Imaynata tukuy sonqo servisunman
1 Tukuy sonqowan Apolospa predicasqanqa, yuyarichiwanchismi wakin iñiqmasinchiskunaq tukuy sonqowan predicasqankuta (Hech. 18:24-28). Ichaqa llapallanchismanmi willawanchis: “Ama qhellakuychischu, rawrashaq sonqowan Señorta serviychis”, nispa (Rom. 12:11). ¿Imaynatan servicionchispi chhayna sonqoyoqpuni kasunman?
2 Yachayninchista yapaspa: Iskay yachachisqankunaman rikhurispan Jesusqa “paymanta lliw qelqasqata sut’incharqan”, chay qhepatataq yachachisqankuna ninakuranku: “¿Manachu ñanpi [...] willashawaqtinchisqa sonqonchis kawsarirqan?”, nispa (Luc. 24:27, 32). Noqanchispapas, ¿manachu sonqonchis kusikuymanta kawsarin Diospa Siminta aswan allinta entiendeqtinchis? Iñiyqa yachaywanmi yapakun. Romanos 10:17 kay hinata sut’inchan: “Iñiyqa uyariywanmi hamun”, nispa. Jehová Diospa niwasqanchispi tukuy sonqo iñispaqa manapuni upallasunmanchu yachasqanchismanta rimayta (Sal. 145:7; Hech. 4:20).
3 Chaywanpas, Diosta tukuy sonqo munakushanallanchispaq, servishanallanchispaqpas, manan ñawpaqpi yachasqallanchismanchu hap’ipakunanchis. Aswanpas, yapashanallanchismi cheqaq-kaymanta yachayninchista, hinallataq Jehová Diosta munakuyninchistapas. Mana chayqa, pisi pisillamanta manaña tukuy sonqowanchu servisunman (Apo. 2:4). Diospa Simin Qelqaqa kallpachawanchismi “Diosta allintapuni reqsiypi [wiñashanallanchispaq]” (Col. 1:9, 10).
4 Allinta estudiaspa: Chay hinaqa, allintapuni qhawarikunanchis imayna estudiasqanchista. Yaqapaschá La Atalayata preparakuspa atillanchis tapukuykunapaq kutichiykuna marcayta, hinallataq chaykunamanta iman kaqllata rimariytapas. Ichaqa ¿llapan maskhana textokunata maskhanchis? ¿Yuyaykunchischu imaynata chaykunata kawsayninchispi ruwananchispaq? Sapa semana Bibliata leespari, ¿kallpachakunchischu allinta t’aqwinapaq, chaykunapi yuyaymanananchispaqpas? (Sal. 77:11, 12; Pro. 2:1-5.) Anchatapuni yanapawasun Diospa Siminta yuyaymanay, chayman sonqochakuypas (1 Tim. 4:15, 16). Allinta estudiaspaqa, anchatapuni kallpachakusun “allin kaqkunata tukuy sonqo ruwananchispaq” (Tito 2:14).