Sasa tiempokunapin kawsashanchis
BIBLIAN willaranña ‘sasa tiempokunapi’ kawsananchista, chay tiempotan suticharan ‘tukukuy qaylla p’unchaykuna’, ‘qhepa p’unchaykuna’, nispa (2 Timoteo 3:1-5; 2 Pedro 3:3-7). Jesuspas rimaranmi chay tiempomanta yachachisqankuna hayk’aqchus kay pacha ‘p’uchukapunanpaqña kananmanta’ tapuqtinku (Mateo 24:3). ¿Chay tiempopiñachu kawsashasunman? Qatiqninpi qhawarisun imata Biblia willaranña kay tiemponchiskunamanta chayta, qhawallasunchistaq kay tiempopi kawsay imayna kasqanmanta willakuykunatapas. ¿Imaninkitaq chaykunata qhawarispa?
Biblian kayta willaranña: teqsimuyuntinpi guerrakuna kananmanta (Lucas 21:10; Apocalipsis 6:4).
Kay willakuymi kan: “Cristoq nacesqanmantapacha 1900 watakamaqa askha runakunan wañuranku guerrakunapi, ichaqa kay pachak wata qhepallapin kinsa kuti aswan askharaq runakuna wañuranku guerrakunapi” (Instituto Worldwatch).
Biblian kayta willaranña: yarqaykuna, onqoykuna kananmanta (Lucas 21:11; Apocalipsis 6:5-8).
Kay willakuymi kan: 2004 watapaqmi yaqa 863 waranqaq waranqan runakuna tullullaña kasharanku mana allinta mikhusqankurayku, 2003 watamantaqa qanchis waranqaq waranqanmi yapakuran (Organización de las Naciones Unidas para la Agricultura y la Alimentación).
teqsimuyuntinpi yaqa 1.000 millón runakuna mana tiyanapaq hina wasikunapi tiyashanku, 2.600 millón runakunaq wasinkupi mana desagüe nitaq q’opa wikch’unankupas kanchu, 1.100 millón runakunapaqtaq mana kanchu agua potable nisqa wasinkupi (Instituto Worldwatch).
phisqa pachak waranqaq waranqan runakunan chukchu onqoywan kashanku, tawa chunka waranqaq waranqan VIH/sida onqoyniyoq kashanku, 2005 watapaqtaq waranqaq waranqan soqta pachak waranqan wañuranku tisis onqoymanta (Organización Mundial de la Salud).
Biblian kayta willaranña: kay pachata waqllichinankumanta, tukuchinankumanta (Apocalipsis 11:18).
Kay willakuymi kan: “Runakunaq imaymana ruwasqankuwanmi askha sach’akuna animalkunapas chinkapushanku, chaykunaqa runakunaq mana allinninpaqmi”. Chaymantapas, “ñawpaqpi sach’akuna, mayukuna, hallp’apas imaymana qowasqanchismantaqa, kunanqa kuskanmanta aswan pisillatañan qowanchis” (informe de la Evaluación de los Ecosistemas del Milenio).
“Runakuna wayrata imaymanawan qhellichasqanraykun kay tiyasqanchis pacha q’oñirishan, climapas sinchi millaymanmi tukupushan chaymi kay pachaqa tukukuyninmanña chayashan.” (Instituto Goddard de Estudios Espaciales, NASA.)
Biblian kayta willaranña: pachantinpi Diospa Reinonmanta allin willakuykuna willasqa kananmanta (Mateo 24:14; Apocalipsis 14:6, 7).
Kay willakuymi kan: 2007 watapin 6.957.854 Jehová Diospa testigonkuna waranqa tawa pachak millón horata hina predicaranku Diospa Reinonmanta 236 llaqtakunapi (Anuario de los testigos de Jehová 2008).
Qhawasqanchis hina, Bibliaqa willaranña runakuna sinchi sasachukuykunapi tarikunankuta, ichaqa manan mana allinkunallachu kanan karan. Jesusmi willaran Diospa Reinon chayamunanmanta “allin willakuykuna” kay tiempopi willakunanta. ¿Imataq Diospa Reinonri? ¿Tukuchinmanchu runakunaq llakikuyninta? ¿Imatan chay Reino qosunkiman?
[3 paginapi willakuy]
Biblia willaranña kay tiempopi imayna kawsay kananmanta