Manan pisiyachinachu ñawpaq munakuyninchista
1 Qallariy siglopi Éfeso congregacionman Jesús hanaq pachapi kashaspaña niran: “Kashanmi contraykipi: Manan ñawpaq hinañachu munakuwanki”, nispa (Apo. 2:4). Yaqachus hina, Jehová Diosta askha cristianokuna manaña munakusharankuchu ñawpaqpi hina. Noqanchispas cheqaq-kayta yachashaspaqa anchatapunin Diosta, runamasinchistapas munakuranchis, chaymi tukuy sonqo runakunaman willaranchis chayllaraq yachasqanchismanta. ¿Imatan ruwananchis ñawpaq munakuyninchispas predicayninchispas mana pisiyananpaq?
2 Estudiananchis, huñunakuykunamanpas rinanchis: ¿Cheqaq-kayta yachashaqtinchis, iman yanapawaranchis Diosta runamasinchistapas munakunanchispaq? Bibliapi Jehová Diosmanta yachasqanchismi yanapawaranchis (1 Juan 4:16, 19). ‘Munakuyninchis [...] aswan-aswantaraq tukuy yachaypipas allin reparaypipas’ wiñananpaqqa Diosmanta k’apakta yachashanallanchis, “Diospa ukhu sonqontapas” t’aqwishanallanchis (Fili. 1:9-11; 1 Cor. 2:10).
3 Kay tukukuy qaylla p’unchaykunapiqa sasan Bibliata estudiay imaymana llakikuykuna kasqan rayku (2 Tim. 3:1). Tiempota hap’inanchis allinta estudianapaq. Chaymantapas huñunakuykunaman rishanallanchis, astawanraq “Señorpa kutimunan p’unchay qayllaykamushasqanta yachashaspanchisqa” (Heb. 10:24, 25).
4 Predicananchis: Kusikuywan predicasqanchismi yanapawasun ñawpaqpi hina Diosta munakushanallanchispaq. Allin willakuykunata willaspaqa yuyarinchis Jehová Diospa sumaq promesankunata, chhaynapin suyakuyninchispas munakuyninchispas mana pisiyanqachu. Hinaspapas, hukkunaman yachachinapaq Bibliaq yachachiyninkunata allinta t’aqwisqanchismi iñiyninchista astawan kallpachan (1 Tim. 4:15, 16).
5 Jehová Diosqa tukuy imaymanata munakuyninchistapas, chaskinanpaq hinapunin (Apo. 4:11). Amapuni munakuyninchisqa chiriyachunchu. Aswanpas, ñawpaqpi hina Diosta munakushanalla, chaypaqmi tukuy sonqo Bibliata estudiananchis, huñunakuykunaman rishanallanchis, munakuywantaq hukkunamanpas yachasqanchista willananchis (Rom. 10:10, NM).