Jesús kausarichin juj viudaq wawanta

Ejercitopi capitanpa kamachinta qhaliyachisqan qhepallatan Jesusqa Naín llaqtata riran, chay llaqtaqa 32 kilómetro jinapin Capernaum llaqtamanta kasharan. Jesuswan kuskan riranku discipulonkunapas juj runakunapas. Naín llaqtaman chayashaspan Jesusqa rikuran askha runakuna chay llaqtamanta lloqsimushaqta, paykunan juj waynaq ayanta p’ampanankupaq apamushasqaku.

Chay waynaq mamitanqa viudan kasqa, chay waynallan wawanqa kasqapas, chaymi payqa sinchi llakisqa kasharan. Chay munasqa wawallanmi paytaqa qhawanan karan. Ichaqa wañupurantaq chayqa, manañan pininpas karanchu payta cuidananpaq.

Chaychá Jesusqa chay viudata rikuspa sinchitapuni sonqonta nanachikuran, jinaspa anchata khuyapayaspa kallpachananpaq jina niran: “Amaña waqaychu”, nispa. Chay waynaq ayanman achhuykuspataq aya wantunata llamiykuran (Lucas 7:13, 14). Ayata apashaqkunataq kaq rato sayaykuranku. Paykunaqa “¿imatataq ruwaytari munashan?” nispachá tapukusharanku.

Jesusta qatikuqkunapas tapukusharankuchá: “¿Atinmanchu Jesús wañusqakuna kausarichiyta?”, nispa. Paykunaqa yacharankun ñaupa tiempopi wakin runakunata kausarichikusqanmanta, rikurankutaqmi Jesusta askha milagrokuna ruwaqtapas, ichaqa manan rikurankuchu pitapas kausarichiqtaqa (1 Reyes 17:17-23; 2 Reyes 4:32-37). Jinan Jesusqa niran: “Wayna, qantan niyki: ¡Jatariy!”, nispa (Lucas 7:14). Jinan waynaqa tiyarispa rimayta qallariran, Jesustaq mamanman qopuran. Mamanqa ancha kusisqa ancha admirasqa imachá chaywan kasharan.

Chayta rikuspan runakunaqa kausay qoq Jehová Diosta alabaranku: “Juj jatun profetan noqanchis ukhupi rijurin”, nispa. Wakinkunapas nirankun: “Diosmi llaqtanta yuyarimushan”, nispa (Lucas 7:16). Chaykuna pasasqanmanta willakuyqa ratollan muyuriqpi kaq llaqtakunaman ch’eqeriran, Judea ladokamaraqmi chayaranpas. Jesuspa wiñasqan Nazaret llaqtapipas uyarikuranchá chay willakuyqa. Chay llaqtaqa 10 kilómetro jinallapin kasharan.

Bautizaq Juanqa carcel-llapiraqmi kasharan, chaywanpas payqa yachaytan munaran Jesuspa milagrokuna ruwasqanmanta, chaymi discipulonkuna payman chaykunamanta willaranku. ¿Imatan Juan ruwaran chay milagrokunamanta yachaspa?