Tim. 1:3-7). Llapa cristianokunan t’aqakunanchis ‘mana yuyayniyoq yanqa tapunakuykunamanta, ñawpa taytakunaq suti qelqankumanta, churanakuykunamanta, kamachikuy simi hawa ch’aqwaykunamantapas, chaykunaqa yanqan, manataqmi imapaqpas valenchu’ (Tito 3:9).

Pikunachus astawan Bibliata t’aqwiriyta munanku chayqa, t’aqwinkumanmi Perspicacia para comprender las Escrituras, “Toda Escritura es inspirada de Dios y provechosa” nisqa qelqakunata; t’aqwillankumantaqmi Daniel, Isaías, Apocalipsis nisqa qelqakunamanta rimaq librokunatapas. Chaykunawanmi yanapachikunkuman Bibliata estudianankupaq yachachisqanpi yuyaymananankupaqpas, chhaynapi ‘espiritualkaq tukuy yachayta entiendenqaku, Diospa munaynintapas allintapuni reqsinqaku. Señorpa kaqkuna hinapuni purinqaku, tukuy imapipas payta kusichinankupaq, llapa allin ruwaykunapi aswan aswanta rurunankupaq, Diosta allintapuni reqsiypi wiñanankupaqpas’ (Col. 1:9, 10).