Mana rimaspalla predicasun
1 Mana imatapas rimaspa, Jehová Diospa rikukuq kamasqankuna anchata riman mana rikuy atina kayninkunamanta (Sal. 19:1-3; Rom. 1:20). Kaqllatataq allin kawsayninchis, cristiano kayninchiskuna, k’umuykukuq kayninchispas mana rimaspalla predican (1 Ped. 2:12; 3:1-4). Allin kawsayninchiswan llapanchispas munananchispuni ‘qespichiqninchis Diosmanta yachachikuyqa tukuypi sumaqpuni kasqanta rikuchiyta’ (Tito 2:10).
2 ¿Imaynatan huchayoq runakuna Bibliaq yachachisqanta sumaqchasunman? Bibliaq nisqanwan pusachikuspa, santo espirituq atiyninpiwan yanapachikuspalla (Sal. 119:105; 143:10). “Diospa siminqa kawsaqmi, atiyniyoqmi, llapa iskay ñawch’iyoq espadamantapas aswan ñawch’isapallañan” (Hebreos 4:12). Sonqonchispa ñat’inmankama haykun, yanapawanchistaq mosoq runa-kaywan p’achakunanchispaq (Col. 3:9, 10). Santo espirituqa, noqanchispi rikhurichin sumaq kaykunata, ejemplopaq: sumaq sonqo-kayta, allin runa-kayta, llamp’u sonqo-kayta, cuerpo kamachiq-kaytawan (Gálatas 5:22, 23). ¿Munanchischu sapanqanchis Diospa siminwan, santo espiritunpiwan kawsayninchis kuyurichinanta? (Efe. 4:30; 1 Tes. 2:13.)
3 Hukkunapas reparanku. Diospa munasqanman hina tiyaqtinchis, paypa kayninkunatapas rikuchinapaq kallpachakuqtinchisqa, muyuriqninchispi kaqkunapas reparanku. Ejemplopaq, huk runata llank’aq masinkuna asipayaranku taqsalla kasqanmanta. Huk pananchistaq paypa llank’aqmasin mana hayk’aqpas asipayasqachu, aswanpas khuyayta respetaran. Chayrayku chay runa tapuran imanaqtintaq hukniraypuni pay karan. Pananchistaq rikuchiran respetaq kayninqa, kawsayninpi Bibliaq nisqanta kasukusqanrayku karan. Rimallarantaqmi Diospa Reinon sumaq suyakuymanta. Runaqa qallariran Bibliamanta yachayta bautizakunankama. Llaqtanman kutipuran, familiankunataq allin runaman tukupusqanta qhawaspanku anchata kusikuranku, wakintaq cheqaqkayta chaskiranku.
4 Llank’ayninchispi, escuelapi, familiapi, wasimasinchiswanpas rimaqtinchis, allin kawsayninchis, predicacionninchiswan kuska hukkunata yanapanqa Diosta yupaychanankupaq (Mat. 5:16).