Jehová Diosqa “kusi sonqo Diosmi”, payman rikch’akunanchis
1 Jehová Diosqa munanpuni runakuna kusisqa kananta. Simin Qelqapin willawashanchis runakunapaq askha saminchaykuna apamunanmanta, chayta uyarispaqa anchatan kusikunchis (Isa. 65:21-25). Chay hinaqa, sut’itan rikukunan ‘yupaychananchis [“kusi sonqo”, NM] Diospa qhapaq atiyninmanta allin willakuykuna’ willay munasqanchisqa (1 Tim. 1:11). Reinomanta predicaspanchisqa rikuchinanchismi cheqaq-kayta munakusqanchista, runakunapi interesakusqanchistapas (Rom. 1:14-16).
2 Mayninpiqa sasan kusisqa predicay. Yaqapaschá wakin llaqtakunapi pisi runakunallan Reinomanta willakuykunata uyarikunku, otaq kikinchispaschá sasachakuypi tarikushanchis. Kusi sonqo kananchispaqqa yuyaymanananchismi kayta: llaqtanchispi runakunaqa anchatan necesitanku Reinomanta allin willakuykuna uyariytapas entiendeytapas (Rom. 10:13, 14, 17). Chaypi yuyaymanaspaqa kusisqa willasunchis khuyapayakuyninpi Jehová Diospa qespichiwananchismanta.
3 Allin kaqkunamanta willasun: Allinta reparakunanchis imayna rimasqanchista. Lliwpa yachasqan sasachakuymantaña noticiamantaña predicayta qallarisunman chaypas, ama sinchitaqa chaykunamanta rimasunchu. Ruwananchisqa “allin willakuykunata” willaymi (Isa. 52:7; Rom. 10:15). Chay willakuykunaqa Diospa prometesqan sumaq tiempo chayamunanmantan rimashan (2 Ped. 3:13). Kayta yachaspaqa, Bibliamanta allin textokunata akllaspa ‘llakisqa sonqoyoqkunata kusirichisun’ (Isa. 61:1, 2). Chhaynapin llapallanchis kusi sonqolla kasun.
4 Predicasqanchis runakunaqa sut’itapunin reparanqaku kusi sonqo runa kasqanchista. Chay hinaqa, Reinomanta allin willakuykunata predicaspaqa rikch’akushallasunpuni “kusi sonqo” Jehová Diosninchisman.