Sapankanmanta llakikusun sumaq sonqo kaspa
1 Huk warmi mana allinkunata yuyayukusqa Jehováq testigonkunamanta manaraq reqsishaspa; ichaqa huk testigo pananchiswan ñawpaq kutita tupasqanta yuyarispan niran: “Imamantachá rimakuraykupas, ichaqa yuyashallani sumaq sonqo, llanp’u sonqo, huch’uyaykukuqpas kasqanta. Ratulla payta munakurani”, nispa. Chay rimasqanmi rikuchiwanchis sapanka predicasqanchiskunamanta llakikuyqa, chaniyoqpuni kasqanta (Fili. 2:4).
2 Munakuqqa sumaq sonqollan: Runamasinchista munakusqanchistaqa, rikuchisunmanmi sumaq sonqolla kaspa (1 Cor. 13:4). Sumaq sonqoyoqqa llakikunmi hukkunaq allinninkumanta, yanapaytataq munan. Predicaspaqa sumaq sonqo-kasqanchista rikuchishanchis. Ichaqa, runamasinchismanta sut’i llakikusqanchisqa manan predicaspallachu rikuchisun. Aswanpas runakunamanta khuyayta llakikusqanchistaqa rikuchisun, paykunaman allinkaqta ruwaspa, munay-sonqo kaspa, makilla uyarispa, allinkunata rimaspa, allinta qhawarispa ima (Mat. 8:2, 3).
3 Khuyayta hukkunamanta llakikusqanchisqa, sonqoschista kuyurichinqa ruwaykunawan yanapananchispaq. Wasin wasinta predicaspas huk precursor achhuykuran yuyaq viudaman, paytaq testigo kasqanta yachaspa ratulla kutichipuran. Viudaqa escalerapis kashasqa cocinanpi focota cambiananpaq wayqenchis punkunta takaqtin. Wayqenchistaq niran, “mana chaytaqa sapallayki ruwanaykichu”, nispa. Viudaqa wasinta haykuchiran focota cambiananpaq, chayta ruwaspataq wayqenchisqa pasapuran. Chayllamansi viudaq wawan chayamusqa, viudataq willasqa wayqenchis ruwasqanta. Chayta yachaspas viudaq wawanqa usqhaylla wayqenchista aypasqa agredecenanpaq. Hinaspa unayta rimasqaku, hinan Biblia estudiayta qallarisqaku.
4 Allin sonqoyoq kaspaqa rikuchinchis Jehová Diospa runakunapaq munakuyninta, sumaqchanchistaq Reinomanta willayta. Chayrayku ‘Diospa kamachinkuna kasqanchista rikuchisunchis, sumaq sonqo kasqanchiswan’ (2 Cor. 6:4, 6).