Sumaq sonqo kayqa thasnunmi phiñasqa kawsayta

PAISES BAJOS nacionmanta iskay Testigonkunan huk yuyaqña warmita Diospa Reinonmanta rimapayarqanku, payqa phiñasqallañan chaskirqan. Qhepamanmi yacharqanku ñawpa qosanpas qhepa qosanpas hinallataq huk wawanpas wañupusqanta, paytaq artritis onqoyniyoq kasqanta. Rimasqankuman hina pisillataña thak niykurqan chaypas, phiñasqallan kasharqan.

George cristianoqa repararqanmi chay señora sapallan tarikuspa phiñasqa kasqanta, chaymi Manon esposanta nirqan kutispa t’ikakunata apanankupaq. Rie señoraqa kusikurqanmi chaywan, ichaqa mana tiempoyoqmi kasharqan, chaymi huk p’unchaypi rinankupaq nirqan. Kutiqtinkuqa manan pipas punkuta kichamurqanchu. Huk kutikunapi rispankupas manan wasinpi tarirqankuchu. “Manapaschá munanñachu”, nisparaqmi yuyaykurqanku.

Huk p’unchaymi Georgeqa wasinpi tarirqan. Hinan chay señora willarqan hospitalpi kasqanrayku wasinpi mana tarisqankuta. Nirqanmi: “Qankuna ripusqaykichis qhepamanqa ¡Biblia leeytan qallarirqani!”, nispa. Chhayna sumaq rimasqankuman hinan munarqan Biblia estudiayta.

Biblia estudiasqanman hinan phiñasqa kasqanmanta sumaq sonqo kusisqa señoraman tukupurqan. Manaña lloqsiyta atirqanchu chaypas, llapa wasinta riqmanmi iñiyninmanta willaq. Onqosqa kasqanraykun mana sapakutillachu huñunakuyman riq, ichaqa anchatan kusikuq iñiqmasikuna watukuq riqtinku. Payqa huk hatun huñunakuypin bautizakurqan, chay p’unchaypitaqmi hunt’arqan 82 watanta.

Pisi killakunalla wañupusqan qhepamanmi huk munay qelqasqanta tarirqanku. Chaypin qelqasqa payayaspa sapalla kawsay ancha llakikunapaq kasqanta, sumaq sonqo kaytaq ancha allin kasqanta. Manon cristianan nin: “Chay qelqasqanqa anchatan sonqoyman chayarqan, ancha kusisqan kashani sumaq sonqo kanaykupaq Jehová Dios yanapawasqankumanta”, nispa.

Jehová Dios imayna kasqanmi kallpachawanchis munakuq sumaq sonqo kanapaqqa (Efe. 5:1, 2). “Diospa kamachinkuna kasqanchistan rikuchinanchis”, chhaynapin predicasqanchisqa allin kanqa (2 Cor. 6:4, 6).