Jehová Diospa qhapaq-atiyninmanta willasun
1 Salmistan niran: “Llapa kay pachapi tiyaqkuna, Señor Diosman takiychis. [...] Qhapaq-atiyninta tukuy runakunaman willaychis, musphana ruwasqankunata llapa llaqtakunaman willaychis”, nispa. Jehová Dios ñoqanchis rayku ñawpa ruwasqanpi, kunan ruwasqanpi, hamuq tiempopaq ruwananpipas yuyaymanaqtinchismi, sonqonchis tanqawasun qhapaq-atiyninmanta willanapaq (Salmo 96:1, 3).
2 Predicaspa: Jehovaq testigonkunapaqqa hatun saminchaymi Diospa sutinmanta willaypas teqsimuyuntinpi hatunchaypas (Mal. 1:11). ¡Hukniraypunin kanku Biblia t’ikrasqankupi anchaykachakuspa Diospa sutinta orqoq cristiandadpi umalliqkunamantaqa! Usqhayllan Diospa sutinta runakunaman yachachina, manchay ñak’ariy p’unchaypi, iñiywan Diospa sutinta waqyakuspa qespichisqa kanankupaq (Rom. 10:13-15). Teqsimuyuntinpi thak kananpaqqa Diospa sutinmi ch’uyanchakunan. Arí, lliw kamasqan Diospa sutinwan tupasqan rayku.
3 “Hatunmi Señor Diosqa, yupaychana hinapunin.” Ichaqa, “¡Sutiykiqa Ancha Hatunmi!” nispa runakuna ninankupaqqa, paymantan cheqaqta yachananku (Sal. 96:4, 8). Hukkunan ninku, Diosqa manan kanchu, nispa (Sal. 14:1). Wakintaq paymanta mana allinta rimaspa ninku, manan Diosqa imatapas ruwayta atinmanchu otaq manan interesakunchu runakunaq sasachakuyninpi, nispa. Ch’uya sonqoyoq runakunaman Kamaqninchismanta, munayninmanta, sumaq kayninmantapas yachanankupaq yanapaqtinchisqa, Diostan hatunchanchis.
4 Kawsayninchiswan: Allin kawsayninchiswanmi rikuchinchis Jehová Diospa chanin kamachikuynin kasukusqanchista, chaywanpas hatunchanchismi (1 Ped. 2:12). Allin maqllisqa, allin p’achasqapas kaqtinchisqa, allintan qhawarichikusunman, uyarikunkumanmi Diospa Simin Qelqapi kamachikuykuna allinninchispaq kasqanmanta willaqtinchispas (1 Tim. 2:9, 10). Kusikunchismi runakuna ‘allin ruwasqanchista rikuspa, hanaq pachapi kaq Yayanchista yupaychaqtinku’ (Mat. 5:16).
5 Sumaq Diosninchista hatunchasun predicasqanchiswan kawsayninchispiwan kay kamachikuyta kasukuspa: “Señor Diosman takiychis, payta saminchaychis, qespichiwasqanchista sapa p’unchay willaychis” (Sal. 96:2).