17 T’AQA
Diospa Gobiernonmanta willarqan
Jesusqa imaymanatan qatikuqninkunaman yachachirqan, ichaqa Diospa Gobiernonmantan astawan yachachirqan
¿IMAPAQMI Jesús kay Hallp’aman hamurqan? Paymi nirqan: “Diospa qhapaqsuyunmanta [otaq Gobiernonmanta] allin willakuykunataqa willamunaymi, chaypaqmi Diosqa kachamuwarqan”, nispa (Lucas 4:43). ¿Imakunatan Jesús chay Gobiernomanta yachachirqan?
1. Jesús Rey kananmanta. Jesús kikinmi Mesías kasqanta willakurqan (Juan 4:25, 26). Nirqantaqmi Danielpa profetizasqan Rey kasqanta. Apostolninkunamanmi willarqan “qhapaq tiyananpi tiyaykuqtin” paykunawan kuska kamachimunankupaq (Mateo 19:28). Paykunatan suticharqan “pisi t’aqa oveja”, nispa. Rimallarqantaqmi ‘wak ovejakunamanta’ paykunan ichaqa mana chay pisi t’aqamantachu kananku karqan (Lucas 12:32; Juan 10:16).
2. Diospa Gobiernon chanin kayta apamunanmanta. Jesusmi willarqan Diospa Gobiernon Taytanpa sutinta Saqraq sarunchasqanmanta chaninchananta. ¿Imaynatan chayta ruwanan karqan? Edén huertamantapacha Diospa sutin sarunchasqa kasqanta ch’uyanchaspa (Mateo 6:9, 10). Hinaspapas wakchakunata, qhapaqkunata, warmita, qharita llapa runakunata sumaqta yachachisqanpin rikuchirqan kamachikuyninpi manaña pisichanakuy kananta. Israel runakunata yachachinanpaqña hamurqan chaypas, tukuy atisqantan ruwarqan huk llaqtayoq runakunamanpas yachachinanpaq. Religionpi umalliqkunaqa reqsisqanku runakunallatan yanaparqanku huk llaqtayoq runakunatataqmi cheqnikurqanku, Jesusmi ichaqa mana chhaynachu karqan.
3. Diospa Reinon mana kay pachamantachu kananmanta. Jesús kay Hallp’api kashaqtinqa judiokunan huk llaqtaq makinpi kasharqanku, chaymi chay tiempopi sinchi ch’aqway karqan. Paymi ichaqa mana hayk’aqpas politicapi chhaqrukurqanchu (Juan 6:14, 15). Chaymi huk kamachikuqwan rimaspa nirqan: “Qhapaqsuyuyqa manan kay pachamantachu”, nispa (Juan 18:36). Yachachisqankunamanpas nirqanmi: ‘Manan kay pachaqchu kankichis’, nispa (Juan 15:19). Chaymantapas manan munarqanchu ima armatapas hap’inankuta, amachanankutaña necesitarqan chaypas (Mateo 26:51, 52).
“Jesusqa purirqan llapa llaqtakunata huch’uy llaqtakunatawan, Diospa qhapaqsuyunmanta allin willakuykunata willaspa.” (Lucas 8:1)
4. Cristo munakuywan kamachimunanmanta. Jesusmi qatikuqninkunata prometerqan llakikuyninkumanta sasachakuyninkumantawan samaykachinanpaq (Mateo 11:28-30). Chaymi yachachirqan ama qolqe sonqo kanankupaq, hukkunawan sumaqta kawsanankupaq, kusisqa kawsanankupaqwan (Mateo 5-7 capitulokuna). Jesusqa munakuq runan karqan chaymi paymanqa mayqen runapas qayllaykuqku wakchaña kaspapas, paykunaqa yacharqankun sumaq chaskisqa kanankuta. ¿Manachu chhayna sumaq Kamachikuqta ñoqanchispas munasunman?
Jesusqa askha milagrokunatan ruwarqan kay Hallp’api kashaspa. ¿Imatan chaywan rikuchirqan? Qatimuq paginapi yachasun.