19 T’AQA
Kay tiempopi hunt’akuq profecía
Jesusqa willarqanmi kamachikunan tiempomanta imaynapi yachananchista, p’uchukay tiempo sispallapiña kashasqantapas
OLIVOS orqomantan rikukurqan Jerusalén llaqta yupaychana wasipas, chaypi kashaspan tawa apostolkuna Jesusta sapaqllapi tapukurqanku willasqanmanta. Chay ñawpaqtan Jesús willasqa yupaychana wasi thunisqa kananmanta, millay kawsay p’uchukapunanmantawan (Mateo 13:40, 49). Chaymi tapurqanku: “¿Hayk’aqtaq chaykunaqa kanqa? Kutimunaykiña kashaqtinqa kay tiempopas p’uchukapunanpaqña kashaqtinqa, ¿imakunatan rikusaqku?” nispa (Mateo 24:3).
Chaypin Jesús willarqan manaraq Jerusalenpas yupaychana wasipas thunisqa kashaqtin imakuna sucedenanta. Chayqa manan chay tiempollapichu hunt’akunan karqan, qhepamanmi Hallp’antinpi hunt’akunallantaq karqan. Chaymi Jesuspa kutimunanta reparanankupaq llapa runakuna huk señalta makilla suyashananku karqan. ¿Ima señalta? Jesuspa willasqan profeciakuna Hallp’antinpi huk tiempollapi hunt’akunanta. Chaykunata rikuspan yachakunman Jesús Diospa Gobiernonpi Rey kananpaq churasqa kasqanta, chay Gobiernowan millay ruwaykunata tukuchinanpaq, thak kawsayta apamunanpaqpas pisillaña kasqanta. Jesuspa willasqan señalkuna rikhurimuqtinmi yachasunman kay pachapi religionkunapas, kamachikuqkunapas, millay kawsaypas tukukapunanpaqña kashasqanta, thak kawsay qallarinantapas.
Jesusmi willarqan kamachikamuyta qallariqtin Hallp’antinpi yarqay, onqoy, guerrakuna, terremotokuna kananta. Manañan runakunapas kamachikuykunata kasukunankuchu karqan. Payta qatikuqkunan ichaqa Diospa Gobiernonmanta Hallp’antinpi willananku karqan. Chaykuna qhepamantaqmi kay pachapi mana hayk’aq kasqan ‘manchay ñak’ariy’ kanan karqan (Mateo 24:21).
¿Imaynapin cristianokuna yachankuman chay p’unchay qayllaykamusqanta? “Higos sach’amanta kay yachachikuyta yachaychis” nirqanmi Jesús (Mateo 24:32). Higospa raphinkuna ch’ikchimusqanpin yachakun poqoy tiempo qayllaykamusqanta. Chhaynallataqmi Jesuspa willasqan huk tiempollapi lliw hunt’akuqtin yachakunman p’uchukay tiempo qayllaykamusqanta. Ichaqa Jesuspa nisqan hina, Yayallan yachan ima p’unchaypi ima horapi manchay ñak’ariy qallarinanta. Chaymi nirqan: “Manan yachankichischu hayk’aqchus chaykuna kanantaqa, chayrayku cuidakuychis, makilla kashaychis”, nispa (Marcos 13:33).
a Jesuspi profeciakunaq hunt’akusqanmanta astawan yachanaykipaq, qhaway ¿Imatapunin Biblia yachachin? nisqa librota, 9 capitulota, chaytaqa Jehová Diospa testigonkunan ruwan.