Chanin kaypi Jehová hina kasun
1 “Chanin kaytan Jehovaqa munakun.” (Sal. 37:28, NM.) Chayraykun, decidinña kay mundopi millay runakuna wañuchinanta chaypas, willachishanraq chay tiempo manaraq chayamushaqtin (Mar. 13:10). Chaywanmi runakunaman oportunidadta qoshan huchankuta saqespa salvakunankupaq (2 Ped. 3:9). ¿Jehová hinachu ñoqanchispas chanin kanchis? ¿Kallpachawanchischu runaq ñak’arisqanta rikusqanchis Reinomanta paykunaman willananchispaq? (Pro. 3:27.) Chaynin kayta munakusqanchismi kallpachawasun sapa kutin predicananchispaq.
2 Llapa runaman predicasun. ‘Chaninmi kasunchis’ llapa runaman, mana pitapas akllaspa Diospa munasqanmanta predicaspaqa (Miq. 6:8). Runaqa rikusqanchisman hinan pimantapas piensanchis, manan ichaqa chhayna piensaywan atipachikunanchischu (Sant. 2:1-4, 9). Jehovaqa “munanmi llapa runa qespichisqa kananta, cheqaq-kayta reqsinankutapas” (1 Tim. 2:4). Palabranpi cheqaqmi runakunata kallpachanman kawsaynipnkuta cambianankupaq (Heb. 4:12). Chay yachasqanchismi yanapawasun confianzawan predicananchispaq, ñawpa tiempopiña mana uyariwaranchischu chaypas.
3 Tiendapi llank’aq hermananchismi manchakusqa huk caserota hukniray p’achakusqanta rikuspa. Huk kutipin ichaqa ocasión kaqtin willasqa Diospa prometesqan Paraisomanta. Millaytan chay runaqa kutichisqa, manan creenichu chay cuentokunapi, ñoqaqa drogadicto hippien kani, nispa. Manan hermananchisqa desanimakusqachu. Huk p’unchaymi chay runaqa hermananchista tapusqa hatun chukchanmanta ima piensasqanta, chaymi payqa mana p’enqachispa explicasqa hatun chukchamanta Bibliaq nisqanta (1 Cor. 11:14). Paqaristinmi runaqa tiendata risqa chukchan rutusqa, allin afeitasqa. Bibliamanta yachachinatan mañakusqa chaymi huk hermanonchis kusisqa yachachisqa, Bibliapi yachasqanman hina kawsaspan dedicakuspa bautizakusqa. Chay runa hinan, Diosta serviqkunaqa agradecekunku kay tiempopi mana pimanpas sayapakuspa Reinomanta mensaje apasqankuta.
4 Ñan Jehovaqa tukunqaña Allpapi mana chaninta (2 Ped. 3:10, 13). Pisi tiempoq tukukunankama, chanin kaypi Jehová hina kasun, chinkananpaq condenasqa Satanaspa mana chanin mundonmanta lloqsinankupaq runakunata yanapasun (1 Juan 2:17).