10 T’AQA
Salomón, yachayniyoq rey
Jehová Diosmi rey Salomonman yachayta qorqan. Kamachikusqan tiempopiqa sumaqtan Israel runakuna kawsarqanku
¿IMAYNAN kawsay kanman huk llaqtapi lliw runakunapas kamachikuqpas Diosta kasukuqtinku? Chayta yachanapaq qhawarisun 40 wata Salomonpa kamachisqanmanta.
Davidqa manaraq wañupushaspan churin Salomonta kamachikuqta churarqan. Huk kutinmi mosqoyninpi Salomonta Dios nirqan lliw munasqanta mañakunanpaq. Chaymi Salomonqa yachayta mañakurqan chaninta juzgananpaq. Jehová Diosqa allinpaqmi chay mañakusqanta qhawarirqan, chaymi yachayta qorqan. Hinaspapas nirqanmi kasukuq kaqtinqa qhapaq kayta, allin reqsisqa kayta, unay kawsaytapas qonanta.
Yachayniyoq kasqanraykun Salomonqa allin reqsisqa karqan. Huk kutinmi iskay warmikuna wawata qechunakuspa payman rirqanku. ¿Imatan rey Salomón ruwarqan? Chay wawata iskayman kuchunankupaqmi kamachirqan. Ñawpaqkaq warmiqa munarqanmi kuchunankuta, qhepakaq warmin ichaqa nirqan huk kaq warmiman qopunankupaq. Chaypin Salomonqa yacharqan qhepa kaq warmi maman kasqanta. Chayta uyarispan runakuna yacharqanku Salomonman Dios yachay qosqanta.
Israel runakuna Diosta yupaychanankupaq Jerusalenpi yupaychana wasi hatarichisqanmi Salomonpa aswan allin ruwasqan karqan. Chay wasita inaugurakushaqtinmi Salomón Diosmanta mañakuspa nirqan: “Hanaq pachapas manan chaskiyta atisunkichu ancha hatun kashaspa, ¿imanpaqraqtaq kanman kay wasi sayarichisqayqa?” nispa (1 Reyes 8:27).
Salomonqa ancha allin reqsisqan karqan, Sabá sutiyoq karu llaqtapipas uyarirqankun paymanta. Chaymi chay llaqtapi reinapas Israel llaqtata rirqan pay kikin Salomón qhapaq kasqanta rikunanpaq, cheqaqtapunichus yachayniyoq kasqanta yachananpaqwan. Chhaynapuni kasqanta rikuspan payqa Jehová Diosta hatuncharqan yachayniyoq reyta akllasqanmanta. Salomonpa kamachikusqan tiempopiqa Diosmi paykunata allinpaq qhawarirqan. Israel runakunaqa manan hayk’aqpas chay tiempopi hinaqa sumaqta kawsarqankuchu.
Chaywanpas Salomonqa manan Diospa lliw kamachisqantachu kasukurqan. Diosmi reykunata kamachirqan ama askha warmikunawan casarakunankupaq, paymi ichaqa sinchi askha warmikunawan casarakurqan, yaqa llapankutaqmi wak dioskunata yupaycharqanku. Chay warmikunan Salomonta pisi-pisimanta Diosmanta karuncharqanku, hinan wak dioskunata yupaycharqan. Chaymi Diosqa chunka ayllukunata mirayninmanta qechupurqan. Davidman prometesqanraykullañan iskay ayllukunata saqerqan. Salomonña mana kasukurqanchu chaypas, Jehová Diosqa hunt’arqanmi Davidman prometesqanta.