Leeqkunan yachayta munanku
¿Aburrikunapaqchu kanqa paraisopi wiñay kawsay?
▪ Biblian prometewanchis kay Hallp’a paraisoman tukuqtin chaypi tiyananchispaq (Salmo 37:29). Ichaqa ¿aburrikunapaqchu kanman chhayna sumaq paraisopi kawsay?
Allinmi chay tapukuyqa. Estudiakusqanman hina, aburrisqalla kawsaq runakunaqa manan ima ruwaytapas tarinkuchu sinchi llakisqataq kanku, chhaynapin ima mana allinmanpas urmankuman. Hinaspapas pikunachus mana yachankuchu imapaq kawsasqankuta otaq sapa kuti kaqllata ruwaqkunaqa manan kusisqachu kawsankuman. Ichaqa, Paraisopi tiyaqkuna, ¿ch’usaq sonqochu sientekunqaku? ¿Sapa p’unchaychu kaq ruwayllapi kanqaku?
Wiñay kawsaytaqa Bibliata yuyaychaq Diosmi prometewanchis (Juan 3:16; 2 Timoteo 3:16). Diosqa ancha munakuqmi (1 Juan 4:8). Chaymi tukuy allin kaqkunata qowanchis kusisqa kawsananchispaq (Santiago1:17).
Kamaqninchisqa yachanmi allin llank’ana kusichiwasqanchista (Salmo 139:14-16; Eclesiastés 3:12). Paraisopi tiyaq runakunaqa manan huk maquinaq piezan hinachu sientekunqaku, aswanpas paykunapaq munakusqanku runakunaq allinninpaqwanmi llank’anqaku (Isaías 65:22-24). ¿Aburrikuwaqchu imaymanakunata yachaspa askha ruwanayoq kaspa?
Chaymantapas Jehová Diosqa manan llapan runamanchu paraisopi wiñay kawsayta qonqa, aswanpas Churin Jesuspa ejemplonta qatikuqkunallamanmi (Juan 17:3). Kay pachapi Jesús kashaspaqa taytanpa munasqantan kusisqa ruwarqan. Qatikuqninkunatapas yachachirqanmi chaskikuymantaqa qoyukuq kaypi aswan kusikuy kasqanta, chaytan ruwasqanwan rimasqanwan ima rikuchirqan (Hechos 20:35). Hallp’a paraisoman tukupuqtinqa, lliw runan iskay hatun kamachikuyman hina kawsanqaku, chaykunan: Jehová Diosta munakuy runamasinchista munakuypiwan (Mateo 22:36-40). ¡May munaychá kanqa, qoyukuq, kusisqa llank’aq, munakuq runakunawan kawsayqa! Manan aburrisqachu kawsasun.
¿Imakunaraqmi Paraisopi kanqa? Sapa p’unchaymi Kamaqninchismanta imaymanata yachasunchis. Científico runakunaqa importante kaqkunatan Diospa kamasqanmanta yacharqanku (Romanos 1:20). Chaywanpas manan imantapas Diospa kamasqanmantaqa yachanchischu. Ñawpa tiempopin Job sutiyoq runa Diospa kamasqankunapi yuyaymanaspa nirqan: “Chaykunaqa manan ruwasqankunamantaqa imapasraqchu, uyarisqanchispas samp’a rimay hinallaraqmi, ¿pitaq entiendeyta atinman atiyniyoq kunkantari?” nispa (Job 26:14).
Unay tiempoña kawsasunman chaypas, manan hayk’aqpas llapantaqa Jehová Diospa ruwasqankunamanta yachasunchu. Biblian willan Diosqa wiñay kawsayta sonqonchispi churasqanta. Chhaynaña kaqtinpas, ‘manan llapanta entiendeyta atinsunchu Diospa qallariymanta tukukuykama ruwasqantaqa’ (Eclesiastés 3:10, 11). ¿Sayk’uwaqchu Diospa kamasqanmanta astawan yachaspa?
Kay tiempopipas Diosta hatunchaspa hukkunata yanapaspa kawsaq runakunaqa manan aburrisqachu kanku. Chhaynaqa, chay ruwaykunaman tiemponchista qospaqa manan aburrikusunchu, wiñaypaqña kawsasun chaypas.
[23 paginapi fotokunata horqorqan]
Hallp’a: cortesía de Image Science and Analysis Laboratory, NASA-Johnson Space Center; galaxia: The Hubble Heritage Team (AURA/STScI/NASA)